Paglig-on sa Kabatan-onan pinaagi sa Makapabayaw nga mga Kalihokan
Nagkinahanglan og mga ideya para sa kalihokan sa kabatan-onan? Bisitaha ang lds.org/youth/activities para sa sobra sa 160 ka mga ideya.
Isip ginikanan o lider sa kabatan-onan, gusto ninyong lig-unon ang inyong mga anak ug kabatan-onan sa inyong ward o branch. Sila nagtubo sa panahon diin ang mga baruganan sa kalibutan nagkalayo sa mga sumbanan sa ebanghelyo. Sila kanunay mibati nga nag-inusara sa ilang mga paningkamot sa pagsunod sa ebanghelyo. Maayo gani, sila makabaton og kalig-on pinaagi sa pag-apil sa makahuluganong mga kalihokan uban ang laing kabatan-onan.
Ang mga Kalihokan Makapalig-on ug Makapa-aktibo og Balik sa mga Batan-on
Malampuson nga mga kalihokan naghatag sa mga kabatan-onan og maayong kahimtang sa pagkat-on ug pagsunod sa ebanghelyo. Kini makatabang nila nga maandam sa ilang mga tahas sa umaabut, mapalambo ang ilang mga talento ug interes, makakat-on og mga kahanas sa pagpangulo, ug paglig-on sa panaghigalaay samtang sila makig-interact sa ubang mga batan-on. Ang mga kalihokan makahatag og mga oportunidad sa mga kabatan-onan sa pagbuhat og makahuluganong serbisyo sa uban diha sa komunidad. Ang mga kalihokan makatabang usab ninyo sa pagmugna og positibong pagmatuto sa relasyon uban sa kabatan-onan.
Ang dili kaayo aktibo ug dili miyembro sa Simbahan makasinati usab sa kalingaw ug kaswal nga palibut diha sa mga kalihokan sa kabatan-onan. “Ang mga kalihokan mao ang usa sa atong epektibong paagi sa pagtabang ug pagpabalik og aktibo sa uban,” miingon si David L. Beck, kinatibuk-ang presidente sa Young Men. “Daghang mga batan-on nga sa sinugdanan dili modawat sa imbitasyon nga motambong og miting sa sakrament o maminaw sa mga misyonaryo apan malipay nga moapil sa makalingaw nga kalihokan. Daghang mga kinabig sa Simbahan misulti nga ang ilang unang pagkahibalo sa ebanghelyo nahitabo sa dihang sila gidapit sa usa ka higala ngadto sa kalihokan sa kabatan-onan.”
Usa sa importanting bahin para sa malampusong mga kalihokan mao ang pag-paapil sa mga kabatan-onan. Ubos sa inyong paggiya, ang mga batan-on adunay dakong tahas sa pagplano; walay mas nasayud sa ilang mga interes, mga tumong, mga tinguha, ug mga pangutana kay kaninyo. Kon ang mga kapangulohan sa korum ug klase mangulo sa pagplano ug pag-implementar sa mga kalihokan base sa panginahanglan sa mga batan-on sa ilang ward o branch, ang mga batan-on mas ganahan ug interesado ug sa katapusan adunay mas maayo nga mga kasinatian.
Lain-laing mga Kalihokan
Sa lds.org/youth/activities, kamo makakita og sobra sa 160 ka mga ideya sa pagdasig sa mga batan-on samtang sila nagplano. Ang site nagsugyot usab og mga paagi sa pagtabang kaninyo sa pagtino sa mga panginahanglan sa mga batan-on, nga adunay mga himan sa pagplano ug komunikasyon aron makatabang sa mga batan-on ug mga hamtong nga mga lider sa pag-implementar sa ilang mga ideya. Gani makasumiter mo og inyong kaugalingong mga ideya sa site.
Ang site nagsugyot og mga kalihokan sa pagserbisyo sa uban, pagpakigbahin sa ebanghelyo, pagpalambo sa pisikal nga kahimsog, pagpahigayon og musika ug art, pagpangandam sa umaabut nga mga tahas, paghimo sa buhat sa templo ug family history, ug uban pa. Samtang ang mga batan-on magkahingkod ug moatubang og daghang mga responsibilidad, nagkinahanglan sila og lain-laing mga abilidad ug kasinatian aron sa pagsangkap nga sila ang mahimong pinakamaayo diha sa dalan sa kahimayaan. “Sa pag-andam sa buhat sa Langitnong Amahan alang kanila,” si Elder Paul B. Pieper sa Seventy miingon, “ang atong kabatan-onan nagkinahanglan og mga kasinatian nga makatabang nila nga molambo sa espiritwal, pisikal, intelektwal, ug sosyal nga paagi. Ang nagkalain-laing mga kategoriya sa kalihokan diha sa website nagpalig-on sa daghang oportunidad nga angay natong gihatatag sa atong kabatan-onan.”
Ang mga kalihokan sa site nagpalambo sa pagkat-on sa ebanghelyo pinaagi sa pagkonektar sa mga kalihokan ngadto sa mga baruganan nga nakat-unan sa mga batan-on diha sa mga leksyon sa Dominggo ug sa Katungdanan ngadto sa Dios ug sa Personal nga Kauswagan.
Samtang ang mga batan-on, mga lider, ug mga pamilya magtinabangay sa pagplano ug pagbuhat og mga kalihokan nga nagdapit sa tanang batan-on sa pagduol ngadto kang Kristo, ang nagtubo nga henerasyon mamahimong mas andam sa pagtuman sa buhat sa Ginoo dinhi sa yuta.
Fun 5K
Paghimo og 5K nga pagdagan o paglakaw alang sa kabatan-onan ug sa komunidad.
Mga pamatasan sa pagsayaw
Hisguti ug ipakita ang hustong mga pamatasan sa pagsayaw.
Mga kahanas nga atong gamiton sa pagserbisyo
Pagkat-on og bag-ong mga kahanas ug dayon gamiton kini sa pagserbisyo sa uban.
Pasundayag sa Talento
Pagplano og usa ka pasundayag sa talento sa ward o sa kabatan-onan.
Missionary open house
Pagplano, pag-andam, ug pagpahibalo sa publiko og missionary open house, kultural nga kalihokan, o laing kalihokan diha sa lokal nga meetinghouse.
SA WALA: PAGHULAGWAY SA LITRATO PINAAGI SA Wavebreakmedia Ltd/Lightwavemedia/Thinkstock