Ang Buhat sa Kaluwasan Kaniadto ug Karon
Ni Elder L. Whitney Clayton
Sa Kapangulohan sa Seventy
Ang lima ka responsibilidad kabahin sa buhat sa kaluwasan dili na bag-o para niini nga dispensasyon. Kini gitudlo ug gibuhat na panahon sa Basahon ni Mormon.
Namulong sa ulahing mga adlaw ug sa gipadayag nga kamatuoran nga molukop sa kalibutan, si Nephi nanagna nga ang katawhan “[masayud] sa ilang Manunubos ug ang mga katuyoan sa iyang doktrina, nga sila masayud unsaon pagdangop ngadto kaniya ug maluwas” (1 Nephi 15:14; tan-awa usab sa Moises 7:62). Agi og katumanan sa panagna ni Nephi, ang Simbahan karon nagtinguha sa pagtabang sa mga lalaki ug babaye sa tibuok kalibutan sa pagkat-on ug pagtukod sa ilang kinabuhi diha sa doktrina sa Manluluwas aron sila moduol Kaniya ug maglakaw sa dalan sa kaluwasan.
Ang buhing mga propeta ug mga apostoles nagtudlo kanato nga “ang mga miyembro sa Simbahan ni Jesukristo gipadala ‘sa paghago diha sa iyang ubasan alang sa kaluwasan sa mga kalag sa mga tawo’ (D&P 138:56). Kini nga buhat sa kaluwasan naglakip sa miyembro nga misyonaryo nga buhat, retensyon sa kinabig, pagpaaktibo sa dili kaayo aktibo nga mga miyembro, buhat sa templo ug family history, ug sa pagtudlo sa ebanghelyo.”1
Ang Basahon ni Mormon nagpakita nga ang mga miyembro sa Simbahan sa karaang panahon naghatag og gibug-aton sa “misyonaryo nga buhat, retensyon sa kinabig, pagpaaktibo sa dili kaayo aktibo nga mga miyembro, buhat sa templo ug family history, ug pagtudlo sa ebanghelyo” usab. Ang katinuod nga kining mahinungdanong responsibilidad sa mga miyembro nagpabiling wala mausab sa tanang dispensasyon maoy gamhanang saksi nga nagkumpirma nga ang Dios dili mausab ug Siya nahigugma sa tanan Niyang mga anak, bisan asa ug bisan kanus-a sila nabuhi.
Misyonaryo nga Buhat
Ang Basahon ni Mormon klarong nagtudlo sa doktrina nga maoy sukaranan sa misyonaryo nga buhat. Sama pananglit, si Nephi misulat nga “kon kamo mosunod sa Anak, uban ang hingpit nga katuyoan sa kasingkasing, sa walay pagpakaaron-ingnon ug walay pagpanglimbong sa atubangan sa Dios, apan uban sa tinuod nga katuyoan, maghinulsol sa inyong mga sala, magsaksi ngadto sa Amahan nga kamo andam sa pagdala diha kaninyo sa ngalan ni Kristo, pinaagi sa bunyag—oo, pinaagi sa pagsunod sa inyong Ginoo ug inyong Manluluwas ngadto sa tubig, sumala sa iyang pulong, tan-awa, unya kamo makadawat sa Espiritu Santo; oo, unya mosunod ang bunyag sa kalayo ug sa Espiritu Santo” (2 Nephi 31:13; tan-awa usab sa 3 Nephi 11:31–40; 27:13–22).
Sa ingon, kini dili ikatingala nga adunay mga makapaukyab nga mga asoy sa misyonaryo nga buhat diha sa Basahon ni Mormon. Sama pananglit, ang tanang anak ni Mosiah midumili sa pagdawat sa mga responsibilidad nga may kalabutan sa pag-alagad isip hari sa mga Nephite, ug hinoon sila miadto ngadto sa yuta sa Nephi aron sa pagsangyaw sa ebanghelyo ngadto sa mga Lamanite, kinsa mao ang pintas nga mga kaaway sa mga Nephite. Ang ilang misyon milungtad og mga 14 ka tuig, ug liboan ang nagpamiyembro sa Simbahan isip mga kinabig. (Tan-awa sa Mosiah 28; Alma 17–27.)
Nagsunod sa panig-ingnan sa misyonaryo nga buhat diha sa Basahon ni Mormon, ang Simbahan karon adunay misyonaryo nga paningkamot nga dili matupngan sa bisan unsang panahona sa kasaysayan niini.
Retensyon sa Kinabig
Si Nephi misulat kabahin sa pagdasig sa bag-ong mga miyembro nga magpabiling aktibo sa ebanghelyo aron sila makadawat og kinabuhing dayon:
“Human kamo makasulod niini nga higpit ug pig-ot nga dalan, ako mangutana kon ang tanan natuman ba? Tan-awa, ako moingon nganha kaninyo, wala; kay kamo wala pa makaabut niini nga gilay-on gawas kon kini pinaagi sa pulong ni Kristo uban sa dili matarug nga hugot nga pagtuo diha kaniya, mosalig sa hingpit diha sa mga maayo nga buhat kaniya kinsa gamhanan sa pagluwas.
“Busa, kamo kinahanglan gayud mopadayon sa unahan uban ang pagkamakanunayon kang Kristo, magbaton sa usa ka hingpit nga kahayag sa paglaum, ug usa ka gugma sa Dios ug sa tanan nga mga tawo. Busa, kon kamo mopadayon sa unahan, magbusog sa pulong ni Kristo, ug molahutay hangtud sa katapusan, tan-awa, sa ingon miingon ang Amahan: Kamo makabaton og kinabuhi nga dayon” (2 Nephi 31:19–20).
Ang mga lider sa Simbahan sa panahon sa Basahon ni Mormon naghimo og piho nga mga lakang sa pagtabang sa bag-ong mga miyembro nga magpabilin sa higpit ug pig-ot nga dalan. Nakakita sa atong panahon ug nasayud nga kita moatubang sa susamang mga hagit (tan-awa sa Mormon 8:35), si Moroni milakip sa iyang pagsulat pipila sa mga praktis alang sa pagtabang sa bag-ong mga miyembro nga magpabiling matinud-anon sa ilang mga pakigsaad:
“Ug human sila madawat ngadto sa bunyag, ug nabag-o ug nahugasan pinaagi sa gahum sa Espiritu Santo, sila giihap uban sa mga katawhan sa simbahan ni Kristo; ug ang ilang mga ngalan gikuha, nga sila mahinumduman ug maamumahan pinaagi sa maayo nga pulong sa Dios, aron pag-agak kanila sa matarung nga agianan, pag-agak kanila sa kanunay nga mabinantayon ngadto sa pag-ampo, mosalig lamang diha sa mga maayo nga buhat ni Kristo, kinsa mao ang tigpasiugda ug ang tighingpit sa ilang hugot nga pagtuo.
“Ug ang simbahan nagtigum kanunay, sa pagpuasa ug sa pag-ampo, ug sa pagpakigsulti sa usag usa mahitungod sa kaayohan sa ilang mga kalag”. (Moroni 6:4–5).
Ang Simbahan karon nagsunod sa sumbanan sa pagpabiling aktibo sa kinabig sa Basahon ni Mormon diha sa atong mga konseho sa ward, mga korum sa priesthood ug sa ubang mga organisasyon.2
Pagpaaktibo sa Dili Kaayo Aktibo nga mga Miyembro
Paingon sa katapusan sa iyang pangalagad, si Alma mibati sa grabeng kagul-anan mahitungod sa espirituhanong kaayohan sa grupo sa mga masupilon gikan sa Simbahan kinsa mitawag sa ilang kaugalingon og mga Zoramite. Ang Basahon ni Mormon naghisgot nga “iyang kasingkasing pag-usab misugod sa pagkasakit tungod sa kadautan sa mga katawhan.
“Kay kini ang hinungdan sa dako nga kasubo ni Alma nga masayud sa kadautan taliwala sa iyang mga katawhan; busa ang iyang kasingkasing hilabihan ka masulub-on tungod sa pagkabulag sa mga Zoramite gikan sa mga Nephite” (Alma 31:1–2).
Si Alma mipasiugda sa paningkamot sa pagbawi sa mga Zoramite. Siya mipili og matinud-anong mga kompanyon ug nag-ampo para sa iyang kaugalingon ug sa iyang mga kompanyon alang niining buhat, naghangyo sa Dios sa “paghupay sa ilang mga kalag diha kang Kristo,” paghatag kanila og kalig-on aron mabuntog ang mga kalisdanan sa ilang mga buluhaton, ug paghatag nila og “kalampusan sa pagdala [sa mga Zoramite] pagbalik ngadto [sa Amahan] diha kang Kristo” (Alma 31:32, 34). Siya dayon mihatag og mga panalangin sa priesthood sa iyang mga kompanyon, ug ilang gisugdan ilang mga buluhaton (tan-awa sa Alma 31:36).
Sa dihang ang nabanhaw nga Ginoo personal nga nangalagad sa mga katawhan sa Bountiful, Siya mitudlo sa Iyang pinili nga mga disipulo nga kanunay magtinguha sa pagluwas niadtong nalayo sa higpit ug pig-ot nga dalan. Siya miingon, “Ngadto kanila kamo magpadayon sa pag-alagad; kay kamo wala masayud apan unsa sila mobalik ug mohinulsol, ug moduol ngari kanako uban sa hingpit nga katuyoan sa kasingkasing, ug Ako moayo kanila; ug kamo mao ang hinungdan sa pagdala og kaluwasan ngadto kanila” (3 Nephi 18:32).
Ang mga paningkamot sa Simbahan karon mao ang pagdasig og pagtuo diha sa mga kasingkasing sa dili kaayo aktibo nga mga miyembro sumala sa mga pagtulun-an sa Manluluwas ug sa mga propeta nga narekord diha sa Basahon ni Mormon.
Ang Buhat sa Templo ug Family History
Human ang mga Nephite mibulag sa mga Lamanite, sila mitukod og templo. Si Nephi mirekord: “Ug ako, si Nephi, mitukod og usa ka templo; ug ako mitukod niini sama sa templo ni Solomon gawas lamang nga kini wala mahimo sa daghan nga mahalon nga mga butang; kay sila dili makaplagan dinhi sa yuta, busa, kini dili matukod nga sama ngadto sa templo ni Solomon. Apan ang matang sa pagkahimo niini sama gayud sa templo ni Solomon; ug ang pagkabuhat niini hilabihan kaanindot (2 Nephi 5:16).
Ang Basahon ni Mormon nagrekord nga si Jacob, Haring Benjamin, Alma ug Amulek nagtudlo diha sa templo (tan-awa sa Jacob 1:17; Mosiah 1:18; Alma 16:13). Ang basahon ni Alma ug Helaman may pakisayran sa nagkalain-laing mga templo taliwala sa mga katawhan (tan-awa sa Alma 16:13; Helaman 3:9).
Ang Manluluwas mipili sa templo sa Bountiful isip dapit alang sa Iyang pagpakita sa nahabiling mga Nephite ug Lamanite human sa Iyang Pagkabanhaw (tan-awa sa 3 Nephi 11:1). Siya misiguro usab nga ang doktrina kabahin sa buhat sa family history natudlo sa mga tawo. Siya mikutlo ni Malaquias mahitungod sa ulahing mga adlaw nga pagpakita ni Elijah, nag-ingon:
“Tan-awa, Ako mopadala kaninyo ni Elijah ang propeta sa dili pa moabut ang mahinungdanon ug makalilisang nga adlaw sa Ginoo;
“Ug siya mopabalik sa kasingkasing sa mga amahan ngadto sa mga anak, ug ang kasingkasing sa mga anak ngadto sa ilang mga amahan, tingali unya Ako moabut ug mohampak sa yuta uban sa usa ka tunglo” (3 Nephi 25:5–6).
Ang Basahon ni Mormon adunay daghang pakisayran sa pagtipig og mga family history. Si Lehi mipadala sa iyang mga anak balik ngadto sa Jerusalem aron sa pagkuha sa palid nga tumbaga, nga naglangkob sa “talaan sa mga Judeo ug usab ang kasaysayan sa [iyang] mga katigulangan” (1 Nephi 3:3). Ang basahon ni Esther mihan-ay sa mga ngalan sa nagpuli-puli nga mga hari ug, kon gikinahanglan, ilang mga igsoon ug mga anak, nagpakita nga ang halapad nga mga rekord sa family history gitipigan sa mga tawo.
Ang mga proyekto sa Simbahan sa templo ug family history sa tibuok kalibutan nahiuyon sa mga pagtulun-an sa Basahon ni Mormon.
Pagtudlo sa Ebanghelyo
Ang ebanghelyo ni Jesukristo gitudlo sa tibuok Basahon ni Mormon. Tingali kining mga pulong ni Nephi makapasabut sa diwa niining matinud-anong pagtudlo ug sa sagradong katuyoan niini: “Kami naghisgot kang Kristo, kami nalipay diha kang Kristo, kami nagsangyaw kang Kristo, kami nanagna kang Kristo, ug kami nagsulat sumala sa among mga panagna, nga ang among mga anak mahimo nga masayud sa unsa nga tinubdan sila mahimo nga mangita alang sa kapasayloan sa ilang mga sala” (2 Nephi 25:26).
Daghan sa talagsaong mga pagtulun-an diha sa Basahon ni Mormon gikan sa mga ginikanan nga nagtudlo sa ilang mga anak. Hunahunaa si Lehi nga nagtudlo ni Jacob kabahin sa “katugbang sa tanan nga mga butang” (2 Nephi 2:11) o si Alma nagtudlo ni Corianton nga ang “pagkadautan dili mahitabo nga mahimo nga kalipay” (Alma 41:10) o sa batan-ong manggugubat nga “gitudloan sa ilang mga inahan, nga kon sila dili magduha-duha, ang Dios moluwas kanila” (Alma 56:47).
Ang lima ka mga responsibilidad sa buhat sa kaluwasan dili na bag-o sa kalibutan niining katapusang dispensasyon. Kini gitudlo ug gibuhat sa mga panahon sa Basahon ni Mormon ug kanunayng kabahin sa mga “katuyoan sa doktrina [ni Kristo]” (1 Nephi 15:14).
Mga paghulagway pinaagi ni Dan Burr