Mga Profile sa Young Adult
Panaghiusa sa Kultura diha sa Toronto
Ang tagsulat nagpuyo sa Utah, USA.
Unsa ang bation nga mahimong matinud-anong young adult sa Ontario, Canada? Usa ka young adult mipakigbahin sa iyang kultura ug pagtuo.
Nahimutang sa tunga-tunga sa Toronto, Canada, ang Kensington Market nagpakita sa lain-laing kultura sa tibuok kalibutan. Sa mga pig-ot nga dalan naglaray ang mga tindahan ug mga restawran nga nagpakita sa mga pagkaon sa daghang mga kultura—Salvadorian, Mexican, Peruvian, ug French, sa pangpagana. Sa bisan asa nga suok, makakita mo og basket nga mga hayag ang kolor nga adunay mga prutas ug utanon, mga lamesa nga adunay init, flaky nga mga pastries, ug hayag nga tradisyonal nga mga sinina sa lain-laing kultura.
Ang lain-laing mga kultura sa Toronto naglangkob sa mga milalin, mga lumad, mga namakwit, ug mga estudyante. Si Jonathan Porter, 25 anyos nga young adult nga nagpuyo sa Toronto, miingon, “Ang pagserbisyo kauban ang mga miyembro gikan sa lain-laing mga background sa akong ward nakatabang nako nga makita ang kalainan sa mga kultura nga nagpalibut nako—lakip na ang akong Canadian nga kultura—ug ang kultura sa ebanghelyo. Nindot nga makita nga ang matag kultura nakapalambo og mga hiyas nga gitudlo sa ebanghelyo nga matarung. Kini gidasig sa Espiritu Santo, nga nakatabang sa mga tawo nga makasabut sa usag usa ug milabaw pa sa ilang kaugalingong kultura.”
Nakita usab ni Jonathan ang impluwensya sa ebanghelyo sa ilang mga tahas sa pagpangulo: “Bisan tuod ang mga lider adunay lain-laing mga estilo sa pagpangulo base sa ilang kultura, kini dili igsapayan. Sila gi-call sa Dios pinaagi sa pagpadayag sumala sa awtoridad sa priesthood, ug sila napanalanginan.”
Para kang Jonathan, ang institute nagtanyag og usa ka butang nga iyang gibahandi: “Nagtubo sa Toronto, wala koy daghang kaedad nga mga miyembro sa Simbahan, busa mobati ko nga luwas ug giabi-abi sa institute. Kami nagkahiusa sa among gugma sa ebanghelyo. Ang ubang mga tawo nakamatikod sa among pagpakabuhi, nakakita sa among mga sumbanan, ug nakaila nga kami talagsaon.”
Ang mga kasinatian ni Jonathan nagtudlo niya sa kaimportante sa gugma nga putli, “ang tiunay nga gugma ni Kristo” (Moroni 7:47). “Ang mga young adult sa institute lahi gayud, dili kanunay nga natural mohigugma sa usag usa,” siya miingon. “Akong nakat-unan nga ang gugma nga putli nagpasabut sa pagserbisyo sa uban, bisan sa ginagmay nga paagi, ug paghigugma kanila bisan asa man sila gikan.”
Kini nga gugma ug pagkalain-lain sa kultura nakapanalangin sa misyonaryo nga buhat. “Daghan kaayong mga tawo dinhi mga una o ikaduha nga henerasyon nga mga kinabig. Usahay ang mga tawo magpamiyembro sa Simbahan dinhi ug mobalik sa ilang mga nasud ug ipakigbahin ang ebanghelyo ngadto sa ilang mga pamilya ug makalig-on sa ilang mga kultura. Para kanako, kana ang kabilin sa Simbahan sa Toronto.”
MGA LITRATO PINAAGI NI Kevan Ashworth