Mga Sister diha sa Pakigsaad
Isip mga disipulo ni Jesukristo, kitang tanan adunay mga sister kinsa naghigugma ug nagsuporta kanato—bisan unsa pay sitwasyon sa atong pamilya.
Ang akong unang Dominggo isip estudyante sa Paris, France, natingala ko sa lain-laing mga tawo sa akong bag-o nga ward. Ang nag-conduct sa Relief Society kay usa ka matahum nga babaye gikan sa Eastern Europe. Pipila sa mga sister gikan sa West Africa mabinationg mipahulam nako sa ilang hymnbook. Usa ka Asian nga babaye kinsa gihagoan og maayo paghubad iyang leksyon ngadto sa French nagtudlo sa usa sa labing makatandog sa kasingkasing nga leksyon nga akong nadungog sukad. Bisan og ako usa ka batan-ong Amerikana nga nagpuyo 5,000 ka milya (8,045 km) gikan sa akong lungsod nga natawhan, mibati ko nga daw anaa ra sa panimalay taliwala sa buotang mga babaye sa Simbahan. Kami gikan sa France, Cambodia, Ivory Coast, Ukraine, ug sa Estados Unidos—apan dili ra igsapayan ang kalainan sa edad ug kultura. Usa ka diwa sa panag-igsoonay naghiusa kanamo.
Atol sa akong unang tuig sa kolehiyo, nakaamgo ko sa unang higayon sa sobrang kadaghan nga kaila nga mga sister nga nalakip ko. Nagtubo ko nga walay tinuod nga mga igsoong babaye, mao nga usahay mibati ko nga ako walay klaro nga ideya sa kahulugan sa panag-igsoonay sa kababayen-an. Samtang mapasalamaton ko sa akong talagsaong ginikanan ug igsoong mga lalaki, naghandum gihapon ko og igsoong babaye kang kinsa ko mopakigbahin, mokatawa ug mosinati sa kinabuhi. Hinoon, ako nakakat-on nga mosalig sa mga sister nga akong nakaplagan diha sa “pagkahiniusa sa pagtuo” (Mga Taga-Efeso 4:13). Daghan nga mga kasinatian nagtudlo kanako nga ako makasalig niini nga mga matinud-anong mga babaye—tungod sa ebanghelyo ni Jesukristo, ako adunay mga igsoong babaye!
Ang kalibutan nagtudlo kanato nga kalainan sa pamilya, henerasyon, kultura, o personalidad makapalayo nato sa usag usa. Sa pagkatinuod, ang mga sister nagkahiusa pinaagi sa gugma, serbisyo, ug sa atong balaanong panulundon isip mga anak sa Langitnong Amahan. Kining panaghiusa nakatabang nato sa pagtuman sa atong mga pakigsaad sa bunyag. Kita nagsaad nga “matinguhaon sa pag-ipon ngadto sa panon sa Dios, ug pagatawgon nga iyang mga katawhan, ug andam sa pagtambayayong sa usag usa nga mga alantuson, nga sila mahimo nga magaan;
“Oo, ug mga andam sa pagbangutan uban niadto nga nagbangutan; oo, sa paghupay niadto nga nagkinahanglan sa kahupayan, ug mobarug ingon nga mga saksi sa Dios sa tanan nga mga panahon ug diha sa tanan nga mga butang, ug diha sa tanan nga mga dapit nga kamo mahimo nga maanaa” (Mosiah 18:8–9).
Moipon ngadto sa Panon sa Dios
Ang mga sister nagtinabangay sa usag usa sa pagtuman niadtong mga pakigsaad sa bunyag sa daghang paagi. Si Ting Chang sa Taiwan “[miipon] sa panon sa Dios” samtang anaa sa high school. Tungod ang iyang pamilya anaa sa pinansyal nga kalisdanan, dili na lang maniudto si Ting aron makatigom para ibayad sa gasto sa pamilya, si Jina, usa ka klasmeyt, nakamatikod niini. Ang mama ni Jina nagsugod sa pag-andam og sobrang pagkaon matag adlaw sa paniudto para ipakigbahin ngadto ni Ting. Sa wala madugay gidapit ni Jina iyang mga higala sa pagsimba uban kaniya. Ang mama ni Jina bag-ohay lang nagpamiyembro sa Simbahan, ug si Jina naminaw sa mga leksyon sa misyonaryo. Para kang Ting, ang ehemplo sa gugmang putli nga gipakita niining mga babaye gamhanan, ug siya nagsugod na usab sa pagpatudlo sa mga misyonaryo.
Magdungan, silang Ting ug Jina mobasa sa mga kasulatan ug maghupot og journal sa ilang sagrado nga mga kasinatian. Ang ilang kasuod sa panag-igsoonay sa kababayen-an nagkalig-on sa dihang sila nagpabunyag sa samang adlaw. Karon, silang duha nagserbisyo og full-time nga misyon aron sa pagpakatap sa kalipay sa ebanghelyo ni Jesukristo. Sila si Jina, iyang inahan, ug si Ting nahimong managsuong babaye pinaagi sa pagsunod sa mga sumbanan sa Dios ug sa pagpamatuod sa Iyang ngalan.
Motabang sa mga Palas-anon sa Uban
Ang mahigugmaong pagserbisyo mao ang laing timailhan sa tinuod nga panag-igsoonay sa kababayen-an. Ang manggiloy-ong pagserbisyo ug ang visiting teaching mao ang mga pamaagi sa Simbahan alang niana nga pagserbisyo. Si Jacqueline Soares Ribeiro Lima sa Brazil misaysay kon giunsa sa duha ka visiting teacher sa pagpanalangin sa iyang kinabuhi ug sa iyang pamilya human siya nahiling nga adunay bipolar disorder ug mibati nga dili na kanunayng makasimba: “Ang akong bana, si Vladimir, gibuhat ang tanan sa pagtabang nako atol sa pinakalisud nga bahin sa sakit. Siya nag-inusarang nagsagubang sa lisud nga sitwasyon—hangtud duha ka talagsaon nga mga babaye gi-call isip akong mga visiting teacher.”
Kining duha ka babaye, sila si Rita ug Fátima, mipakita sa ilang gugma pinaagi sa pagkat-on og dugang kabahin sa disorder ug pagsuporta sa pamilya ni Jacqueline. Siya kanunay mibati sa ilang tinuod nga interes ngadto kaniya. Ang ilang pagserbisyo naglakip sa pag-host og gamay nga party alang kang Jacqueline ug pagpanahi og sinina alang sa iyang anak nga babaye. Sa katapusan, ang kinasingkasing nga mga kabalaka nila ni Rita ug Fátima nakatabang ni Jacqueline sa espirituhanong paagi, ug siya mibalik sa regular nga pagsimba, inabagan sa ilang kalig-on.
Ang mga palas-anon sa atong mga sister ma-pisikal man, emosyonal, o espiritwal, talagsaon nga kita makatabang inubanan sa gugma ngadto sa gikapoy nga batan-ong inahan, sa maulawon nga bag-ong Beehive, ang nag-inusara nga tigulang nga babaye, ang nabug-atan sa respnsibilidad nga presidente sa Relief Society. Ang mga babaye sa pakigsaad “malipay diha sa pagpangalagad ug maayong mga buhat”1 ug sa ingon nangita ug nagtabang sa ilang mga sister kinsa nasubo o gikapoy.
Mobangutan uban Niadtong Nagbangutan
Ang mga babaye nga may hugot nga pagtuo nagsunod sa ehemplo sa Manluluwas sa higayon nga sila motabang nga may kalumo. Tingali wala nay mas maayo nga ehemplo diha sa kasulatan kabahin sa dili hinakog nga gugma kay ni Naomi sa Bethlehem ug sa iyang umagad nga babaye nga si Ruth nga taga-Moab. Si Ruth mipili sa pagserbisyo sa iyang ugangan nga babaye human namatay ang bana ug mga anak ni Naomi. Sa kasubo, si Naomi mihukom nga mobalik sa iyang nasud nga natawhan. Bisan tuod kini nga mga babaye gikan sa lain-laing mga kultural ug relihiyosong kaagi, sila nahimong mga higala samtang sila nagsuporta sa usag usa sa matarung nga pagpakabuhi ug nagtinabangay sa mga pagsulay.
Ang ehemplo ug ang pagserbisyo ni Ruth talagsaon kaayo nga ang pagbangutan ni Naomi nahimong kalipay sa panalangin niya niining buotan nga umagad nga babaye ug sister diha sa ebanghelyo. Ang ilang kasuod lig-on kaayo nga ang ubang mga babaye, nakakita sa ilang gugma sa usag usa, miingon, “Bulahan ang Ginoo, nga … [gihatag kanimo] imong binalaye, nga nahigugma kanimo, ang labi pang maayo kanimo kay sa pito ka mga anak nga lalaki” (Ruth 4: 14–15).
Mohupay Niadtong Nagkinahanglan og Kahupayan
Usa ka mubo nga sulat gikan sa usa ka sister sa iyang ward mihupay ni Raihau Gariki sa Tahiti, kinsa gi-call isip magtutudlo sa Relief Society usa lang ka bulan human siya nag-18 anyos. Nakulbaan siya sa pagtudlo sa “mga inahan ug mga lola, mga babaye kinsa daghan na kaayo og nahibaloan, daghang naatubang mga pagsulay, ug nakasinati na og daghang mga butang.” Human sa iyang unang leksyon, siya nakadawat og “usa ka mubo nga sulat nga puno sa gugma” gikan sa usa ka babaye diha sa klase. Kining mubo nga sulat nakapalig-on sa iyang pagsalig sa kaugalingon, ug iya kining gipapilit sa iyang journal aron makatabang niya sa lisud nga mga panahon.
Ang mga sister diha sa ebanghelyo mohupay ug motabang sa usag usa panahon sa kalisud. Si J. Scott Featherstone, usa ka presidente sa stake sa Utah, nahinumdom nga gikuyugan iyang asawa sa pagbisita sa usa ka babaye diha sa ilang stake kansang bana bag-o lang namatay. “Gigakos siya sa akong asawa, mihilak silang duha ug mihupay kaniya hangtud mibati siya nga gihigugma.” Usahay ang panag-igsoonay sa kababayen-an ingon ana lang ka yano.
Mobarug isip mga Saksi sa Dios
Adunay dakong impluwensya nga mabati kon ang kababayen-an sa tanang kapanahonan maghiusa sa “pagbarug alang sa kamatuoran ug pagkamatarung.”2 Ang atong panag-igsoonay sa kababayen-an diha sa ebanghelyo ni Jesukristo makapalig-on kanato, dili igsapayan sa sitwasyon nga atong giatubang sa nagkadautan nga kalibutan. Bisan ang batan-on kaayong babaye makabarug isip saksi: Jessica Vosaniyaqona sa California, USA, gitudloan sa ebanghelyo pinaagi sa sayis anyos nga batang babaye sa iyang klase sa Primary, kinsa mipahinumdom ug mipamatuod kaniya sa kaimportante sa pamilya.
Ang tigulang nga mga sister importante nga mga ehemplo usab. Si Kimm Frost gikan sa Utah nakahinumdom sa daghan nga mga babaye kinsa nakaimpluwensiya kaniya nga magpabiling lig-on sa ebanghelyo, lakip na ni Ursula Squires. Si Kimm mihatag og gibug-aton: “Si Sister Squires nahimo nakong visiting teaching kompanyon sa dihang maayo pa iyang panglawas sa mga 90 anyos pa siya. Siya dili kaayo makakita o makadungog, apan siya hingpit nga mapahinunguron sa ebanghelyo. Siya wala gayud makapalta og simba ug matinud-anon niyang gibuhat ang visiting teaching. … Siya usa ka inspirasyon kanako.” Pinaagi man sa ehemplo o pinaagi sa pagpakigbahin sa pagpamatuod, ang mga sister mahimong magkahiusa nga mga disipulo sa Agalon.
Ang mga sister sa Simbahan sa Dios
Ako tinud-anayng nakakaplag og mga sister samtang nagtan-aw ko sa mga babaye nga “mobarug ingon nga mga saksi sa Dios sa tanan nga mga panahon ug diha sa tanan nga mga butang, ug diha sa tanan nga mga dapit” (Mosiah 18:9). Ako adunay oportunidad sa pagserbisyo og full-time nga misyon. Sa dihang miabut ang akong calling sa pagserbisyo sa Utah Salt Lake City Temple Square Mission—ang bugtong misyon sa Simbahan nga tanan mga babaye—ako moangkon nga gikulbaan nga gilibutan sa daghan kaayong mga babaye. Dili nako angay mabalaka. Ang akong pagpamatuod sa panag-igsoonay sa kababayen-an milambo pag-ayo samtang makig-istorya ko sa daghan kaayong mga babaye kinsa mipamatuod sa Manluluwas sa ilang inadlaw-adlaw nga panglihok.
Ang akong unang gabii sa Pasko sa misyon, ang presidente sa misyon nako mipundok sa tanang mga sister aron magtan-aw og makapadasig nga salida. Usa ka higayon, ang salida nagpakita sa duha ka sister nga nagtinabangay sa usag usa sa pagbuntog sa makahadlok nga mga sirkumstansya. Natandog ko sa ilang panaghiusa. Samtang nagtan-aw ko sa salida ug sa tanang madasigon nga mga misyonaryo nga sister, ang Espiritu mipamatuod nako nga ang panag-igsoonay sa kababayen-an usa ka mahangturon nga relasyon nga gihan-ay sa atong Langitnong Amahan, ug ako kabahin niana. Pagkatalagsaon nga kamatuoran: kita wala mag-inusara, kay kitang tanan gihatagan sa Ginoo og mga sister.
Ang tagsulat nagpuyo sa Utah, USA
Litrato sa mga babaye sa Democratic Republic of Congo pinaagi ni Howard Collett