Napulo ka mga Sekreto sa Tinuod nga Pagkainila
Ang tagsulat nagpuyo sa Washington, USA.
Asa ko makakita sa mga sekreto sa pagkainila? Sa Bag-ong Tugon?
“Kami ang numero uno!” misinggit ang cheerleader sa usa ka dula sa football sa high school. Nakadayeg ko sa iyang tul-id nga ngipon ug hingpit nga pahiyom. Nagtan-aw ko samtang siya mikatawa ug nakig-istorya ngadto sa mga babaye ug nag-ibid-ibid ngadto sa mga lalaki.
“Nindot siguro kaayo ang mahisama kaniya,” naghunahuna ko, namalandong sa kaugalingon nakong kamingaw. Ang trabaho sa akong amahan nagkinahanglan namo sa pagbalhin sa matag tulo ngadto sa lima ka tuig, mao nga lisud alang sa akong igsoong babaye ug kanako ang paghulma og malungtarong panaghigalaay.
Ang cheerleader nabantug na sa dili tarung nga sininaan ug sa pag-inom sa mga party. Nagtan-aw kaniya, misugod ko sa pagpangandoy sa pagkainila nga sa akong pagtuo iyang girepresentar. Gusto gyud kaayo nako og mga higala nga sa usa ka mubo kaayong higayon nakahunahuna ko kon ako ba nga ipaubos ang akong mga sumbanan aron mahimong sama kaniya.
Samtang ang akong igsoong babaye ug ako mipauli, ako naglunang sa kalooy sa kaugalingon, ug nag-ampo ko sa akong kasingkasing ngadto sa Langitnong Amahan. Mihangyo ako Kaniya sa pagsulti kanako sa sekreto nga mowagtang sa akong kamingaw ug kawalay kasiguroan. Bisan tuod dili ko miyembro sa Simbahan niini nga panahon, aduna koy lig-on nga pagtuo sa Dios.
Diha-diha dayon misulod sa akong hunahuna ang ideya, “Hunonga ang paghunahuna sa imong kaugalingon.”
“Kana mao ang sekreto?” Naghunahuna ko nga nasagmuyo. “Sa unsang paagi kana makatabang kanako nga mahimong inila?”
Sa wala madugay nianang semana, nakabasa ko kabahin sa gugmang putli diha sa 1 Mga Taga-Corinto 13. Kini nakatabang kanako nga makasabut nga ang Langitnong Amahan naningkamot sa pagtudlo kanako nga magbaton og gugma nga putli ngadto sa uban kay sa mag-focus kon giunsa ko nila pagtagad. Akong gisunod ang mga kinaiya sa gugmang putli nga gilista didto. Sa dihang gibuhat ko kini, akong nakita nga ang tibuok nakong kasinatian sa eskwelahan nausab. Ania ang pipila sa mahinungdanong mga butang nga akong nakat-unan.
Ang Gugma nga Putli Mainantuson
Naningkamot ko nga mahimong mas mapailubon sa mga tawo sa eskwelahan. Usa ka batang lalaki mibugal-bugal kanako atol sa klase sa gym, apan naningkamot ko nga tugbangan ang iyang bati nga batasan sa pagkamabination ug pahiyum. Nadugay mihunong na siya sa pagsungog kanako. Sa katapusan sa tuig, kami nahimong maayong managhigala.
Ang Gugma nga Putli Mabination
Ako kanunay midayeg sa usa ka batang babaye sa akong klase kinsa mahigalaon ngadto sa tanan, inila man kini o dili. Misugod ako sa pagsunod sa iyang ehemplo ug nangita og mga oportunidad sa pagpakita sa pagkamabination ngadto sa uban.
Ang Gugma nga Putli Dili Masinahon
Ang akong igsoong babaye ug ako nasina sa talento sa usa ka basketbolista sa among eskwelahan, ug naandan na namo nga mosulti og makainsulto nga butang mahitungod kaniya. Nakahukom ko nga magmaya hinoon sa iyang mga kadaugan. Misugod usab ko sa pagpalambo sa akong kaugalingong mga talento. Sa dihang ako kining gibuhat, nawala ang akong pait nga palas-anon, ug ako mas nagmalipayon.
Ang Gugma nga Putli Dili Manghambog
Usahay ako naghunahuna nga mas maayo ko kay sa ubang mga tawo tungod kay ako nagsunod og mas taas nga moral nga mga sumbanan. Sa dihang ako naghunahuna kabahin sa Manluluwas, kinsa maaghup ug nahigugma sa tanan nga mga katawhan, mihukom ko nga usbon ang akong kinaiya. Samtang ako naningkamot nga mahimong mapainubsanon ug mabination, ang mga tawo misugod sa pagpaningkamot nga mahimong akong higala.
Ang Gugma nga Putli Dili Bastos
Nahigugma ko sa Ginoo ug adunay taas nga moral nga mga sumbanan. Nakahukom ko nga ang pagkompromiso niining mga sumbanan makahimo nakong magul-anon.
Ang Gugma nga Putli Dili Dali Masuko
Kausa, ang magtutudlo mihimo og komentaryo nga nakapasakit kanako. Imbis moreklamo, ako siyang gipangutana kon bati ba ang iyang adlaw. Siya miangkon niini ug dayon nangayo og pasaylo. Kadto nga mga komentaryo gikan sa iyang personal nga mga problema ug walay labut kanako.
Ang Gugma nga Putli Maglipay diha sa Kamatuoran
Usa ka butang nga gitudlo kanako sa akong mga higala nga mga Santos sa Ulahing mga Adlaw mao nga ang pagpanglibak ug pagpakatap og mga bakak dautan. Ako naningkamot nga makalikay sa paglibak ug miusab sa hilisgutan sa matag higayon nga adunay mosugod sa pagsulti og mga butang nga dili mabination.
Ang Gugma nga Putli Matuohon sa Tanan nga mga Butang, Molaum sa Tanan nga mga Butang
Misugod ko sa pagtan-aw sa kaayo sa mga tawo ug nahimong positibo. Sa dihang gihimo ko kini nga kausaban sa kinaiya, ang mga tawo misugod sa pagbati nga nabayaw naglibut kanako. Kini mihimo kanila nga gustong makig-uban kanako kanunay.
Ang Gugma nga Putli Molahutay sa Tanan nga mga Butang
Sa dihang seryusong nasakit ang akong igsoong babaye ug nawad-an sa iyang katakus nga molakaw nga normal, daghan sa iyang mga higala mibiya kaniya tungod kay kataw-anan siyang molakaw. Akong nakita ang iyang kasakit, ug akong naamgohan ang kaimportante sa pakig-unong sa mga tawo atol sa lisud nga mga panahon.
Ang Gugmang Putli Dili Gayud Mapakyas
Sa dihang migamit ko og gugma nga putli sa akong mga pakigrelasyon, nakapalambo ko og daghang tinuod ug mahangturon nga mga panaghigalaay. Nawala ang akong kamingaw, ug ako nakaamgo nga ang pagkainila walay bili kon ikumpara ngadto sa tinuod nga mga bahandi sa panaghigalaay ug pagtahud nga moabut gikan sa pagsunod sa mga baruganan sa ebanghelyo.
Mapasalamaton ko sa Amahan sa Langit kinsa migahin og panahon sa pagtudlo sa usa ka sophomore sa high school sa sekreto sa pag-angkon og panaghigalaay nga molungtad.
Background pinaagi sa akiyoko/iStock/Thinkstock; graph nga papel pinaagi sa darksite/iStock/Thinkstock