Kon ang Inyong mga Higala Gusto nga Masayud kon Ngano
Kon mas maayo ninyong masabtan ang uban, mas makatabang kamo kanila nga makasabut sa inyong mga sumbanan.
Isip usa ka 17 anyos nga batan-on sa Arizona, USA, si Kathy R. kanunay mopasabut sa iyang mga paryente sa piho nga mga butang nga buhaton— o dili buhaton sa usa ka Santos sa Ulahing mga Adlaw.
“Nakahinumdom ko nga nakig-istorya sa akong iyaan usa ka higayon niana,” miingon si Kathy. “Siya miingon, ‘Ang inyong simbahan wala magtugot ninyo nga manigarilyo o moinom, di ba?’ Giingnan nako siya nga ang Simbahan nagtudlo nga ang pag-inom ug pagpanigarilyo dili maayo apan ang Langitnong Amahan nagtugot kanako sa kagawasan sa pagpili, ug nasayud sa unsay akong nasayran, ako nagpili nga dili manigarilyo o moinom.”
Si Kathy miingon nga sa iyang sitwasyon kini mas maayo nga tubag kay sa pag-ingon, “Ang pagpanigarilyo ug pag-inom batok sa akong mga sumbanan,” bisan og usahay mahimong kana angay kaayo nga tubag.
“Ang akong iyaan naghunahuna nga ang mga simbahan mopugos sa mga tawo nga magmasulundon, busa sa dihang ako gipasabut nga kita adunay kabubut-on, siya interesado kaayo sa unsay akong isulti,” miingon si Kathy. “Sa dihang akong gipasabut nga naghimo ko og personal nga mga tumong alang sa akong kaugalingon nga dili manigarilyo o moinom, andam siya nga mosuporta kanako.”
Himoa nga ang Pag-amuma Kabahin sa Pagpakigbahin
Sama sa gipakita sa kasinatian ni Kathy, mas sayon ang pagpasabut sa mga sumbanan sa Simbahan ngadto sa uban kon kamo magsugod pinaagi sa pagpangutana sa inyong kaugalingon kon unsa ang inyong nahibaloan mahitungod sa mga tawo nga inyong makaistorya. Unsa ang nagdasig sa ilang mga pangutana? Kuryuso lang ba sila mahitungod sa unsay inyong gituohan? Direkta ba ang ilang mga pangutana ug nangita og diretso nga tubag, o sila ba nag-ukon-ukon, nanghinaut nga kamo makasabut sa ilang panglantaw una sila mosalig sa inyong tambag? Unsa man ang ilang interesado nga madunggan?
Mahimong makaangkon kamo og hunahuna o pagbati gikan sa Espiritu kabahin sa unsay makatabang kanila. Kon mao, sunda ang pag-aghat. Dili kinahanglang mohimo kamo og taas nga pagpamulong sa inyong gituohan o makiglalis kabahin sa doktrina. Pakig-istorya lang. Ipasabut lang ang espirituhanon nga mga tumong nga inyong gihimo alang sa inyong kaugalingon ug giunsa ninyo kini pag-ugmad.
Hinumdumi nga makatarunganon lang nga ipahibalo kanila nga wala kamo magbaton sa tanan nga mga tubag, apan kamo mahimong mopaila kanila ngadto sa uban, sama sa mga misyonaryo, kinsa makatabang kanila nga makita ang unsay ilang gipangita.
Hinumdumi, dili kini mahitungod sa unsay inyong gustong isulti; mahitungod kini sa unsay andam nila nga madungog. Hatagi og higayon nga kamong duha makapadayag sa inyong mga pagbati ug yanong mopakigbahin sa unsay inyong gituohan. Ilakip ang inyong pagpamatuod kon angay ug tuguti ang Espiritu Santo nga mosaksi sa kamatuoran. Mao kana ang pinakamaayong paagi sa pagtabang sa uban nga makasabut unsa ang mga sumbanan ug ngano nga kamo mosunod niini. (Tan-awa sa 1 Nephi 10:17–19.)
Ang Ehemplo sa Pagsunod sa Ebanghelyo
Si Laurent B. sa France nakahinumdom kon unsa ang bation sa tawo nga mao mismo ang nangutana. Isip usa ka 15 anyos nga tin-edyer nga mitambong sa mga miting sa Simbahan sa unang higayon, siya nadani sa kalipay sa mga miyembro, ilabi na sa mga kabatan-onan.
“Daghan ko og mga pangutana,” siya miingon. “Dili sama sa mga estudyante sa akong eskwelahan, sila dili manigarilyo o moinom ug ang batan-ong mga lalaki ug batan-ong mga babaye mipakita og dakong pagtahud sa usag usa. Ang tanan ingon og adunay direksyon ug katuyoan, ug madanihon kaayo kadto kanako.”
Iyang nahigala sila si Jean-Michel L., 16, ug ang iyang igsoong babaye, si Eva, 14. “Sila mipasabut nga ang Pulong sa Kaalam naghatag og mga baruganan alang sa himsog nga pagpuyo,” mihinumdom si Laurent. “Sila mipakigbahin sa ilang mga pagbati kabahin sa kaputli ug mipasabut nga kini usa ka sugo gikan sa Langitnong Amahan, kinsa gusto nga kita mahimong matinud-anon nga mga bana ug asawa sa kahangturan.
“Wala lamang sila basta mipasabut sa ilang mga sumbanan kanako, apan ako mismong nakita nga sila nagbuhat sa unsay ilang gituohan,” si Laurent miingon. “Kon magsunod kamo sa mga sugo magmalipayon kamo, ug ang inyong kalipay makatabang sa mga tawo nga gustong mahibalo ngano nga ingon ana ang inyong pagpuyo.”
Ang kasinatian ni Laurent nagtudlo kaniya nga ang sinag-ulo nga mga tubag dili ang labing maayong paagi sa pagpakigbahin unsa ang imong nahibaloan. Ang labing maayo nga paagi mao ang pagsunod sa unsay inyong gituohan. Dayon sama sa gisulti sa kasulatan, “andam kamo kanunay sa pagtubag kang bisan kinsa nga mangutana sa hinungdan sa paglaum nga anaa kaninyo.” (1 Pedro 3:15).
Mga Leksyon sa Dominggo
Hilisgutan Niining Bulana: Mga Kasugoan