Wan Famle Tim
Woman we i raet, i stap long Alberta, Kanada.
Hem i isi blong win taem evriwan i wok tugeta.
“When we’re helping, we’re happy [Taem yumi stap help, yumi hapi]” (Children’s Songbook, 198).
Amon i pulum win taem hem mo papa i aot long futbol gem. “Mi no andastan,” hem i talem. “Mifala i gat plante gud pleia. ?From wanem mifala i no sko?”
Papa i bin wan man blong plei gud futbol. Ating bae hem i save help.
“Mi ting se yufala i nid blong lanem blong wok olsem wan tim,” papa i talem. “?Yufala evriwan i wantem skorem poen, i tru?”
“Yes,” Amon i talem. “Be mifala evriwan i no save sko. ?Hemia nao wanem yu minim?”
Papa i muvum hed blong hem. “Yu no save skorem wan poen yuwan. Fas samting, difenda i nidim blong karemaot balong long nara tim, i tru?”
Amon i laf. “Bae i had tumas blong sko sapos yu no gat balong wetem yu.”
“I tru,” papa i talem. “Afta ol difenda i mas givimaot long wan we i save sko. I no gat wan we i save mekem samting ia hemwan.”
“Mi ting se,” Amon i talem.
Taem oli go hom, Mama i stap holem bebi taem hem i stap mekem dina. “?Olsem wanem long gem?” Hem i askem.
“Mifala i lus bakegen,” Amon i talem. “Be bae mifala i mekem i moa gud nekis taem.”
“Gudfala tingting ia nao,” Mama i talem.
“!Mi hanggri!” Migel i singaot taem hem, Samuel, mo Lukas oli ron i kam insaed.
“Ol boe, yufala i save help blong setemap tebol mo putumbak ol pleplei?” Mama i askem.
Evri boe oli komplen.
“Be mi no bin plei wetem ol pleiplei,” Samuel i talem.
“Bae i gohed olsem ia go go!” Migel i singaot.
Papa i laf. “Mi ting se famle blong yumi i gat sem problem we tim blong Amon i gat.”
“?Wanem ia?” Samuel i askem.
“Yumi no stap wok tugeta,” Amon i talem. “Yumi evriwan i wantem skorem wan poen taem yumi kakae dina. Be yumi lego evri samting long mama.”
“!I tru!” Papa i talem. “?Olsem wanem nao yumi wok olsem wan tim?”
Amon i gat wan tingting. “?Olsem wanem sapos mi mo Samuel i setemap tebol? Ol nara boe oli save pikimap ol pleiplei.”
“!Gudfala tingting! Papa i talem.
I no long taem dina i rere. Amon i foldem han blong hem blong prea. Hem i bin glad se famle blong hem i bin wok olsem wan tim. Hem i hop se futbol tim blong hem tu i save mekem sem samting ia.
Pikja i kam long Mak Jamen