Antap long Top blong olWota
Man we i raet i stap long Yuta, YSA.
Mi bin stap askem strong long Papa long Heven blong karemaot wari mo harem nogud blong mi, be sapos i nogat ol trael ia, ating bae mi no save kasem wanem “promes graon” we Hem i bin stap lidim mi i go long hem.
Kolosap sikis manis afta we mi graduet long kolej, mi stat blong eksperiensem sam samting we i mekem mi fraet, samtaem mi wari, mo ol filing we i mekem mi harem nogud. Mi no save se ol filing ia i kam wea, be oli bin strong mo kilim tingting blong mi.
Mi traehad blong stap strong. Long wok, eni niu wok i mekem mi wari mekem se mi no save sidaon kwaet. Bae mi no save kontrolem tingting blong mi, mo hat blong mi bae i bam kwik olsem se bae i kamaot aotsaed long jes blong mi. Bae samting ia i gohed olsem blong sam dei, mo afta we mi gobak hom evri dei, bae mi foldaon i go daon long amjea. Bae mi stap sek, se naet i pas mo wan nara dei blong wok i stat bakegen.
Ol filing ia i gohed olsem blong sam manis, iven afta we mi faenem wan niufala wok mo traem blong lukaotem spesel help.
Mi bin prea evri moning long rod blong mi i go long wok blong kam strong moa blong save go tru long dei mo gobak hom long waef mo gel blong mi. Mi no save luk en blong traehad blong mi, mo oltaem mi wantem blong givhap. Plante dei, mi askem strong long heven blong helpem mi taem ol ae blong mi i fulap wetem wota blong ae. Mi prea moa wetem tru hat bitim bifo, askem strong Papa long Heven blong helpem mi andastanem trael ia mo blong karemaot long mi.
Mi bin filim se mi lus long tudak mo harem nogud taem mi no bin filim Spirit. Be taem Spirit i leftemap mi aot long rod ia blong nogat hop, mi gat tras bakegen blong gohed—sapos nomo kasem nekis prea blong mi. Mi bin kam blong dipen long Papa blong mi long Heven, i no tru prea long taem blong kakae nomo o wan kwik sot prea nomo long naet. Long en, mi bin gro i kam moa kolosap long Hem.
Tantanem antap long ol Wef
Long medel blong wari mo harem nogud, mi bin ridim bakegen stori blong ol pipol blong Jared taem oli krosem “bigfala dip solwota” (Ita 2:25). Mi save tingbaot wari blong olgeta taem oli go insaed long ol sip blong olgeta. Rod blong olgeta i bin had, be oli bin save se oli stap go stret long “wan graon we i gudfala tumas bitim evri narafala graon” (Ita 2:15).
Long rod blong olgeta, yumi ridim se:
“Lod god i bin mekem se i mas gat wan strong win i blu long fes blong ol wota, i go long promes graon; mo olsem ia nao ol wef blong solwota i bin pusum olgeta long fored blong win.
“Mo i bin hapen se oli bin draon plante taem long ol dip ples blong solwota, from ol bigfala hil blong ol wef we i bin brok long olgeta, mo tu ol bigfala mo nogud hariken we i bin hapen tru long strong paoa blong win.
“… taem we plante wota i bin raonem olgeta, oli bin prea long Lod, mo hem i bin karem olgeta bakegen i kam antap long ol wota.
“Mo i bin hapen se win i neva bin stop blong blu i go long promes graon taem we oli bin stap long wota; mo olsem ia nao win i bin pusum olgeta i go fored.” (Ita 6:5–8).
Ol ves ia i bin kam impoten long mi. Mi bin filim se mi bin stap long wan sip blong miwan, wetem ol win blong wari we i stap spolem mi mo ol wef blong harem nogud we i kam bigwan long mi mo kavremap mi dip insaed long harem nogud. Taem we ol samting ia i bin “raonem” mi mo bae mi krae long Lod, mo bae mi traem go tru antap be afta bae mi draon bakegen.
Mi ridim ves 8 bakegen: “win i neva bin stop blong blu i go long promes graon… mo olsem ia nao win i bin pusum olgeta i go fored” (oli ademap italik). Afta i tajem mi. Win ia nao we i bin mekem ol bigfala wef ia blong draonem ol sip ia i bin blesem tu ol pipol blong Jared long rod blong olgeta. Mi bin stap askem strong Papa long Heven blong stopem win mo ol wef ia, be sapos i no olgeta samting ia, bae mi no save kasem “promes graon” we Hem i bin stap lidim mi i go long hem.
Ol ves ia i bin jenisim lukluk blong mi abaot laef. Wari blong mi mo harem nogud blong mi i bin mekem mi dipen bigwan long Papa long Heven. Sapos i no win mo wef, be mi no save kam blong save God olsem we mi bin mekem—mo ating ol pipol blong Jared tu bae i neva save kasem promes graon.
Blong naoia, mo sam yia afta eksperiens ia, ol win blong mi blong wari i nomo blu mo ol wef blong mi blong harem nogud i bin stop blong draonem mi. Be sapos mo taem ol strong win ia i kambak, bae mi singaot long Lod mo stap talem tangkyu, wetem save ia se ol solwota we i kwaet i no karem ol sip i go long promes graon—be ol raf solwota yes.
Pikja i kam long Jeri Haston