Gat Strong Paoa long tingting blong Jusum Fasin blong Dresap Gud
I kam long Karol F. MakKonki
Fas Kaonsela long Yang Woman Jeneral Presidensi
Long wan toktok we hem i bin givim long 2 Mei 2013 long Brigham Yang Yunivesiti long wan Konfrens blong ol Woman.
?Wanem nao yumi save tijim ol boe mo ol gel blong yumi blong helpem olgeta i gat strong tingting long paoa blong jusum gud fasin long wan wol we bae i jikim olgeta blong ol joes blong olgeta we i klin?
?From wanem gud fasin i impoten tumas? ?From wanem wan en blong dres, o wan laen blong nek blong wan klos, o wan Tisot i impoten long Lod? Mi mi mama blong faef gel mo tu boe, mo olsem we yu save tingting long hem, topik blong fasin blong dresap gud i stap i kam antap wanwan taem long hom blong mifala. Be blong sam yia, mi bin lanem se fasin blong dresap gud, oli tijim moa gud taem tijim doktrin mo gat wan gudfala eksampol. Doktrin ia bae i helpem ol pikinini blong yumi i andastanem from wanem fasin blong dresap gud i impoten tumas, mo eksampol blong yumi bae i soem ol blesing blong fasin blong dresap gud long ol wei blong stap glad.
? Wanem ia Fasin blong Dresap Gud?
Fasin blong Dresap Gud i wan prinsipol we God i givim we i save helpem yumi lanem blong yusum ol bodi blong yumi long stret fasin long wol ia. Mining blong fasin blong dresap gud long Stap Tru long Fet hem i “Fasin blong Gud Dresap i wan fasin we i soem tingting blong yu i stap daon mo soem we yu gat respek long fasin blong dresap, blong lukaotem bodi blong yu, fasin blong toktok, mo long aksen blong yu.”1 Fasin blong Dresap Gud i no blong nating o blong soem yu. Pipol we oli dresap gud, oli no yusum bodi blong olgeta o aksen blong olgeta blong mekem se wol i akseptem olgeta o blong soem se olgeta ia nao o oli gat paoa.
Plis tingbaot se ol prinsipol blong fasin blong dresap gud we oli serem long ples ia, hem i blong ol man mo ol woman, ol boe mo ol gel, mo tingbaot se iven taem yumi tijim mo soem eksampol blong fasin blong dresap gud, yumi neva jajem olgeta we oli jusum ol sot sket o “hea i kala renbo mo plante naesfala ring.”2 Oltaem yumi mas soem eksampol blong lav mo sore mo lav olsem hemia blong Kraes blong wanwan man taem yumi stap strong mo folem ol standet we Lod i putum.
Mi testifae se ol joes yumi mekem blong i kamaot mo i soem fasin blong dresap gud i givim wan strong mesej we yumi andastanem aedentiti blong yumi olsem ol boe mo ol gel blong God mo we yumi bin jusum blong stanap long ol tabu ples.
Mi lavem skripja ia: “Ating yufala i save finis we yufala i olsem haos blong God, mo we Spirit blong God i stap finis long yufala?” “Haos ya i tabu, mo i tru we yufala i olsem haos ya” (Fas Korin 3:17). Ol bodi blong yumi oli ol tempol blong ol spirit blong yumi. Hem i tru long ol tempol bodi ia nao we yumi invaetem kompanionsip blong Tabu Spirit. Mi biliv se taem yumi jusum blong werem ol gudfala klos mo gat ol aksen wetem wan gudfala fasin blong dresap gud, yumi werem mo yumi laef long testemoni blong yumi blong God Papa we i no save finis mo blong Pikinini blong Hem, Jisas Kraes. Yumi witnesem tru aotsaed lukluk blong yumi se yumi ol disaepol blong Kraes mo we yumi laef folem gospel blong Hem.
?From Wanem Fasin blong Dresap Gud I Impoten?
Yumi laef long wan wol blong gud mo rabis fasin, mo yumi save yusum bodi blong mit mo bun blong ol stret mo gud fasin o blong ol rabis risen. Be yumi save se ol spesel bodi ia oli wan presen we i kam long God blong wanwan long yumi. Oli tabu. Elda Deved A. Bedna blong Kworom blong Olgeta Twelef Aposol i bin tijim, “Blong olgeta we oli save mo andastanem plan blong sevem man, mo stap spolem bodi i wan fasin blong go agens [luk long Mosaea 2:36–37] mo wan giaman abaot huia yumi stret olsem ol boe mo ol gel blong God.”3 Yumi jusum blong kea from mo blong protektem ol bodi blong yumi blong mekem se yumi save stap ol tul long ol han blong God blong karem i kam bigfala stamba tingting blong Hem (luk long Alma 26:3). Sapos yumi wantem tumas blong stanap from Sevya mo mekem wok blong Hem, yumi mas askem yumiwan, Sapos Sevya i stap kolosap, ?bae yumi filim gud long ol klos we yumi werem?
Fasin blong dresap gud, olsem yu luk, tingting, mo fasin oli pruf se yumi andastanem ol kavenan we yumi bin mekem we i blesem yumi, i protektem yumi, mo i givim paoa long yumi blong rere blong gobak long God. Evri samting i mas defren blong yumi. Elda Robet D. Hels blong Kworom blong Olgeta Twelef Aposol i bin tijim: “Taem yumi stap jusum blong stap long kingdom blong Hem, yumi seperetem—i no stap yumiwan nomo—be aot long ol samting long wol. Fasin blong yumi blong dresap bae i gud, mo ol tingting blong yumi bae i klin gud, mo lanwis blong yumi i klin.”4
Fasin blong dresap gud i wan prinsipol we i helpem blong kipim yumi i stap sef long rod blong kavenan taem yumi progres i go long ples blong God. Fasin blong dresap gud mo yu luk olsem wanem mo long tingting mo fasin bae i helpem mekem yumi rere blong mekem mo kipim ol tabu tempol kavenan. Blong blesem mo protektem Adam mo Iv, God i bin givim olgeta ol kot blong skin blong kavremap olgeta wetem bifo Hem i sendem tufala i go aot long garen. Long sem fasin, God i bin givim yumi ol kavenan blong laef ia we simbol blong hem i tru ol tabu gamen long tempol blong kavremap yumi wetem.
?Wanem Ol Blesing blong Fasin blong Dresap Gud?
?Wanem nao yumi save tijim ol boe mo ol gel blong yumi blong helpem olgeta gat strong paoa long tingting blong jusum fasin blong dresap gud long wan wol we bae i jik mo laf long olgeta from ol joes we oli mekem we i klin gud mo wetem klin fasin? ?Oli luk yumi stap yusum ol bodi blong yumi blong soemaot o blong givim glori long God?
Fasin blong dresap gud long tingting, long toktok, mo olsem wanem yu luk, mo ol fasin blong yumi i helpem yumi kasem tri blesing we i givim paoa mo gud fasin.
1. Fasin blong dresap gud i invaetem kampani blong Tabu Spirit oltaem. Elda Hels i bin tijim, “Fasin blong dresap gud i wan stamba samting we yumi nidim blong kam klin inaf blong gat Spirit.”5
Letem yumi helpem ol pikinini blong yumi i andastanem se bae oli no wantem mekem wan samting we bae i putum daon “presen we i Tabu Spirit we man i no save tokbaot” (luk long D&C 121:26). Helpem olgeta blong save se ol presen we oli spesel mo gat paoa long saed blong spirit oli kam wetem Hem olsem tabu kompanion. God i bin promes se bambae mi soemaot smol, Spirit blong mi, we bambae i givim laet long maen blong yu, we bambae i fulumap sol blong yu wetem glad. From tru long hemia nao bambae yumi save, evri samting we bambae yumi askem long Hem, we oli abaot ol samting we i stret mo gud, mo yumi askem wetem fet mo stap biliv long Hem, olgeta samting ia, bambae yumi kasem olgeta (luk long D&C 11:13–14). Save, waes, mo testemoni; glad, pis mo hapines—hemia sam long ol bigfala blesing we yumi save promesem ol pikinini blong yumi long hem taem yumi invaetem olgeta blong folem fasin blong dresap gud long laef blong olgeta mo stap klin inaf blong gat Tabu Spirit.
Wan long ol jalenj blong dresap gud hem i ol stael mo fasin blong jenis we i stap hapen naoia long wol. Ol standet blong Lod i neva jenis. Tijim ol yang man mo yang woman blong lisin gud long Spirit taem oli mekem ol joes abaot wanem blong werem, blong talem, mo blong mekem. Taem oli laef kolosap long Spirit, oli no nid blong kam olsem we wol i wantem.
Ol pikinini blong yumi oli bin kasem presen we i Tabu Spirit, mo oli stap wokbaot folem kavenan rod we i lid i go long tempol mo bae i mekem oli gobak long ples blong God. Oli nidim yumi blong mekem oli save gud mo stap eksampol long olgeta blong oli save folem, blong kasem proteksen, mo stap klin gud taem oli stap klin inaf blong kasem Tabu Spirit.
2. Yumi save tijim ol boe mo ol gel blong yumi se fasin blong dresap gud long lukluk mo fasin i help blong protektem yumi long ol rabis fasin blong wol. Wan long ol nogud tul we i yus blong agensem yumi evriwan hem i fasin ia we wol i tijim se fasin blong gat klin tingting i wan praktis blong bifo. Fasin blong dresap gud i wan wei blong difendem yumi agensem ol rabis paoa mo wan proteksen blong jastiti mo klin fasin. Lisin long ol toktok ia long Blong Ol Yut Oli Kam Strong: “Bifo mared, … no mas traem blong mekem eni samting … we i traem blong givim ol filing blong go wetem wan man o woman.”6 Fasin blong no dresap gud aotsaed mo fasin we i folem bae oltaem i traem givim ol filing blong go wetem wan man o woman mo bae i brekemdaon ol samting we i blokem mo invaetem temtesen blong brekem loa blong jastiti.
Elda Hels i bin tijim: “Fasin blong dresap gud i mein samting ia blong stap klin mo stap klin gud, tugeta long tingting mo long wok. Mekem se, from i lidim mo kontrolem ol tingting, fasin, mo ol desisen blong yumi, fasin blong dresap gud i kam wan impoten samting long medel blong ol fasin blong yumi.”7 Tijim mo soem eksampol blong fasin blong dresap gud blong helpem ol yang man mo ol yang woman blong rere blong difendem mo protektem ol paoa ia blong krietem ol laef long olgetawan.
3. Fasin blong dresap gud i mekem se yumi save “stanap olsem ol witnes blong oltaem” (Mosaea 18:9).” Sevya i bin tijim: “Leftemap laet blong yufala blong mekem se i save saen long wol. Luk mi mi laet we yufala i mas leftemap” (3 Nifae 18:24). Yumi gat wan tabu komanmen, blong stap wan sos blong insperesen long wol. Wanwan long yumi i soem Laet blong Kraes taem yumi dresap gud mo klin gud mo kipim ol komanmen. Fasin blong dresap gud i wan witnes blong testemoni blong yumi blong Sevya mo blong gospel blong Jisas Kraes.
I naes tumas mo i wan blesing blong olgeta we Tabu Spirit i lidim olgeta, we oli protektem olgetawan aot long ol samting blong wol, mo we oli stanap olsem ol witnes blong God long wol. Mo blesem olgeta we oli soem eksampol mo tijim doktrin blong fasin blong dresap gud long evri boe mo gel blong Saeon.
Taem yumi bin mekem kavenan blong folem Sevya mo wantem tumas blong kasem ful blesing blong Atonmen blong Hem long ol laef blong yumi, i gat wan pis klos nomo we i impoten. Moronae i rekodem, “Wekap, mo girap aot long das, … yes, mo putum ol naes klos blong yu, O gel blong Saeon; blong ol kavenan blong Papa we i no save finis … i save hapen” (Moronae 10:31; oli ademap italik).
Naesfala gamen ia, oli ol klos blong stret mo gud fasin, mo olgeta we oli bin kipim ol kavenan nao oli werem. ?Yumi stap rere long ol pikinini blong yumi blong putum ol naesfala gamen ia?
Mi testifae se fasin blong sevem man i stap long Kraes mo olgeta we oli bin kipim ol kavenan blong olgeta bae “oli gat wan stret save blong ol gladtaem blong olgeta, mo stret fasin blong olgeta, from ol samting we oli klin i kavremap olgeta, yes, oli kavremap olgeta tu wetem wan longfala klos blong stret fasin” (2 Nifae 9:14).