Olsem wanem blong Faenem Paoa mo Sakses
I Kam long Elda Jefri R. Holan
Blong Kworom blong Olgeta Twelef Aposol
Long wan faeasaed long Brigham Yang Yunivesiti long 2 Maj 1997.
Sam long yufala i save wanem yufala i wantem kam mo wanem yufala i wantem mekem wetem laef blong yufala, mo sam long yufala i no save. Sam long yufala i luk olsem yufala i gat plante blesing mo plante gudfala joes long fored blong yu. Sam long yufala blong wan taem mo nomata wanem risen, i filim se i nogat ol janis ia wetem hamas naes rod nomo we kwiktaem i stap long fored.
Be nomata huia yu mo nomata wea ples yu faenem yuwan long hem taem yu lukaotem wei blong yu long laef, mi presen long yu “rod ia, trutok ia, mo laef ia” (Jon 14:6). Nomata wea ples bakegen bae yu go long hem, mi askem yu blong “kam long Hem” (luk long Matiu 11:28–30) taem fas impoten step blong kasem longwe, blong faenem wanwan hapines mo paoa mo sakses.
Taem Andru mo Filip i bin harem Kraes i toktok blong fastaem, i bin tajem tufala, mo i kasem gud tufala we i mekem se tufala i bin folem Hem taem Hem i aot mo livim grup blong ol pipol. Hem i bin filim save se man i stap folem Hem, Kraes i tanem Hem mo askem tufala man ia, “?Ei, yutufala i lukaot wanem?” (Jon 1:38). Ol nara translesen i mekem i moa simpol, “?Yutufala i wantem wanem?”
Tufala i ansa, “Rabae yu yu stap long weples?” o “Yu stap wea?”
Mo Kraes i talem, “Yutufala i biaen long mi.” Sot taem afta, Hem i singaotem Pita mo ol nara niu Aposol wetem sem spirit blong invitesen, “Kam folem mi” (luk long Matiu 4:19).
Long mi, i luk olsem bigfala mining blong laef blong yumi, yu save luk long tufala sot pat ia taem fastaem we Sevya i statem wok blong hem long laef ia. Wan long ol pat ia hem i kwestin, i go long evriwan long yumi, “?Yu stap lukaotem wanem? ?Yu wantem wanem?” Nambatu hem i ansa blong Hem long olsem wanem nao blong kasem hemia. Nomata huia yumi, mo wanem ol problem we yumi gat, ansa blong Hem oltaem i semmak, oltaem: “Kam long mi.” Kam luk wanem mi mekem mo olsem wanem mi spendem taem blong mi. Lanem abaot mi, folem mi, mo long rod, bae mi givim yu ol ansa long ol prea blong yu mo sol blong yu blong spel.
Ol yang fren blong mi we mi lavem, mi no save eni nara wei blong yu blong gat sakses o blong stap hapi o blong stap sef. Mi no save wan nara wei blong yu blong save karem ol hevi samting blong yu o faenem wanem Jekob i singaotem “fasin blong stap hapi we i rere blong ol sent” (2 Nifae 9:43). Hemia from wanem yumi mekem ol impoten kavenan tru long atoning sakrifaes blong Kraes, mo hem i from wanem nao yumi tekem long yumi nem blong Hem.
Jisas i Kraes, Pikinini blong God we i laef. Hemia hem i Jos blong Hem we i tru mo i laef i stap. Hem i hop se yumi kam long Hem, blong folem Hem, blong kasem kamfot we i kam long Hem. Afta Hem i hop blong yumi givim kamfot long ol naraman. Bae yumi gat inaf fet blong akseptem gud samting we i kam long God mo sore blong Wan Stret Pikinini Ia Nomo blong Hem. Bae yumi kam long Hem mo long gospel blong Hem mo kasem hiling.