Stap Givim Seves Naoia blong givim seves Afta
Man we i raet i stap long Yuta, YSA.
“Givim Seves long Lod wetem evri hat” (Fas Samuel 12:20).
“Bae mi resis wetem yu i go long jos!” Momon i talem, taem hem i stap poentem sap aean antap long jos we yu save luk hem tru ol pam tri.
Ol boe mo papa mo mama blong olgeta i bin wokbaot finis kolosap wan kilomita aot long hom blong olgeta, be Momon mo Morion oli stap resis kwik taem oli kasem aean get aotsaed long wod mitinghaos. Oli bin stop blong pulum gud win blong olgeta.
Bifo oli save disaed se huia i win, wan boe i singaotem olgeta, “?Wantem plei futbol?”
Momon i lavem futbol, be hem mo famle blong hem bae oli klinim wod bilding ia blong bae i rere blong jos long nekis dei.
Momon i bin sekem hed blong hem. “I no naoia—ating afta! hem i singaot i gobak.
I no long taem Momon mo Morion, tufala i bin wokhad. Momon i bin muvum ol jea mo brum ol floa wetem papa blong hem taem we Morion i mopem ol floa wetem mama blong hem.
Afta tufala boe i wasem ol mira long batrum tugeta. “Mi no bin ting se bae mi laekem klinim jos, be i fan,” Morion i talem. “?Be yu Momon? Hemia nao from wanem yu bin kam be i no blong plei futbol?”
Momom i bin tingbaot papa blong hem. Hem i bin bisop blong wod blong olgeta, be yet hem i tekem taem blong helpem klinim mitinghaos.
“Mi stap ia from mi wantem blong kam olsem Papa,” Momon i talem.
Afta hem i bin tingbaot ol misinari long wod blong hem. Oli bin bisi blong noknok long ol doa mo stap serem Buk blong Momon wetem ol narafala man. Bae oli invaetem ol pipol blong kam long jos long bilding we ol boe i stap klinim.
“Mi stap ia from sam dei mi wantem mekem misinari wok tu,” Mómon i tingting olsem. “Mi save helpem ol misinari taem mi stap rere long jos.”
Momon i tingbaot tumoro, taem we hem mo brata blong hem bae i girap long 6 klok moning, wokbaot i go long jos wetem ol waet set mo nektae, mo rere long ol jea mo ol buk blong singsing long Praemeri rum.
“Mi stap ia from mi wantem blong givim seves long wan koling blong Jos,” hem i tingting olsem.
Momon i bin tingbaot olsem wanem bae hem i save stap wan dikon. Bae hem i pasem sakramen mo mekem plante nara samting blong givim seves. “Mi stap ia from nekis yia bae mi kasem prishud, mo mi wantem mekem evri samting we mi save mekem naoia blong stap rere.”
Momon i bin mekem wan samting blong rere from prishud: hem i bin kasem Awod blong Fet long God. Hem i bin lanem finis blong laef folem gospel mo givim seves long ol narafala man.
Long en, hem i bin luk fes blong brata blong hem long mira mo smael.
“Mi stap ia from mi lavem Lod,” hem i talem, “mo blong givim seves naoia bae i helpem mi rere blong givim seves afta.”
Ol pikja oli kam long Adam Kofod