Wan Nogud Posin we i Pulum Ae

Alison L. Randal, Yuta, YSA

Taem mi kam aotsaed long fored blong doa blong pikimap niuspepa, mi bin luk wan samting we i no naes nating blong luk. Wan red hil blong faea anis we oli jes fom nomo long naet, we oli muv folem smen we i brok hemia bitwin ples blong wokbaot mo gras.

Nomata mi mo hasban blong mi i no bin stap long taem long Teksas, YSA, mi bin lanem tru eksperiens se ol anis ia oli kakae man, i no from kala blong olgeta nao i mekem se oli givim sot nem ia long olgeta. Mi go stret long garaj, long ples we mifala i kipim ol meresin blong ol bebet. Afta, mi ridim ol instraksen we i stap long ol meresin ia.

“[Ol meresin ia] i rili gud mo i pulum ae blong ol faea anis,” i rid olsem. “Bae oli karem i go ples we oli hip long hem, fidim kwin blong olgeta wetem, mo evriwan we i hip tugeta ia bae oli ded.” Instraksen i talem blong mi saksakem smolsmol antap mo raon long hip ia. Bae ol anis nao i mekem haf long wok we i stap.

Mi no rili sua. Ol faea anis ia, long mi mi luk se oli smat gud, oli save bildim ol hil we i hae long wan naet nomo. Mi no sua se bae oli save ded ia from posin ia we oli haedem ia, be mi gohed blong saksakem meresin ia.

Smol taem afta, mi bin faenem se hil ia i bin bisi gud wetem aktiviti. Mi bin stop longwe blong luk wanem i stap hapen. Oli bin glad tumas olsem se mana i foldaon i kam long heven. Oli stap karem ol waet paoda ia wetem ol tintin han blong olgeta mo sakem olbaot long olgeta wanwan long wan wei we i kwik blong mekem se posin ia i kasem ples we oli hip long hem.

Mi lukluk wetem sapraes. Oli bin tekem wetem glad hat posin ia i go long hom blong olgeta. I luk olsem toktok ia “i pulum gud ae” I no giaman. Be kampani blong ol meresin ia oli bin save mekem wan samting we i nogud—we i save kilim ded olgeta—i luk olsem se i gud nomo.

Mi neva luk wan kaen eksampol olsem long olsem wanem blong mekem wan samting i nogud i kam gud long ae blong man. I mekem mi tingting long olsem wanem Setan i mekem sem samting. Mi kam blong luksave se nomata hem i save saksakem smolsmol posin blong hem we oli no luksave raon long hom blong mi, hem i no save karem i kam insaed—sapos nomo mi letem hem. ?So olsem wanem nao mi save kipim hem aot?

Wan long ol skripja we mi laekem tumas i bin kam long maen blong mi: “From luk, Spirit blong Kraes, God i givim long evri man, blong hem i save gat save long samting we i gud aot long samting we i nogud.” Wetem Spirit ia, Momon i eksplenem, yumi “save gat save wetem wan save we i stret gud se samting ia i blong God o blong Setan (Moronae 7:16).

Eksperiens ia blong stap luk ol ded anis ia i bin mekem mi fulap wetem glad mo tangkyu se mi mo hasban blong mi i save jajem mo save gud wanem blong letem i go insaed long hom blong mifala. Wok blong yumi i bin blong tijim ol pikinini blong mifala blong folem Spirit blong Kraes blong mekem se oli save luksave posin taem oli fas long hem.

Taem mi stap lukluk ol bebet ia i stap tekem evri lasfala smolsmol pis blong meresin ia i go long hil blong olgeta, mi bin mekem wan promes blong mekem evri samting we mi save mekem blong mekem se posin i no save go insaed long hom blong mi.

Instraksen i talem blong mi saksakem smolsmol antap mo raon long hip ia. Bae ol anis nao i mekem haf long wok we i stap.