Kasem Taem Yumi Mit Bakegen
Ol Trik
I Kam long Elda M. Rasel Balad
Blong Kworom blong Olgeta Twelef Aposol
Long “O That Cunning Plan of the Evil One,” Liahona, Nov. 2010, 108–110.
Ol pikja i kam long J. Ken Spensa
Taem ol lif i folfoldaon long ol tri hem i wan gudfala taem blong ol man we oli stap huk from hemia i taem we fis ia, traot, oli hanggri mo oli stap lukaot kakae blong oli save mekem bodi blong olgeta i strong agensem rabis taem blong winta we kakae i nogat.
Gol blong ol man blong huk ia i blong kasem fis ia, traot, tru long wan spesel trik. Waes man blong huk ia, i stadi fasin blong traot ia, weta, taed blong wota, mo ol kaen bebet we traot ia i kakae mo taem ol bebet ia oli bon. Samtaem bae hem i wokem ol trik ia wetem ol han blong hem. Hem i save se ol giaman bebet we hem i fasem long ol smosmol huk ia oli mas luk ril from traot bae i luksave iven wan smol mistek mo bae i no wantem bebet ia.
Hem i wan glad blong luk wan traot i jiam aot long wota, i kakae bebet mo luk bebet ia i kik kasem taem i taed mo traot ia i solem daon hem. Resis hem i blong putum save blong man blong huk ia mo skil blong hem agensem traot ia.
Yus blong ol giaman bebet blong trikim mo kasem wan fis hem i wan eksampol long wei we Lusifa i stap yusum oltaem blong temtem, giaman mo kasem yumi long trap.
Olsem man blong sakem huk we i save se traot oli kamaot from hanggri, Lusifa i save “hanggri” blong yumi o ol wiknes mo i temtem yumi wetem ol giaman bebet we, sapos yumi tekem, i save stopem pis long ol laef blong yumi mo go long paoa blong hem we i no gat sore. Mo hem i no olsem man blong huk ia we i kasem mo i lego fis i gobak long wota, no, Lusifa bae i no volontia blong letem yumi go. Gol blong hem i blong mekem olgeta we hem i kasem ia oli harem nogud olsem hem.
Wan long ol stamba wei we hem i yusum agensem yumi hem i paoa blong hem blong giaman blong traem talem long yumi se nogud hem i gud mo gud hem i nogud. Stat long stat blong wol long bigfala Kaonsel long Heven, Setan i lukaot blong spolemgud fridom blong jusum blong ol man, we Mi Lod God, i bin givim long hem (luk long Moses 4:3).
Rao from fridom blong jusum blong man we God i givim i gohed tedei. Setan mo ol man blong hem oli gat ol bet raon long yumi mo hop se bae yumi no luksave mo tekem ol bet blong hem blong hem i save tekem yumi i kam insaed long ol giaman wei blong hem.
Ol brata mo sista, letem yumi stap lukaot gud long ol giaman bebet we oli stap flae raon long yumi tru long giaman man blong pulum net blong ol man, we i Lusifa. Letem yumi gat waes mo tingting long saed blong spirit blong luksave mo no akseptem plante ofring blong hem we oli denja.
Mo, long olgeta we oli bin foldaon olsem slef long eni kaen adiksen, i gat hop from God i lavem evri pikinini blong Hem, mo from Atonmen mo lav blong Lod Jisas Kraes i mekem evri samting i posibol.