Fas Presidensi Mesej
Prea blong Fet
I Kam long Presiden Henri B. Aering
Fas Kaonsela long Fas Presidensi
Prea i moa bitim ol toktok we yu talem long God. Hem i wan tu wei komunikesen bitwin God mo ol pikinini blong Hem.
Taem prea i wok olsem we i mas hapen, yumi talemaot ol filing blong ol hat blong yumi long ol simpol toktok. Oltaem, Papa long Heven i ansa taem Hem i putum ol tingting long ol maen blong yumi mo i kam wetem ol filing. Oltaem Hem i harem ol prea we i kamaot long hat we taem yumi prea wetem wan komitmen blong obei long Hem, nomata wanem ansa blong Hem mo wanem taem bae ansa i kam.
Lod i mekem promes ia long evriwan we i ridim mo prea abaot Buk blong Momon:
Mo taem we bae yufala i kasem ol samting ia, mi wantem askem strong long yufala se bae yufala i askem God, Papa we i No Save Finis, long nem blong Kraes, sapos ol samting ia i no tru; mo sapos bae yufala i askem wetem wan tru hat, wetem tingting we i tru blong wantem save, wetem fet long Kraes, bae hem i soemaot trutok blong ol samting ia long yufala, tru long paoa blong Tabu Spirit (Moronae 10:4).
“Tru long paoa blong Tabu Spirit, yufala i save gat save long saed blong trutok blong evri samting” (Moronae 10:4-5).
Promes ia i tru. Ol milion pipol i bin traem mo pruvum gudfala promes ia abaot prea taem oli kasem wan blesing we i fulumap ol laef blong olgeta wetem glad mo hapines ia we i stap blong long taem. Promes ia i aplae long evri prea blong yumi, blong save maen mo tingting blong God long yumi. Yumi save aplaem enitaem we yumi kasem kaonsel we i kam long wan wokman blong God we i gat raet ia blong lidim yumi. Eksampol, yumi save dipen long hem taem yumi bin lisin long ol toktok long jeneral konfrens. Yumi save aplaem, taem yumi kasem tijing tru ol gudfala misinari we God i bin singaotem olgeta tru long profet we i laef tedei. I aplae tu long kaonsel ia we yumi kasem long bisop o branj presiden blong yumi.
Blong prea i wok long ol laef blong yumi, ol rul oli simpol nomo. Yumi mas askem blong save wanem i tru taem yumi stap prea long Papa long nem blong Jisas Kraes. Yumi mas askem wetem wan tru hat, we i minim se yumi mas gat wan strong tingting we i ones blong mekem wanem we God i talem tru long ansa blong prea. Mo strong tingting blong yumi i mas kam tru long fet blong yumi long Jisas Kraes.
Investigeta we i ridim Buk blong Momon bifo hem i baptaes mo kasem konfemesen bae i save kasem tugeta trutok ia se buk ia i tru mo wan witnes se Josef Smit i bin transletem tru long paoa blong God. Afta we hem i kasem konfemesen blong kam wan memba blong Jos, yumi save gat Tabu Spirit olsem wan kompanion blong konfemem ol nara trutok. Afta, nomata yumi prea long fet, yumi save talem se Tabu Spirit bae i testifae long yumi se Jisas i Kraes, se God Papa i laef, mo se oli lavem yumi mo evri pikinini blong Papa long Heven.
Hemia i wan risen we i gat wan promes long Buk blong Momon se bae yumi gat bigfala lav long hat blong yumi taem Tabu Spirit i talem witnes long yumi se Jisas i Kraes: “Sapos wan man i no stap flas mo tingting blong hat blong hem i stap daon, mo i talemaot tru long paoa blong Tabu Spirit se Jisas i Kraes, hem i mas nid gat bigfala lav; from sapos hem i no gat bigfala lav hem i nating; from samting ia hem i mas nid gat bigfala lav” (Moronae 7:44).
I gat wan bigfala janis blong gro long saed blong spirit evri Sandei long taem blong livim kakae. Fast Sandei i save helpem yumi gat kolosap semmak eksperiens long Alma mo ol boe blong Mosaea, we oli bin prea mo livim kakae blong save trutok we i no save finis blong mekem se oli save tijim ol Lemanaet wetem paoa, atoriti, mo lav (luk long Alma 17:3, 9).
Long Fast Sandei yumi putum tugeta prea mo fasting. Blong blesing blong ol pua, yumi givim wan fasofring wetem gudfala hat long bisop o branj presiden we i amaon blong hem bae i kolosap long amaon blong tu mil (ol taem blong kakae) we yumi mestem.
Ol prea mo wanem we yumi wantem tumas, i kam moa olsem ol prea mo wanem we Sevya i wantem taem yumi livim kakae blong gat moa tingting we i stap daon, blong kasem tijing, mo blong kasem lav. Mo olsem we Hem i bin mekem, yumi prea tu blong save tingting blong Papa long yumi mo blong mekem.