Mi bin harem ol Pikinini
Joi Kroma, Kalifonia, YSA
Fasin blong stap harem nogud insaed long Klinik i bin wan samting we mi neva wantem fesem bakegen. Be afta we mi bin kam fri long hem blong 12 ya, i kambak bakegen.
Mi bin fraet mo wari. Mi bin kwestinem Papa long Heven mo bin prea blong kam strong moa blong save mekem blong go tru long trael blong mi. Mi bin krae long Hem se bae harem nogud blong mi bae i no gohed blong faef yia, olsem we i bin hapen lastaem.
Mi mo hasban blong mi i bin gat tri pikinini, tu boe mo wan gel, we oli bin blesem mifala wetem ol 13 apu pikinini. Wetem save ia abaot harem nogud we mi fesem, gel blong mi i bin oganaesem famle blong wan dei blong livim kakae mo prea. Evri apu pikinini, long ol yia 1 kasem 10, oli bin wantem prea from apu woman, mo olgeta tri we oli bin baptaes, oli wantem blong livim kakae. Hem i bin wan kamfot blong save se hasban blong mi, ol pikinini, mo ol apu pikinini bae oli livim kakae mo prea long bihaf blong hem.
Long nekis dei taem mi bin wekap afta wan smol spel, filing ia blong wari i no bin strong tumas. Long nekis dei i kam moa gud. Kasem long namba faef dei wari blong mi i lus evriwan. Long naet ia, taem mi stap lukluk olsem wanem merikel ia i bin hapen, wan voes i bin tajem sol blong mi mo talem long mi, “mi bin harem ol pikinini.” Papa long Heven i bin harem olgeta nomata oli no bin mekem wan samting nogud mo bin ansarem ol prea blong olgeta blong putum tingting i stap daon, fet mo lav.
Sevya i bin tijim:
“Sipos yufala i no jenisim fasin blong yufala blong kam olsem pikinini, bambae yufala i no save kam samtaem we God i King blong yufala.
“Be man we i mekem tingting blong hem i stap daon olsem pikinini ya, hem i hae moa, i winim olgeta narafala man we God i king blong olgeta” (Matiu 18:3–4).
Mi bin raet long ol apu pikinini blong mi mo talem tangkyu long olgeta blong livim kakae mo stap prea long bihaf blong mi. Mi talem long olgeta hamas mi lavem olgeta. Mi talem long olgeta papa long Heven i bin harem olgeta mo ansarem ol prea blong olgeta.
Taem ol apu pikinini blong mi i stap gro insaed gospel, mi hop bae oli tingbaot taem we Papa long Heven i bin talem long apu woman blong olgeta, “Mi harem ol pikinini.” Mo mi hop se eksperiens ia bae i mekem testemoni blong mi i kam strong moa mo helpem olgeta blong stap strong long gospel.
Evri apu pikinini, long ol yia 1 kasem 10, oli bin wantem prea from apu woman, mo olgeta tri we oli bin baptaes, oli wantem blong livim kakae.