Gospel long Laef blong Mi
Testemoni blong Mi we I Joen Tugeta
Man ia we i raet i stap long Singapo.
Blong mi, fulnes blong gospel blong Jisas Kraes we i tru mo Buk blong Momon we i tru, tufala i joen tugeta. Sapos gospel i tru, ale Buk blong Momon i tru.
Ol misinari i bin tijim gospel long famle blong mi long hom blong mifala long Singapo. Papa blong mi i no bin joenem Jos, be mama blong mi i joenem Jos. Hem i bin tijim mifala abaot Jisas Kraes mo gospel blong Hem. Iven olsem wan pikinini, mi bin praod blong talem long ol fren blong mi se mi wan Lata-dei Sent.
Oltaem mi trastem ol tijing blong mama blong mi. Be taem mi bin kam wan yang adalt, wan misinari i bin askem mi hamas taem mi bin ridim Buk blong Momon. Oli bin askem kwestin ia long mi finis bifo, be tedei mi luksave se from mi no bin ridim Buk blong Momon, mi no bin save sapos i bin tru.
Wan Trutok we I No Save Haed
Mi no save lego wan trutok we i no save haed: fulnes blong gospel blong Jisas Kraes we i tru mo Buk blong Momon we i tru, tufala i joen tugeta. Sapos gospel i tru, be Buk blong Momon tu i tru. From se mi no bin save long stat se Buk blong Momon i bin tru, i mekem se mi no bin filim gud long evri samting we mi bin bilivim taem mi stap gro. Maen blong mi i bin fulap long konfius, mo kwestin ia—“?Buk blong Momon hem i tru?”—i stap oltaem long hat blong mi.
Rilesensip blong mi wetem Sevya Jisas Kraes i stap gro, mo i lidim mi tu blong gat wan disaea blong save trutok. Long dei ia mi bin luksave se mi no save lanem inaf abaot Jisas Kaes, mo no siries blong stap ridim Buk blong Momon, i bin dei ia we mi wantem tumas blong save sapos i bin tru.
Oli Bin Singaotem Mi Olsem Wan Tija
Mi bin prea from gaedens. Long taem ia, branj presiden blong mi i bin singaotem mi blong tij abaot Buk blong Momon long klas blong Gospel Doktrin. Mi bin akseptem koling ia from mi bin filim se hemia i save kam olsem ansa blong Lod blong helpem mi save trutok blong Buk blong Momon mo blong go moa kolosap long Sevya.
Tijing i bin had. Afta long ol fas Sandei, mi bin save se bae mi no save mekem wan samting kasem we mi biliv long Buk blong Momon.
Ol Stori we I Folem Japta afta Japta
Mi bin stat blong stadi Buk blong Momon evri wik mo afta mi stat blong stap glad taem mi rid. Ol stori long Buk blong Momon i folem japta afta japta mo mekem mi go moa kolosap long Jisas Kraes.
Mi bin ridim abaot Kraes taem i bon, we Nifae i bin luk long wan visen:
“Mo mi bin luk bigtaon blong Nasaret, mi bin luk wan woman we i neva go wetem man yet, mo hem i bin naes tumas mo i waet… …
“Mo [wan enjel] i bin talem long mi: Luk, woman we i neva go wetem man yet we yu stap luk i mama blong Pikinini blong God, folem fasin blong bodi blong mit mo bun” (1 Nifae 11:13, 18).
Mi bin ridim abaot plan blong stap glad mo bin lanem se fet long Jisas Kraes i impoten blong yumi blong save sef.
“Mi save se Kraes bae i kam long ol pikinini blong ol man, blong tekem long hem ol fasin blong brekem ol loa blong pipol blong hem, mo we bae hem i pem praes blong ol sin blong wol; from Lod God i bin talem samting ia. …
“… From folem bigfala plan blong God we i no save finis, i mas gat wan atonmen i hapen, sapos no, evri man bae i mas ded nomo” (Alma 34:8–9).
Mi bin ridim abaot Jisas Kraes taem i visitim ol nara sipsip blong Hem long Amerika blong bifo, mo mi bin save se Hem i God blong evri nesen. Hem i bin talem long ol pipol blong Nifae: “Yufala i olgeta we mi bin talem: Ol narafala sipsip we mi mi gat we oli no blong yad ia; olgeta tu mi mas karem i kam, mo bae oli harem voes blong mi; mo bae i gat wan yad, mo wan man blong lukaotem ol sipsip” (3 Nifae 15:21).
Testemoni blong Mi I Bin Kam Smolsmol
Taem mi ridim Buk blong Momon, fet blong mi long Jisas Kraes i bin kam moa klia mo andastaning blong mi long saed blong plan blong Hem, i gro moa (luk long Alma 32:28).
Mi testifae se Buk blong Momon i ki ston blong relijin blong yumi. Tabu Spirit i bin rivilim long mi se Josef Smit i wan tru profet we i karembak Jos blong God long wol ia mo hem i bin transletem Buk blong Momon aot long ol gol plet. Buk blong Momon i testifae abaot Jisas Kraes, mo we i wok tugeta wetem Baebol. Tugeta oli testifae se Jisas Kraes i tru pikinini blong God mo we Hem i God blong evri nesen, i no wan nomo.