Te mau hoa na te ao atoa nei
O Bárbara vau, no te fenua Tireni
¡Hola, amigos !*
Te ora nei Bárbara i te fenua Tireni, te hoê fenua i te pae tooʻa o te râ i Amerika Apatoʻa. E fenua roa e te rairai mai te huru te hoê ripene. Te vai nei te tahi mau vahi veʻaveʻa (mai te medebara no Atacama), e te tahi mau vahi haumarû e te rarirari (mai Rapa Nui). Te ora nei oia i te oire pû no te fenua Tireni, Santiago.
O vau ana‘e te melo o te Ekalesia i roto i ta’u piha haapiiraa. Ua fana‘o ïa vau no te parauraa i to’u mau hoa no ni‘a ia Iesu Mesia e te Buka a Moromona. I te hoê taime, ua ani mai te hoê hoa rahi ia’u ia haapii ia’na i te pure. E ua na reira vau. E i muri iho, ua pure maua i te taime tamaaraa i te fare haapiiraa.
E vaʻu matahiti to’u, e e piti taea‘e apî to’u. Te tamata nei au ia riro ei tuahine maitai no raua, ia haapa‘o ia raua e ia haʻuti na muri iho ia raua. E mea au na’u ia haapa‘o i te tamarii. Ia paari au, ua hinaaro vau ia riro ei orometua haapii.
I te matahiti 2013, ua ti‘a to’u e vaʻu matahiti e ua bapetizohia vau e ua haamauhia e to’u metua tane. Ua anaanatae roa vau ! E ohipa taa ê teie ta’u e haamana‘o noa.
E faahanahana matou i te mau mahana fafaaearaa arearea i te fenua Tireni. I te 18 no setepa, te mahana no to matou ti‘amâraa, e i te 19 te mahana no te nuu faʻehau. I te roaraa o na mahana e piti, e ori matou i ta matou ori tumu, te ori « La Cueca » e e amu matou i te pai inaʻi, tei piihia te empanadas.
I te mau hopea hepetoma, e mea au na to’u utuafare ia hahaere na raro e na ni‘a i te pereoo na roto i te mouʻa, e mea fatata i to’u fare. E mea au atoa na matou ia haere i te pae tahatai.
E maa taa ê ta matou i te oroʻa Noela—e tomati tei tuuhia te parapara tuna i roto. I te fenua Tireni, e haere mai papa Noela i te tuiraa pô o te pô Noela. E vai ara noa matou no te tia‘i ia’na ia haere mai !
Pae atau : faahoho‘araa o te pute na Thomas S. Child