E raau ta‘ero au roa ino

Alison L. Randall, Utah, te mau Hau Amui no Marite

I te haereraa vau i rapae i te fare no te tii i te veʻa papaʻi, ua au ore au i te mea ta’u i ite. Ua ofaa te ro uira inapo ra, e te teretere ra ratou na te hiti o teie vahi haereraa taata, na roto i te aihere.

Noa’tu â pai aita maua i ora maoro na i Texas nei, i te mau Hau Amui no Marite, ua ite râ vau e, no te mauiui o te hohoni, eita e û, i piihia ai ratou mai te reira. Ua tere atu vau i te vairaa pereoo, tei reira atoa te mau raau taʻero. E ua tai‘o atura vau i te mau arata‘iraa i ni‘a i te parau.

« E mea au roa ino teie [raau taʻero] na te ro uira », te reira tei papa‘ihia. « E riro ratou i te taʻitaʻi i te reira i roto i te ofaaraa, e faaamu atu ai i te ariivahine, e ua oti, ua pohe te ofaaraa ». I roto i te mau arata‘iraa, te parauhia nei ia tûtû rii i te tahi raau na ni‘a e na te hiti o te ofaaraa. E na te ro e faaoti i te ohipa.

Aita vau i ti‘aturi roa. I roto i to’u feruriraa, e mea navaʻi te maramarama o te ro uira, inaha ua oti ia ratou i te hamani i to ratou ofaaraa i roto i te hoê noa pô. Ua feaa rii au e topa mai ratou i roto i te herepata o teie raau taʻero, ua tûtû noa râ vau i te reira.

Aita i maoro roa, te arepurepu ra te ofaaraa. Ua faaatea mai au e ua faaea no te hi‘o i te arepurepuraa. Ua horo haere noa ratou mai te huru ra e maa mana tei topa mai na te ra‘i mai. E te taʻitaʻi ra ratou i teie raau uouo i roto i to ratou paati iti ma te tôtêtê haere te tahi i ni‘a i te tahi i roto i ta ratou hororaa no te afaʻi i teie raau taʻero i roto i te ofaaraa.

Ua hiʻo noa vau ma te maere rahi. Na ratou iho e hopoi i teie raau taʻero i roto i to ratou fare. E au e, aita te mau parau « au roa ino » i hape. Na roto i te tahi rave‘a, ua manuïa te taiete raau taʻero i te faariro i te hoê mea ino—te hoê mea haapohe—ei mea huru maitai roa ino.

Aita vau i ite a‘enei i te hoê hi‘oraa papû no te faariroraa i te ino ei hi‘oraa maitai. E ua mana‘o roa vau i teie huru ohipa ta Satane e rave atoa nei. E mana‘o tamărû tei tae mai a feruri ai au e, noa’tu â e tûtû mai oia i te tahi raau taʻero na te hiti o to’u fare, eita ta’na e nehenehe e afaʻi roa mai te reira i roto—maoti râ, na’u iho e faati‘a ia’na. E no reira, nahea ta’u e nehenehe e vaiiho i te reira i rapae ?

Ua puta mai te hoê o ta’u mau irava au roa a‘e : « « Inaha hoʻi, ua horo‘a-noa-hia mai te Varua o te Mesia i te mau taata atoa ra ia ite ratou i te maitai e te ino ». E maoti teie Varua, te faataa mai nei Moromona e, « e ti‘a ia [tatou] ia ite papû roa e », no ô mai anei i te Atua e aore râ ia Satane (Moroni 7:16).

Ua riro teie ohipa no te mata‘ita‘iraa i teie mau ro pohe i te faaî ia’u i te mauruuru, i te mea e, ua nehenehe ta maua ta’u tane ia hi‘opo‘a e ia ite papû i te mea e hopoi i roto i to maua nei fare. Te haapiiraa i ta maua nei mau tamarii ia pee i te Varua o te Mesia, o ta maua ïa ohipa, ia nehenehe atoa ia ratou ia ite e raau taʻero tera, ia farerei noa’tu ratou i te reira.

A faaea noa ai au i reira, no te hi‘o i teie mau ro i te taʻitaʻiraa i te toeʻa o te raau taʻero i roto i te ofaaraa, ua euhe au ia rave i te mea atoa e roaa ia’u no te patoʻi i te raau taʻero i rapae i to’u fare.

I roto i te mau arata‘iraa, te parauhia nei ia tûtû rii i te tahi raau na ni‘a e na te hiti o te ofaaraa. E na te ro e faaoti i te ohipa.