To tatou nohoraa, to tatou utuafare
Te mafatu o Lizochka
Te ora nei te taata papa‘i i te fenua Belegika.
Hoho‘a faahoho‘araa na Annie Henrie
Ua tomo maua ta’u tane i roto i te Ekalesia i te fenua Rusia, i te matahiti 1995, e ua taatihia maua i te matahiti no muri mai i te hiero no Stockholm Suede. Ua taati-atoa-hia ta maua na tamahine e piti ia maua. E piti matahiti i muri iho, ua haamaitaihia maua no te mea ua fanau mai maua i te hoê faahou â tamahine, o Lizochka. Te tere maitai ra to matou oraraa. Ua oaoa roa matou paatoa. E piti râ mahana i muri mai i to’na faanauraahia mai, ua fifi ta maua aiû no te tamaaraa. I roto hoê avaʻe, e 300g noa tei noaa ia’na.
Ua parau mai te mau tuati i te fare utuuturaa tamarii ia faatamaa pinepine ia’na. Te ite ra vau e, te poʻia ra oia, aita râ ta’na e nehenehe e tamaa maitai. I te hopea, ua afaʻi ta’u tane ia’na i te fare maʻi o te oire. Oioi roa te taote i te horoʻa mai i te mâhuʻiraa maʻi—e fifi mafatu i te fanauraa. Hoê o te mau api mafatu (valve) tei ino, e aita’tura te taheraa toto i navaʻi roa i roto i te mahaha, no reira ua fifi oia no te huti i te aho e no te tamaa.
Titauhia te tapuraa a te taote, teie noa râ, i Rusia, te tamarii apî roa a‘e tei tapuhia no teie maʻi, e piti ïa matahiti to’na. Hoê noa hoʻi avaʻe to ta maua nei tamahine. Ua horo‘a mai te taote i te raau na’na ma te parau e, ia paari rii ana‘e oia, e ravehia te tapuraa.
Hoê avaʻe i muri iho, ua ino faahou atu Lizochka, e ua horo matou i te fare maʻi. Tei roto oia i to’u na rima a tere noa ai matou na ni‘a i te pereoo. Tei ni‘a noa to’na mata ia’u, mai te huru ra e, te tiaoro ra oia i te tauturu. Ahani e, e ere au i te melo o te Ekalesia, e aha ra ïa ta’u e rave. E ua tuu râ maua ta’u tane i to maua ti‘aturiraa i roto i te Fatu ma te ti‘aturi e, e tupu maitai te ohipa. Ua tamata vau i te tamărû ia’na, ua na ô vau, « eiaha roa’tu e mataʻu, e ta’u aiû iti. Ua here te Atua ia tatou. Na’na e tauturu mai ia tatou, e e maitai te mau mea atoa ».
E ua tapae atura matou. Ma te tape‘a noa ia’na i roto ia’u, ua horo vau i te vahi fariiraa taata maʻi Ua haamata te mata o Lizochka i te piri. Ua fifi to’na hutiraa aho. Ma te ʻuʻu noa, ua parau vau i te taote no ta’u tamarii, e na te mau tuati maʻi i rave ia’na i roto i te piha utuuturaa rû. Ua parau mai te taote e, te haamata ra to’na mahaha i te oruoru, no reira ua tuu ratou i te hoê matini no te tauturu i to’na hutiraa aho.
I te mahana no muri iho, ua paraparau maua i te tiʻa faatere no te tuhaa tapu mafatu. Ua parau mai oia, « Ua rave a‘ena vau i teie huru tapuraa, e tamarii paari a‘e râ. Ehia to’na matahiti ? »
« E piti avaʻe », ta maua ïa i parau atu.
« Te mauiui noa ra oia. E mea naʻinaʻi hoʻi oia, e te oruoru ra to’na mahaha e te fifi noa’tura oia, eiaha tatou e faataere faahou atu. Aita vau i rave a‘enei i teie huru tapuraa i ni‘a i te aiû apî roa. E tamata vau i te rave i te mau mea atoa e ti‘a ia’u. Na outou râ e hoo mai i na api mafatu haavare toopiti, e mea moni rahi hoʻi—taʻiohia $2 100. I roto e maha mahana, e ravehia te tapuraa ».
E aha pai ta maua e rave ? Aita hoʻi ta maua teie tino moni, e aita atoa ta te mau taata ta maua i mâtau. Atira noa’tu, ua faaroo te tahi puʻeraa i te parau no to maua fifi, e na roto i to ratou aroha e te aroha o te Fatu, ua ti‘a ia maua ia faati‘a i tera tino moni. Ua hoo mai ta’u tane i te api mafatu tei titauhia no te faaora i ta maua nei tamarii.
Ua pure te mau taea‘e e te mau tuahine no ta maua amaa e ua haapae i te maa no ta maua tamahine, hau atu râ, ua na reira atoa te mau misionare e te tahi atu feia moʻa o te oire. Ua ite roa maua i to ratou tururaa ia maua. E te parahi ra maua i roto i te fare maʻi i te mahana no te tapuraa, ua putapu roa maua i te Varua Maitai e i te mau pure o to maua mau taea‘e e mau tuahine. Ua ite roa maua e, tei piha‘i iho ratou ia maua ! E tei reira atoa te Atua no te arata‘i i te mau taote tapu. Eita roa Oia e faaruʻe ia maua, e e tere maitai te mau mea atoa.
I te matararaa mai te taote tapu mai roto mai i te piha tapuraa, ua maere rii oia, e ua parau mai, « Ua tupu maitai te mau mea atoa. Ua tamau matou i te api mafatu. Aita vau i ite nahea ra, ua manuïa râ ta matou ohipa ». Ua ite râ maua nahea ratou i te manuïaraa. Ua haamaitai te Metua i te Ao ra ia’na.
Ua mau Lizochka i te fare maʻi e toru mahana, e ua iti mai te oruraa o te mafatu e o te mahaha. Ua tapuhia oia e ua tapiri-rii-noa-hia te vahi tapuraa, e te tahi mahana i muri iho, ua tapu faahou â ratou no te faaoti-roa-raa i te tapiri i to’na ouma e te mau melo tei tapuhia. Aita paha te mau taote i mana‘o rii a‘e e, e ora mai oia. Matou nei râ, ua ti‘aturi matou i te Metua i te Ao ra e To’na mana, e ua ti‘aturi atoa matou e, mai te peu te reira mau To’na hinaaro, e maitai mai oia.
O te Atua ana‘e te nehenehe e faahoʻi mai ia Lizochka iti. Pauroa te mahana, ua maitai rii mai oia. Ua mau oia i te fare maʻi hoê faahou avaʻe, e i teie nei, tei te fare oia ia matou nei.
E Atua semeio te Atua. Te faaroo nei Oia i ta tatou mau pure, e ia tae i te mau taime fifi, Na’na e amo ia tatou. Na te mau tamataraa e haapuai i to tatou faaroo ma te haapii ia tatou ia ti‘aturi, ia tia‘i e ia here.