Nahea i te ui atu i te mau uiraa faufaa rahi
E nehenehe i te mau uiraa tano e haamatara i te aau o te taata ia tomo atu te hoê iteraa papû no te parau mau.
E rave‘a ta outou no te haapii i te taata atoa na piha‘i iho ia outou, i ni‘a anei i te hoê tere hoê minuti na ni‘a i te pereoo mataeinaa, i roto anei i te hoê haapiiraa i te fare pureraa, na ni‘a anei i te reni natirara e aore râ na roto i te hoê aparauraa papû e te hoê hoa.
Teie i muri nei te tahi mana‘o no te haamanuïaraa i te hoê haapiiraa noa’tu te huru : a ui i te mau uiraa.
Na te uiraa maitai e arata‘i i te haapiiraa maitai, e auaʻe maoti, e nehenehe ta outou ia tuatapapa, ia tamatamata e ia apo roa mai nahea i te ui atu i te mau uiraa maitai. Teie te huru.
A ui atu i te mau uiraa faufaa rahi
Te mau uiraa faufaa rahi, o te mau uiraa ïa e faaferuri hohonu ia outou, o te fafa i to outou aau, o te mau uiraa e arata‘i ia outou i te parau mau, i te iteraa papû e i te tauiraa. Ua puʻe noa te reira noa’tu te tumu parau, areʻa râ, te vai nei ihoa te tahi mau mea e faatuʻati ia ratou : (1) e ere te reira i te parau taora noa e aore râ parau no te hoê noa ohipa (noa’tu pai e nehenehe i te reira ia tauturu atu i te mau uiraa no ni‘a i te hoê ohipa), (2) te vai nei te hoê tuʻatiraa i ni‘a i to tatou oraraa i te mau mahana atoa, e (3) e titau te reira ia tatou ia horo‘a i te hoê pahonoraa hau atu i te hoê pahonoraa tei faanaho-a‘ena-hia.
A haamana‘o no te aha tatou e ui ai i te uiraa
Na te uiraa e faatupu i te hoê apoo i roto i to tatou feruriraa ia faaîhia te reira. Teie te tahi ohipa taa ê o te nehenehe e tupu, ia uihia te uiraa e titau i te feruriraa i roto ia’na :
-
E anaanatae mai te taata i te mea ta outou e parau nei.
-
E faa‘ohipa ratou i to ratou ti‘amâraa no te feruri e no te faahiti i te hoê pahonoraa.
-
Na teie faa‘ohiparaa i te ti‘amâraa e faati‘a i te Varua Maitai ia faa‘ite papû ia ratou i te parau mau.1
Ia vai ana‘e teie faanahoraa i roto i to outou feruriraa, e ite ihoa outou eaha te mau uiraa e ui atu e eaha te haapae atu.
A haamana‘o, te haapii ra outou i te taata, e ere i te haapiiraa noa
Mai te peu ua mâtau outou i te taata ta outou e haapii ra, e e feruri outou i to ratou mau hinaaro, e ma‘iti outou i te mau uiraa e tano no te tauturu ia ratou, eiaha râ no te faahiti noa’tu i te tahi mau mana‘o.
Tuatapapa e feruri maite
No te faaineine ia outou no te haapii i te evanelia, a tuatapapa i te mau papa‘iraa mo‘a e te haapiiraa a te mau peropheta e a te mau aposetolo no teie anotau, ei reira a pure ia parahi mai te Varua Maitai i rotopu ia outou e te feia ta outou e haapii ra (hi‘o PH&PF 42:14 ; 50:21-22).
Teie atoa te tahi mana‘o, ia hinaaro outou ia ui i te taata i te mau uiraa e faaferuri ia ratou, titauhia ia outou iho ia rave i te reira ohipa. A feruri maite i te mea ta outou e tuatapapa nei. E ite outou e, te mea e faaferuri rahi roa a‘e ia outou, o te mau uiraa ïa tei tae mai i te roaraa o teie ohipa. A vai ara noa i te mau huru uiraa e faaferuri ia outou. Tera mau te mau uiraa e arata‘i mai i te hoê hi‘oraa e te hoê iteraa papû rahi a‘e, te reira atoa te huru uiraa ta outou e nehenehe e ui atu no te tauturu ia vetahi ê ia haapii i te evanelia.
Faaohie i te haereraa i ni‘a i te mau uiraa fifi a‘e
I te tahi taime, e mea au roa a‘e ia faaohie i te haereraa i ni‘a i te mau uiraa mana‘o hohonu a‘e e te faaferuri a‘e i te taata iho, e no reira e nehenehe e ui i te hoê uiraa omuaraa i te haapiiraa, e uiraa ohie ia pahono e ei reira e haere atu ai i ni‘a i te mau uiraa e titau i te pahonoraa hohonu a‘e. Teie te tahi mau hi‘oraa ohie :
|
Uiraa omuaraa i te haapiiraa |
Uiraa hi‘opo‘a |
|
E hia matahiti to Iosepha Semita i te haereraa ona i roto i te Uru Raau Moʻa ? |
E aha te taime outou a pure ai i te Metua i te Ao ra mai teie huru hinaaro aau tae to Iosepha ? |
|
Te ti‘aturi ra anei outou i te Atua ? » |
E aha te ti‘araa o te Atua i roto i to outou oraraa ? |
|
E aha ta outou i rave i teie mau mahana no te tavini ia vetahi ê ? |
Nahea te iteraa e, e mau tamarii tatou paatoa na te Atua e faataui ai i to tatou feruriraa i te taviniraa ? |
Mai te mea e, e imi outou i te arata‘iraa a te Varua Maitai a ui ai outou i te mau uiraa, e riro outou i te ui mai i te uiraa tano i te taime tano. Aita outou i ite. E faataui te reira i te oraraa o te hoê taata.
Te mau haapiiraa no te sabati
Parau tumu no teie avaʻe : Ia rahi atu te riroraa mai te Mesia te huru
Faahoho‘araa na Sergey Markov/Hemera/Thinkstock ; faahoho‘araa o te upoo na johavel/iStock/Thinkstock
Faahoho‘araa o te rima na ilyast/iStock/Thinkstock