Ta’u pure i ni‘a i te Moana Apatoʻerau

Olaf Thorlief Jensen, Utah, te mau Hau Amui no Marite

I te 17raa o to’u matahiti, ua ora matou i ni‘a i te hoê motu i te pae apato‘a no Norevetia, tei parauhia Andabeløy. Ua faafariuhia to’u metua tane i te Ekalesia i Andabeløy, e ua bapetizohia vau i roto i te moana i reira.

E taata ravaai au i tera ra tau, e ua mâtau maitai au i te faahoro i te poti. Ua horo‘a mai to’u metua tane ia’u i te hoê poti ia faahoro, e poti faauta taata to matou.

I te hoê mahana, i te matahiti 1941, ua taniuniu mai te taote no Flekkefjord, i te mau pae apatoʻerau. Te vai ra te hoê vahine e titau nei i te rapaauraa, e piti hora te atea na ni‘a i te poti. Ua ani mai te taote Hoffman ia’u ia faauta ia’na i te vahi o teie vahine, ua pe‘ape‘a rii râ to’u na metua no te vero rahi i tera mau mahana, i ni‘a i te Moana Apatoʻerau. Ua faaoti matou ia pure, no te ani i te Metua i te Ao ra i te mea e rave. Ua farii matou i te pahonoraa e, e tere atu.

I te haapouraa vau ia Tryg, to’u poti 31 avae, i ni‘a i te miti, te farara maira te mataʻi, e ua teitei roa te are miti. Ua tii atu vau i te taote, e fano atura maua, ua faaruʻe maua i te ooa e tei tua maua. Te fano ra maua haere ti‘a’tu i te pae apatoʻerau no Lista, tei reira teie pŭpŭ taata, tei ni‘a i te tahatai ofaʻifaʻi, i te pae apatoʻa no Norevetia—e ua tui te roo o teie vahi no te mau vero e te mau pahi i parari.

Ua faahoro noa vau i to maua poti i roto i te vero e tapae atura maua i mua i te hoê ava, 12 m te aano, tei ô atu to maua tapaeraa. Ua mataare te miti, e ua teitei roa te miti no te faatere i te poti na roto i te ava, ua tupaʻi atoa te miti i ni‘a i te ava.

« E aha te rave ? » ua ani mai te taote a paaina noa ai te mataʻi.

« E pure taua », ua pahono atu vau.

Ua tape‘a vau i te poti no te pure, ma te ani i te Metua i te Ao ra i te arata‘iraa. I te otiraa ihoa te amene, ua tae papû mai te pahonoraa. Ua puta mai i roto i to’u mana‘o te aamu ta te hoê taata ravaai, e taata paari, i faati‘a mai. Te taiʻa ra oia i teie mau vahi e ua paaina a‘era te vero, e aita i ti‘a ia’na ia hoʻi i tatahi. E te tia‘i noa ra oia ia marû mai te vero, ua ite a‘era oia i tereraa o te mau are. E toru are teitei te fati mai, e ia oti, no te tahi taime poto, e marû rii mai te miti—ua navaʻi râ teie area taime no te tomo atu na te ava.

Ua maoro vau i te taiʻaraa na teie mau vahi, aita râ vau i haapa‘o a‘enei i teie huru o te are miti. Atira noa’tu, ua faatano vau i te poti i mua i te ava, e ua tia‘i maua i na are miti teitei e toru ia fati mai. E te reira ihoa, ua marû rii mai te miti i muri iho. Faahee a‘era vau i te poti na ni‘a i teie miti marû no te tomo i roto i te ooa e ua tapae a‘era te taote Hoffman i tatahi. Ua horo oia i te fare o teie vahine tei maʻihia, a tia‘i noa ai au i roto i te poti, ma te mauruuru rahi i te Metua i te Ao ra no To’na pahonoraa mai i ta’u pure.

I te hoʻiraa mai te taote hoê hora i muri iho, ua tuô mai oia, « Ua ora teie vahine ia taua ! »

Hau mai nei te aau i teie parau apî e te maitai atoa ra hoʻi te reva, e ua hau noa to maua tere hoʻiraa.

Te faaite papû atu nei au e, ia hinaaro noa’tu tatou i te tauturu, e ti‘a ia tatou ia pure. Ua ite au e, e pahono mai ihoa te Metua i te Ao ra.

Ua teitei roa hoʻi te mau are miti e aita i mau maitai te poti no te tomo na te ava.