I ni‘a i te miti ra
Te ora nei te taata papaʻi i Utaha, te mau Hau Amui no Marite.
I taparu noa na vau i te Metua i te Ao ra ia tâtara i to’u ahoaho e to’u hepohepo, areʻa râ ahiri aita teie mau tamataraa, eita paha ïa vau e tae atu i te fenua i parauhia ra, i reira Oia i te arata‘iraa ia’u.
E ono avaʻe i muri mai i te noaaraa ta’u parau tuʻite no te fare haapiiraa tuatoru, ua haamata vau i te faaruru i te tahi mataʻu rahi, te tahi taime ahoaho e te tahi are faaturumaraa. Aita vau i ite noa’tu no hea mai teie mau mana‘o, e mau mana‘o puai râ e te haamae.
Ua aro noa vau ia papû to’u mana‘o. I te ohipa, mai te huru ra e, pauroa te ohipa apî e faatupu mai i te ahoaho e aita a‘e ta’u e nehenehe e parahi hau noa. Mai te huru ra e, te horo nevaneva ra to’u feruriraa, e puai roa to’u mafatu i te otuʻituʻi, e au e, te matara maira na roto mai i to’u ouma. E ua tupu noa mai te reira tau mahana, e ia hoʻi au i te fare i te mau mahana atoa, te marua nei au i raro. E ia araara rii a‘e au, ua hope a‘ena te pô e te haamata ra te tahi faahou mahana ohipa.
Ua tamau noa teie mau mana‘o tau avaʻe, noa’tu â ua itehia mai ia’u te tahi toroʻa ohipa apî e te tahi tauturu i roto i ta’u ohipa.
Ua pure noa vau i te mau poʻipoʻi atoa ia haere atu vau i te ohipa, ia roaa mai te puai ia hope tera mahana ia’u e ia hoʻi au i te fare e ta’u vahine e ta’u tamahine. Aita reʻa e hopea ta’u e ite ra no teie aroraa na’u, e ua tae pinepine mai te mana‘o faaruʻe. Ua rahi roa te mau mahana ta’u i taparu noa i te raʻi ia tauturu mai, e te roimata atoa hoʻi. Ua pure au ma te mana‘o papû, aita e faaauraa, ua taparu vau i te Metua i te Ao ra ia tauturu mai ia’u ia maramarama i teie tamataraa e ia iriti atu i te reira.
Tei roto roa vau i te po‘iri e te hepohepo a ore ai au i putapu i te Varua. I te faateiteiraa râ te Varua ia’u mai roto mai i to’u tapinevaraa, ua itehia mai ia’u te ti‘aturiraa no te haere â i mua—ia tae noa’tu pai i ta’u pure no muri iho. Ua haapii au ia turuʻi i ni‘a i to’u Metua i te Ao ra eiaha i te pure noa no te taime tamaaraa e aore râ i te pure faahiti noa i te pô. Ei faahopearaa, ua haafatata rahi aʻe au Ia’na.
Taorahia e te mau are
I roto i to’u ahoaho e to’u hepohepo, ua tai‘o e ua tai‘o faahou â vau i te aamu o te ati Iareda, to ratou tereraa na ni‘a i te « moana rahi » (Etera 2:25). Tei ni‘a noa vau i te feruriraa i to ratou mana‘o taiâ a tomo ai ratou i roto i te mau pahi. E mea riʻariʻa paha teie tere to ratou, ua ite râ ratou e, te fano ti‘a ra ratou i te hoê « fenua e hau i te mau fenua atoa i te maitai » (Etera 2:15).
No ni‘a i teie tere to ratou, te tai‘o nei tatou e :
« Ua faafarara maira te Fatu te Atua i te hoê mataʻi rahi roa i ni‘a iho i te miti i te pae i te fenua i parauhia ra ; e ua tere tahurihuri noa atura ratou i ni‘a i te mau are i mua i te mataʻi.
« E ua paremo pinepine ihora ratou i raro i te mau vahi hohonu o te moana, no te are mouʻa tei fati mai i ni‘a iho ia ratou, e te vero rahi e te riaria hoʻi tei tupu i te puai rahi o taua mataʻi ra.
« … Ia haatihia ratou i te miti rahi, ua tiaoro atura ratou i te Fatu e na’na ratou i arata‘i faahou mai i ni‘a i te miti ra.
« E te haere ra ratou i ni‘a i te moana, aita te mataʻi i faaea i te haere i te pae i te fenua i parauhia ra ; e na reira ratou i te puhia i mua i te mataʻi ra » (Etera 6:5-8).
Mai te huru ra, no’u iho nei teie mau irava. Mai te huru ra e, tei roto vau i to’u pahi, e te taʻiri maira te mau mataʻi ahoaho ia’u e te horomii ra te mau are faaturumaraa ia’u i roto i te hohonu o te hepohepo. E ia « haatihia » vau, e tiaoro atu vau i te Fatu no te hoʻi mai i ni‘a, ei reira e tomo faahou ai i roto i te hohonu.
Ua tai‘o faahou vau i te irava 8 : « E te haere ra ratou i ni‘a i te moana, aita te mataʻi i faaea i te haere i te pae i te fenua i parauhia ra ; e na reira ratou i te puhia i mua i te mataʻi ra » (reta tei faahuru-ê-hia). I reira puta mai nei te mana‘o. Teie mataʻi tei faatupu i te mau are mouʻa no te faaparemo i te mau pahi, ua haamaitai atoa hoʻi i te mau ati Iareda i ni‘a i to ratou tere. I taparu noa na vau i te Metua i te Ao ra ia tâtara i to’u ahoaho e to’u hepohepo, areʻa râ ahiri aita teie mau tamataraa, eita paha ïa vau e tae atu i te fenua i parauhia ra, i reira Oia i te arata‘iraa ia’u.
Ua taui roa teie mau irava i to’u hi‘oraa i te oraraa. Ua faarahi to’u ahoaho e to’u faaturumaraa i to’u turuʻiraa i ni‘a i te Metua i te Ao ra. Ahiri aita te mataʻi e te mau are, eita paha ïa vau e ite i te Atua mai ta’u i ite Ia’na—e eita atoa paha te mau ati Iareda e tapae i te fenua i parauhia ra.
I teie nei, ua ma‘iri tau matahiti, aita faahou to’u mau mataʻi ahoaho e taʻiri ra e aita te mau are faaturumaraa e faaparemo ra ia’u. Ia farara noa mai te vero, e tiaoro vau i te Fatu e e haamauruuru atu vau, no te mea ua ite au e, eita ta te moana mania e nehenehe e turaʻi i te mau pahi i te fenua i parauhia ra—o te miti puai râ.
Faahohoʻaraa na Jerry Harston