Te Evanelia i roto i to‘u oraraa
To’u iteraa papû firi
Te ora nei te taata papaʻi i te fenua Singapour.
No’u nei, e parau mau firi te parau mau o te evanelia a Iesu Mesia e te parau mau no te Buka a Moromona. Mai te mea e parau mau te evanelia, e parau mau atoa ïa te Buka a Moromona.
Ua haapii te mau misionare i to’u utuafare i te evanelia i to’u fare i Singapour. Aita to’u metua tane i tomo mai i roto i te Ekalesia, ua tomo mai râ to’u metua vahine. Ua haapii mai oia ia matou no ni‘a ia Iesu Mesia e Ta’na evanelia. I to’u naʻinaʻiraa, e teʻoteʻoraa no’u ia parau i to’u mau hoa e, e Feia Mo‘a vau i te Mau Mahana Hopea Nei.
Ua ti‘aturi noa vau i te mau haapiiraa a to’u metua vahine. I te tomoraa’tu râ vau i roto i te feia apî paari, ua ani mai te hoê misionare ia’u e hia taime to’u tai‘oraa i te Buka a Moromona. Ua ani-a‘ena-hia vau i teie uiraa, i tera ihoa râ taime, ua taa a‘era ia’u e, no te mea aita vau i tai‘o i te Buka a Moromona, aita atoa ïa vau i ite e, e parau mau anei.
Hoê ohipa eita e nehenehe e huna
Aita faahou ta’u e nehenehe e ape, hoê ohipa eita e nehenehe e huna e parau mau firi te parau mau o te evanelia a Iesu Mesia e te parau mau no te Buka a Moromona. Mai te mea e parau mau te evanelia, e parau mau atoa ïa te Buka a Moromona. No te mea hoʻi aita vau i ite e, e parau mau anei te Buka a Moromona, ua feaa atoa ïa vau i teie nei i te mau mea ta’u i ti‘aturi a paari noa ai au. Ua reru roa to’u feruriraa, e ua tae mai te uiraa— « E parau mau anei te Buka a Moromona ? »—tei roto noa ïa i to’u aau.
E no te papû-atoa-raa o to’u auraa e te Faaora, o Iesu Mesia, ua tae atoa mai te hoê hiaai no te parau mau. Te mahana a ite ai au e, eita ta’u e nehenehe e haapii navaʻi no ni‘a ia Iesu Mesia maori râ ia tai‘o papû vau i te Buka a Moromona, te reira atoa ïa te mahana ua tupu rahi roa ino to’u hiaai ia ite e, e parau mau anei.
Piihia ei orometua
Ua pure au no te ani i te arata‘iraa. I tera atoa taime, ua pii mai to’u peresideni amaa ia’u ei orometua i roto i te piha no te parau haapiiraa no te evanelia, no ni‘a i te Buka a Moromona. Ua farii au i te piiraa no te mea ua mana‘o vau e, o te reira paha te pahonoraa a te Fatu no te tauturu ia’u ia ite i te parau mau no ni‘a i te Buka a Moromona e ia haafatata a‘e i te Faaora.
Ua fifi au i te haapiiraa. Ua ma‘iri te tahi mau sabati, e ua ite a‘era vau e, eita vau e manuïa maitai maori râ ia ti‘aturi au i te Buka a Moromona.
Ua hohora noa mai te mau aamu, te hoê pene i muri mai i te tahi
Ua haamata vau i te tuatapapa i te Buka a Moromona i te mau hepetoma atoa e oioi roa to’u iteraa i te popou i roto i ta’u tai‘oraa. Ua hohora noa mai te mau aamu o te Buka a Moromona, te hoê pene i muri mai i te tahi, e ua haafatata te reira ia’u ia Iesu Mesia.
Ua tai‘o vau i te parau no te fanauraa o te Mesia, ta Nephi i ite i roto i te hoê orama :
« E hi‘o atura vau, e ite atura i te oire rahi ra ia Ierusalema, e te tahi mau oire hoʻi. E ite atura hoʻi au i te oire ra o Nazareta ; e i roto i te oire ra i Nazareta, i ite au i te hoê paretenia, e e mea nehenehe roa e te uouo hoʻi oia…
« E ua parau maira oia ia’u e, Inaha, te paretenia ta oe e hi‘o nei, o te metua vahine ïa o te Tamaiti a te Atua i te tino ». (1 Nephi 11:13, 18).
Ua tai‘o au i te parau no te faanahoraa oaoa e ua haapii mai au e, e mea titauhia te faaroo ia Iesu Mesia no to tatou faaoraraa. Ua haapii Amuleka :
« Ua ite au e, e tae mai te Mesia i rotopu i te tamarii a te taata, ia rave i ni‘a ia’na iho i te mau hara a to’na ra taata, e ia riro oia ei taraehara no to te ao nei ; ua parau mai hoʻi te Fatu te Atua i te reira…
« Mai te au hoʻi i te rave‘a rahi a te Atua mure ore ra, ia faati‘ahia te hoê taraehara e ti‘a’i, e ora ïa, ia pohe mau te taata atoa e ti‘a’i » (Alama 34:8-9).
…Ua tai‘o vau i te parau no te taviniraa a Iesu Mesia i rotopu i teie mau mamoe ê To’na i Amerika Tahito, e ua ite roa vau e, o Oia te Atua o te mau nunaa atoa. Ua parau Oia i te mau ati Nephi : « E oia mau ta’u e parau atu ia outou, no outou ta’u parau ra, a na ô atu ai au e, E mamoe ê atu â ta’u, e ere i to teie nei aua, e arata‘i atoa mai au ia ratou e ti‘a’i, e faaroo mai hoʻi ratou i to’u reo, ia hoê a‘e nana, e hoê hoʻi tia‘i » (3 Nephi 15:21).
Ua tae marû mai to’u iteraa papû
A tai‘o noa ai au i te Buka a Moromona, ua teatea to’u faaroo ia Iesu Mesia e ua aano to’u haroʻaroʻaraa i Ta’na faanahoraa (hi‘o Alama 32:28).
Te faa‘ite papû nei au e, o te Buka a Moromona te ofa‘i tape‘a fana o ta tatou haapa‘oraa. Ua heheu mai te Varua Maitai ia’u e, e peropheta mau Iosepha Semita e na’na i faaho‘i-faahou-mai i te Ekalesia a te Atua i ni‘a i te tino o te fenua e na’na i iriti i te Buka a Moromona mai roto mai i te mau papaa auro. Te faa‘ite papû nei te Buka a Moromona no Iesu Mesia e ma te ohipa apipiti e te Bibilia. Toopiti raua e faa‘ite papû nei e, o Iesu Mesia te Tamaiti mau a te Atua e o Oia te Atua o te mau nunaa atoa, eiaha hoê noa.