Pato‘iraa no ta’u misioni
Te ora nei te taata papa‘i i Manaus, i Beresiria.
I muri mai i ta’u uiuiraa no ta’u misioni, ua parau mai to’u peresideni tĭtĭ e, « e tupu mai te tahi mau ohipa huru ê i roto i to oe oraraa no te tamata i te faataui i to oe mana‘o ».
Faahohoʻaraa na Greg Newbold
Ua tomo vau i roto i te Ekalesia i te 15raa o to’u matahiti, e maha matahiti i muri iho, ua hapono vau i ta’u puʻe parau no te misioni. I roto i ta’u uiuiraa e to’u peresideni tĭtĭ, ua haapopou mai oia ia’u no to’u faaotiraa ia tavini i te Fatu ei misionare rave tamau. Ei reira, ua parau mai teie faatere faaûru i te hoê mea tei vai noa i roto ia’u : « E te taea‘e, mai teie taime atu, e tupu mai te tahi mau ohipa huru ê i roto i to oe oraraa no te tamata i te faataui i to oe mana‘o no ni‘a i ta oe faaotiraa ia tavini i te Fatu ».
E te tia‘i ra vau i ta’u piiraa misioni, ua tihepuhia vau i roto i te taiete Xerox no te tahi haapiipiiraa. Na teie ohipa i tauturu ia’u ia roaa mai te tahi mau ohipa no ta’u misioni e no te tauturu atoa hoʻi i to’u metua vahine i roto i te mau haamauʻaraa i te fare. Te tere maitai ra te mau ohipa.
Te hape mau, ua haamata taua « mau ohipa huru ê » nei i te tupu mai. A tahi, ua rave-ino-hia to’u metua vahine, e ua fatata roa oia i te pohe i to’na mau pêpê, ua faaherehere râ te Metua i te Ao ra i to’na ora, na roto i te tahi semeio.
I tera ra taime, te ora ra matou, to’u metua vahine, to’u na tuahine apî e piti, i roto i te hoê fare tarahu. Teie noa ta matou moni no te ora, ta’u noa moni e te tuhaa moni haʻihaʻi a to’u metua vahine, e tuhaa moni tei horo‘ahia mai no te poheraa o to’u metua tane a tau matahiti i teie nei.
Ua ani mai te tahi mau taata, mai te tahi atoa mau melo o te Ekalesia, « E tae anei ia oe ia vaiiho i to oe metua vahine no te haere i te misioni ? » Na te faaroo noa vau i teie uiraa na ni‘a iho e na ni‘a iho faahou â, ua feaa to’u aau.
I te hoê mahana ua taniuniu mai to’u peresideni tĭtĭ ma te parau mai e, ua tae mai ta’u piiraa misioni e ia haere au i ta’na piha toro‘a i tera iho pô no te tii i teie rata no ô mai i te Pû faatereraa o te Ekalesia e o ta’u hoʻi i tia‘i maoro na. E taiâ e te oaoa tei tupu i te taeraa mai teie parau apî.
I tera iho mahana, ua paraparau mai to’u paoti no te ohipa na mua a‘e i te tamaaraa i te avatea. I te tomoraa’tu vau i roto i ta’na piha toro‘a, ua farii-maitai-hia vau, e ua paraparau maua te tahi minuti rii no ni‘a i ta’u haapiipiiraa e no ni‘a i te mau mea ta’u i apo mai i roto i te taiete. Ei reira, ua parau mai teie taata tiʻamana i te hoê mea ta te taata e moemoea noa i ô i to’u oire : « E ohipa maitai ta oe e rave nei i ô nei i roto i ta oe haapiipiiraa, e ua hinaaro matou ia tihepu papû roa ia oe e ia tape‘a mai ia oe ia matou nei. E aha to oe mana‘o ? »
Ua riro teie faaotiraa ei faaotiraa fifi roa a‘e i roto i to’u oraraa. E au te mau setoni i te mure ore. Mai te huru ra e, te faaroo atoa ra vau i te mau taata e ani mai nei ia’u, e vaiiho anei au i to’u metua vahine ma te moni ore no te haere i roto i te aua misioni.
Noa’tu râ, ua haamana‘o vau i te mau mea ta’u i haapii i roto i te mau papa‘iraa mo‘a e mai roto mai i to’u feia faatere o te Ekalesia, e na roto i te hoê rave‘a mo‘a, ua ite au ma te aueue ore e, ua hinaaro te Atua ia’u ia tavini ei misionare rave tamau no Ta’na Ekalesia. Ua ite au e, e haapa‘o oia i to’u utuafare, e e nehenehe ta’u e ti‘aturi Ia’na e e tupu maitai te mau mea atoa.
Ua faataa’tu vau i to’u paoti i to’u ti‘araa, e te tavevo noa nei â ta’na pahonoraa i roto i to’u feruriraa : « I mana‘o noa na vau e, e taure‘are‘a maramarama oe, e te faaruʻe nei oe i teie ohipa o to oe oraraa taatoa ».
Ua haamauruuru maitai au ia’na no teie ohipa, e 28 mahana i muri mai, tei roto vau i te pû haapiipiiraa misionare i São Paulo, i Beresiria.
I roto i ta’u misioni, ua haapa‘o te Fatu i te hinaaro o to’u utuafare na roto i te mau hoa i roto i te Ekalesia e na roto i te tahi mau semeio. Ua maitai mai te tino o to’u metua vahine e ua fana‘o raua to’u tuahine i te ohipa.
E tupu mau iho « te mau ohipa huru ê » ia faaoti oe ia tavini i te Fatu. Areʻa, te amui atu nei au, ma te haehaa, i to’u iteraa papû i tera to ratou, tauasini e tauasini feia, tei tomo atoa i roto i te taviniraa i te Atua, oia hoʻi, ua taui roa ino te taviniraa misionare i to’u oraraa.