Hi‘o i ni‘a

Na Elder Adrián Ochoa

No te Hitu Ahuru

Mai roto mai i te aʻoraa « Hiʻo i ni‘a », Liahona, Novema 2013, 102.

« E ara outou, tamau maite â i te pure » (Luka 21:36).

I te vaʻuraa o to’u matahiti, ua tonohia matou e to’u na taea‘e fetii e piti i te hoê oire tapiri noa no te hoo mai i te maa. Ia mana‘o faahou vau, ua maere roa vau i te ti‘aturiraa o to’u mama ruau, to’u « tati » e to’u « tonton » i ni‘a ia matou. Ua ateatea maitai te reva e ua anaana maitai te mahana i to matou paʻumaraa i ni‘a i na puaahorofenua e toru.

Te tere ra matou na te mau vahi matie e ua faaoti a‘era matou e pou i raro e pata poro atu ai. No te au te haʻuti, aita matou i hiʻo i ni‘a e aita matou i ite i te mau ata poiri e tapoʻi ra i te reva. E i te iteraa’tu matou e, e vero tera e haere maira, ua taere roa, aita faahou to matou e taime no te ouʻa i ni‘a i ta matou mau puaahorofenua. E ua puai tei topa mai e e ua paari atoa hoʻi, e hoê noa ta matou rave‘a, o te iritiraa mai i te parahiraa puaahorofenua no te paruru ia matou i teie ahu parahiraa. E ua horo atura ta matou mau puaahorofenua.

Aita faahou e puaahorofenua e ua rari e ua toʻetoʻe, ua haavitiviti matou i te haereraa i te oire piri roa a‘e. Ua ahiahi roa matou i te tapaeraa i te hoê fare e ua patoto matou. Ua tamarô teie utuafare ia matou, ua faatamaa ia matou i te maa burritos, ei reira tuu atura ia matou i roto i te hoê piha taoto, e tahua repo noa.

Poʻipoʻi a‘e, ua ara matou, e mahana nehenehe mau e te maramarama. Ua patoto mai te hoê taata i te uputa, te imi ra oia e toru tamaroa tei moʻe. Eita roa e moʻe ia’u i te mea ta’u i ite i ni‘a i to matou purumu hoʻiraa—e nahoʻa rahi taata tei imi noa ia matou e poʻipoʻi noa a‘e nei. E to mua roa, o to’u ïa mama ruau e to’u « tonton » e to’u « tati ». Ua tauahi mai ratou ia matou e ua taʻi, ua oaoa roa hoʻi ua ite mai ratou i ta ratou nau tamarii moʻe.

Te manaʻonaʻo nei to tatou Metua here i te Ao ra ia tatou. Te tia‘i noa nei Oia ia hoʻi tatou i te fare. E mau tapa‘o vero rahi tera e haaati nei ia tatou. E hi‘o ana‘e tatou i ni‘a ma te faaineine ia tatou na roto i te haapuairaa i to tatou iteraa papû i te mau mahana atoa.

Faahohoʻaraa na Shawna J.C. Tenney