Ol Hom blong Yumi, Ol Famle blong Yumi
Hat blong Lisojka
Man we i raet ia, naoia i stap long Beljium.
Pikja i kam long Ani Henri
Mi mo hasban blong mi, i bin joenem Jos long Rasia long 1995 mo bin sil wan yia afta long tempol blong Stokholm Swiden. Tufala yang gel blong mitufala i bin sil tu long mitufala. Tu yia afta, mifala i bin kasem wan blesing blong gat wan nara gel, Lisojka, we i bon i kam long famle. Laef blong mifala i bin go gud. Mifala i bin hapi tumas. Be tu dei afta we hem i bon, smol bebi i faenem i had blong stap kakae. Long wan manis, hem i kasem 300 gram nomo.
Ol staf long medikol senta blong ol pikinini, oli talem long mifala blong fidim hem moa evritaem. Mi bin luk se hem i wantem tumas blong kakae be hem i no save nomo. Long en, man blong mi i tekem hem i go long siti hospitol. Kwiktaem nomo dokta i givim risal long mifala—wan problem long hat taem i bon. Wan pat blong hat blong hem i no wok, mo blad i ronaot i go long lang blong hem mo mekem i had blong hem i pulum win o kakae.
Hem i nidim wan operesen, be long Rasia, ol smol pikinini we i save kasem operesen oli olgeta we oli gat 2 yia i go antap. Gel blong mifala i gat wan manis nomo. Dokta i givim sam medesin blong tritim hem mo talem se taem bae hem i bigwan smol, afta bae oli save mekem operesen.
Wan manis afta, sik blong Lisojka i kam moa nogud, mo mifala i tekem hem i go long hospitol. Mi holem hem taem mifala i stap draev i go. Hem i lukluk mi olsem we hem i stap askem help. Sapos mi no bin wan memba blong Jos, mi no save wanem nao bae mi mekem. Be mi mo hasban blong mi i bin trastem Lod mo biliv strong se evri samting bae i oraet. Mi traem blong mekem hem i no krae, mo talem, “No fraet long wan samting, smol wan blong mi. God i lavem yumi. Bae Hem i helpem yumi, mo evri samting bae i kam oraet.”
Afta mifala i kasem. Holem hem kolosap long mi, mi ron i go long ples blong slip. Ae blong Lisojka i stat blong sat. Hem i nomo pulum gud win. Mi nomo save toktok, mo talem wan dokta abaot pikinini blong mi, mo medikol staf ia i bin tekem hem i go long wan rum blong jekem ol bebi. Dokta i talem se lang blong hem i stat blong soelap, mo oli putum gas i go long hem blong pulum win.
Long nekis dei, mifala i toktok wetem daerekta blong hat sejeri divisen. Hem i talem, “Mi bin mekem ol operesen be long ol pikinini nomo we oli bigwan. ?Hem i gat hamas yia nao?”
“Tu manis,” mifala i talem long hem.
“Hem i harem nogud tumas finis. Hem i smol tumas, mo lang blong hem we i soelap ia i mekem i had tumas, be yumi no save pulum samting ia i go moa. Mi neva mekem wan operesen olsem ia long wan smol pikinini. Bae mi traem blong mekem evri samting we mi save mekem. Bae yufala i mas pem wan giaman hat, be i sas tumas—kolosap 250,000vt. Operesen bae i hapen long fo dei.”
?Bae mifala i mekem wanem nao? Mifala o wan man we mifala i save i nogat mane olsem. Be, ol nara man i harem situesen blong mifala, mo wetem gudfala hat blong olgeta mo wetem sore blong Lod, mifala i bin kasem mane ia. Hasban blong mi i pem tul ia we mifala i nidim blong sevem laef blong pikinini blong mifala.
Ol brata mo sista blong blong mifala long branj i no bin prea mo livim kakae nomo from smol gel blong mifala, be ol misinari mo evri Lata-dei Sent truaot siti. Mifala i filim sapot blong olgeta. Stap sidaon long hospitol long dei blong operesen, mifala i bin filim se Tabu Spirit i bin stap mo filim ol prea blong ol brata mo sista blong mifala. !Mifala i bin save se oli stap kolosap long mifala! Mo God i bin stap wetem mifala, i stap lidim olgeta we oli mekem opereresen. Bae Hem i no livim mifala, mo evri samting bae i go gud.
Taem dokta we i mekem operesen i kambak afta operesen, hem i, konfius lelbet, mo talem long mifala, “Evri samting i bin wok. Mifala i putum giaman hat. Mi no save olsem wanem, be i bin wok gud.” Be mifala i bin save olsem wanem i bin wok gud. Papa long Heven i bin blesem hem.
Lisojka i bin stap long hospitol tri moa dei kasem we hat mo lang blong hem we i soelap i go daon. Oli bin katem hem open mo somapem hem bakegen wetem tintin kaliko, mo afta sam dei, oli operetem hem bakegen moa kolosap long jes mo ol pat blong bodi blong hem. Kolosap evri dokta i ting se bae hem i no save laef. Be mifala i biliv long Papa long Heven mo long paoa blong Hem, mo mifala i biliv se sapos i bin tingting blong Hem, bae hem i oraet.
God nomo i save givimbak Lisojka long mifala. Evri dei, hem i stap kam moa gud. Hem i bin stap wan manis moa long hospitol, mo naoia hem i stap long hom wetem mifala.
God i wan God blong ol merikel. Hem i harem ol prea blong mifala, mo long taem blong ol hadtaem, Hem i stap karem mifala. Ol trael i mekem fet blong mifala i kam strong moa mo i tijim mifala blong biliv, hop, mo gat lav.