Misinari, Famle Histri, mo Tempol Wok
I Kam long Elda Deved A. Bedna
Blong Kworom blong Olgeta Twelef Aposol
Long wan toktok we i kamaot long semina blong ol niu misin presiden long 25 Jun, 2013.
Long wan asembli we i bin tekem ples long Kitlan Tempol long 6 Epril 1837, Profet Josef Smit i talem, “Afta evri samting we oli talem, bigfala wok we i moa impoten hem i blong prijim Gospel.”1
Kolosap seven yia stret afta, long 7 Epril 1844, hem i talem: “Bigfala responsabiliti long wol ia we God i bin putum i stap long yumi, hem i blong lukaotem olgeta famle blong yumi we oli ded finis. Aposol i talem, “Sapos i nogat yumi, bae olgeta i no save kam stret evriwan’ [luk long Hibrus 11:40]; from i nidim se paoa blong siling i mas stap long ol han blong yumi blong silim ol pikinini blong yumi mo olgeta we oli ded blong fulnes blong dispensesen ia—wan dispensesen blong mitim ol promes we Jisas Kraes i bin mekem bifo fandesen blong wol ia blong sevem man.”2
Sam man i save tingting se olsem wanem tugeta fasin blong prijim gospel mo stap lukaotem olgeta we oli ded finis i save semtaem ol bigfala diuti mo responsabiliti we God i bin putum long ol pikinini blong Hem. Stamba tingting blong mi hem i blong givim tingting se ol tijing ia i soem yuniti mo olsem wanem blong wok wan, blong sevem man long las dei i wan. Misinari wok mo famle histri mo tempol wok oli sapotem olgeta mo oli wok tugeta blong mekem wan bigfala wok, “se long dispensesen ia blong fulnes blong taem, hem i save karembak tugeta wanples evri samting long Kraes, tugeta wanem we i stap long heven, mo wanem we i stap long wol; iven hemia long hem” (Efesas 1:10).
Mi prea se paoa blong Tabu Spirit bae i helpem yu mo mi taem yumi tingting tugeta long gudfala lata-dei wok ia blong sevem man.
Ol hat mo Prishud Odinens
Fasin blong stap prijim gospel mo stap lukaotem ol ded man, oli tu tabu responsabiliti we yumi kasem we yumi mas mekem tugeta wetem ol hat blong yumi mo ol prishud odinens. Stamba tingting blong wok blong Lod i stap mekem jenis, tanem, mo mekem ol hat i kam klin gud tru ol kavenan mo odinens we stret prishud atoriti i mekem.
Toktok ia hat oli yusum ova 1,000 taem long olgeta skripja mo hem i simbol blong ol filing blong wan man insaed long hem. Mekem se, ol hat blong yumi—hem i ful totol blong wanem we yumi wantem, ol filing, mo wanem yumi wantem mekem, ol aksen, mo ol fasin—i talemaot huia yumi mo talemaot wanem we bae yumi wantem kam.
Stamba tingting blong Lod blong misinari wok, hem i blong invaetem evriwan blong kam long Kraes, kasem ol blesing blong gospel we i kambak, mo stap strong kasem en tru fet long Kraes.3 Yumi no serem gospel blong kasem bigfala namba mo paoa blong ol memba blong lata-dei Jos ia. Be, yumi lukaotem blong fulfilim tabu responsabiliti ia blong talemaot se plan blong papa blong stap glad hem i tru, wan tru tabu Pikinini ia nomo blong Hem, Jisas Kraes, mo paoa blong atonmen mo sakrifaes blong Sevya. Stap invaetem evriwan blong “kam long Kraes” (luk long Moronae 10:30–33), mo eksperiensem “wan bigfala jenis” long hat (luk long Alma 5:12–14), mo givim ol odinens blong sevem man long wanwan man long wol ia we i no mekem kavenan yet, hemia ol stamba tingting blong stap serem gospel.
Blong mekem se olgeta we oli laef mo ded i save kam olsem wan god, hem i stamba tingting blong Lod blong bildim ol tempol mo mekem ol odinens blong olgeta we oli ded. Yumi no wosip long ol tabu tempol, blong gat wan eksperiens blong wanwan man o famle nomo olsem memori. Be tu, yumi lukaotem blong fulfilim tabu responsabiliti we oli givim blong mekem ol odinens blong sevem man mo kam olsem wan god long evri famle long wol ia. Stap planem long ol hat blong ol pikinini ol promes we oli bin mekem long ol papa blong olgeta, we i Ebraham, Aesak, mo Jekob; stap tanem ol hat blong ol pikinini i go long ol hat blong papa blong olgeta; mo stap mekem famle histri wok mo ol odinens blong olgeta we oli ded long tempol, oli ol wok we i blesem wanwan man long spirit wol we oli no mekem kavenan yet.
Ol prishud odinens oli rod we i lid i go long paoa we i olsem hemia blong God:
Prishud we i moa hae i lukaotem gospel, mo i holem ki blong ol sikret blong kingdom, we i ki blong kasem save long saed blong God.
Taswe, insaed long ol odinens blong hem, i gat paoa we i olsem hemia blong God i kamaot.
Mo sapos i no gat ol odinens blong prishud ia, mo atoriti blong prishud, paoa we i olsem hemia blong God i no kamaot long man taem oli gat bodi blong mit mo bun (luk long D&C 84:19–21).
Plis tingting strong long mining blong ol ves ia. Wan man i mas pas fastaem tru long get blong baptaes mo kasem presen we i Tabu Spirit—mo gohed strong blong muv i go fored folem rod blong ol kavenan mo ol odinens we i lid i go long Sevya mo ol blesing blong Atonmen blong Hem (2 Nifae 31). I nid blong gat ol prishud odinens blong “kam fulwan long Kraes, mo kam stret evriwan long hem” (luk long Moronae 10:30–33). Sapos i nogat ol odinens, wan man i no save kasem evri blesing we Lod i mekem se yumi save kasem tru atonmen mo sakrifaes blong Hem we i no gat en mo i no save finis (luk long Alma 34:10–14)—mo tu paoa we i olsem hemia blong God.
Wok blong Lod i wan bigfala wok we i lukluk moa long ol hat, ol kavenan, mo ol prishud odinens.
Ol Ansa
Tabu doktrin ia i givim tingting long tu impoten ansa from wok blong yumi long Jos.
Faswan, oltaem yumi givim ol tingting we i no impoten blong seperetem ol wok blong fasin blong sevem man mo ol polisi mo rul we i go wetem. Mi fraet se plante long yumi i save lukluk aotsaed moa long sam pat blong wok blong Lod we i mekem se yumi mestem blong kasem ful paoa long ful wok ia blong fasin blong sevem man.
Taem Lod i lukaotem blong karem i kam evri samting tugeta i kam wan long Kraes, plante taem yumi putum olgeta samting ia long defren level long ol wei we i mekem yumi no andastanem fulwan mo nogat ful visen. Taem yumi mekem i go tumas, yumi stat blong putum long top lis blong mekem gud ol program mo gat wan gud namba blong pipol i kam bitim we blong invaetem wanwan man blong mekem ol kavenan mo kasem ol odinens taem oli klin inaf. Kaen fasin olsem i stopem fasin blong man i kam klin gud, kasem glad, stap gohed blong gat fasin blong jenis laef, mo paoa long saed blong spirit mo proteksen we i kam taem yumi “givim ol hat blong [yumi] long God” (Hileman 3:35). Blong mekem mo komplitim evri wok blong yumi long longfala lis blong yumi “blong mekem” i no helpem yumi gat fes blong Hem i saen aot long fes blong yumi o mekem se wan bigfala jenis long hat i hapen (luk long Alma 5:14).
Seken, paoa blong profet Elaeja i stap long medel mo i impoten long wok blong serem gospel. Ating Lod i bin talemaot gud trutok ia long wan stret oda blong ol samting we i bin hapen taem we ful gospel ia i bin kambak bakegen long wol long ol las dei ia.
Long Tabu Bus, Josef Smit i bin luk mo toktok wetem Papa we I No Save Finis mo Jisas Kraes. Visen ia i lidim yumi long “dispensesen ia blong ol las dei” (Efesas 1:10) mo i mekem se Josef i save lanem abaot tru fasin blong Godhed mo revelesen we yumi gohed blong kasem.
Kolosap tri yia afta, long ansa blong wan tru prea long naet blong 21 Septemba 1823, rum blong Josef i bin saen wetem laet kasem we i bin laet bitim laet long dei (luk long Joseph Smith—History 1:30). Wan man i bin kamaot long saed blong bed blong hem, i singaotem yang boe ia long nem, mo talem se hem i bin wan mesenja we God i sendem hem i kam … mo we nem blong hem i bin Moronae (luk long Joseph Smith—History 1:33). Hem i bin talem long Josef abaot Buk blong Momon we bae i kamaot. Mo afta Moronae i bin kwotem long buk blong Malakae long OlTesteman, wetem wan smol jenis long toktok we oli bin yusum long King Jemes Vesen:
Lod i talem se bae hem i soemaot Prishud, tru long han blong Ilaeja we i profet, bifo bigfala dei blong fraet blong Lod ia. … Mo bae hem i planem long ol hat blong ol pikinini ol promes we oli bin mekem long ol papa blong olgeta, mo ol hat blong ol pikinini bae i tanem i go long ol papa blong olgeta. Sapos i no olsem, ful wol ia bae i olsem nating nomo long taem hem i kambak (luk long Joseph Smith—History 1:38–39).
Long toktok blong Moronae i go long yangfala profet ia long en, i gat tu mein samting: (1) Buk blong Momon mo (2) ol toktok blong Malakae we i talemaot fastaem rol blong Ilaeja long taem blong restoresen “blong evri samting, we God i bin talem tru long maot blong evri tabu profet blong hem stat long stat blong wol” (Ol Wok 3:21). Mekem se fas pat blong Restoresen ia i bin soemaot stret save ia abaot Godhed, gohed blong gat tru fasin ia blong kasem revelesen, talemaot gud olsem wanem Buk blong Momon i impoten, mo luk fored blong mekem wok blong fasin blong sevem man mo fasin blong kam olsem wan god blong tugeta olgeta we oli laef mo olgeta we oli ded.
Naoia, plis tingting long rol blong Buk blong Momon we i stap jenisim ol hat—mo paoa blong profet Ilaeja we i stap tanem ol hat.
Buk blong Momon tugeta wetem Spirit blong Lod, hem i “wan impoten tul ia we God i bin givim long yumi blong konvetem wol ia.”4 Buk ia blong ol skripja blong gospel ia we i Kambak ia, i ki ston blong relijin, mo tru long hem i helpem blong karem ol sol i go long Sevya. Buk blong Momon i wan narafala testeman blong Jisas Kraes—wan impoten witnes blong konfemem se Ridima i tabu long wan wol we i fulap long ol samting we i nogud mo ol man we i nogud tu. Ol hat i jenis taem wanwan man i ridim mo stadi Buk blong Momon mo prea wetem wan tru hat blong faenemaot se buk ia i tru fulwan.
Paoa blong profet Ilaeja hem i “wan fasin blong Tabu Spirit taem i soemaot witnes blong hem abaot olsem wanem famle i impoten.”5 Spesel filing ia blong Tabu Spirit we i soem strong witnes ia abaot plan blong Papa blong stap glad mo i mekem ol pipol i kamaot blong lukaotem mo glad from ol bubu mo famle memba blong olgeta—tugeta olgeta we oli ded mo olgeta we oli laef. Paoa blong profet Ilaeja i tajem tugeta ol pipol insaed mo aotsaed long Jos mo i mekem ol hat blong tanem i go long ol papa.
Taem i kam nao blong yumi yusum moa gud, impoten wok ia blong jenisim hat fulwan, we tru long paoa long saed blong spirit blong Buk blong Momon we i mekem samting i hapen fastaem, mo blong stap tanem ol hat i go long ol papa, i bin hapen tru long paoa blong profet Ilaeja. Wan strong tingting blong joen wetem olgeta we oli ded finis i save mekem wan man we i rere blong kasem toktok blong God we i klin mo mekem fet blong hem i kam strong. Wan hat we i stap tanem i go long papa i spesel nomo blong helpem wan man blong stanap agensem paoa blong devel mo mekem fasin blong jenis i kam strong moa.
Luk nambatu vidio blong luk wan stori we i tokbaot prinsipol.
Ol prinsipol
Naoia mi wantem talemaot fo prinsipol abaot paoa long saed blong spirit we i hapen taem jenisim mo tanem ol hat.
-
Ol hat mo fasin blong jenis. Fasin blong tanem i go long ol papa, i mekem yumi wekap mo rere long wan hat blong jenis fulwan. From samting ia, paoa blong profet Ilaeja i help tru long fasin blong jenis fulwan.
Luk nambatri vidio blong luk wan stori we i tokbaot prinsipol ia.
4:33 -
Ol hat mo fasin blong holemtaet wan. Fasin blong tanem i go long ol papa i sastenem mo givim paoa long ol hat we i bin eksperiensem wan ful jenis i kam strong moa. From samting ia, paoa blong profet Ilaeja i help blong kipim ol niu konvet i stap.
Luk nambafo vidio blong luk wan stori we i tokbaot prinsipol ia.
1:58 -
Ol hat mo riaktivesen. Fasin blong tanem i go long ol papa, i mekem wan hat we i bin had i kam sopsop afta wan eksperiens blong wan ful jenis. Mekem se, paoa blong profet Ilaeja hem i ki long riaktivesen.
Luk nambafaef vidio blong luk wan stori we i tokbaot prinsipol ia.
3:59 -
Ol hat mo ol strong misinari. Wan misinari we i bin eksperiensem tugeta wan ful jenis mo fasin blong stap tanem hat, bae i kam wan wokman we bae i jenis moa, givim moa taem blong hem, mo stap strong moa.
Luk nambasikis vidio blong luk wan stori we i tokbaot prinsipol ia.
3:14
Wetem wan kwik mo bigfala mo moa gud misinari grup we i rere, yumi no save jes dipen long ol sakses misinari wok blong fastaem blong faenemaot rod mo fasin blong wok long fiuja. Lod i bin givim insperesen blong teknoloji mo ol tul we i save helpem yumi blong save benefit long wok blong misin tugeta mo tempol mo famle histri wok moa bitim bifo long dispensesen ia. Mo hem i no wan mistek se ol niu samting ia i kamtru long stret taem we nid ia blong muvum misinari wok i go fored i tekemples truaot evri ples long wol. Wok blong Lod i wan bigfala wok blong lukluk long ol hat we i jenis mo tanem, long ol tabu kavenan, mo long paoa we i olsem hemia blong God i kamaot tru ol prishud odinens.
Samari mo Testemoni
Lod i talem, “mi mi save mekem wok blong mi” (2 Nifae 27:21), mo bae Hem i mekem wok blong Hem i hariap moa long stret taem. (luk long D&C 88:73). Yumi stap ol witnes blong mekem hariap wok blong Hem.
Yumi laef mo stap wok long dispensesen ia blong ol las dei. Taem yumi luksave spesel dispensesen ia we i no save finis mo i impoten we yumi stap laef long hem, i sud stap mekem yumi tingting long evri samting we yumi mekem mo traehad blong kam. Wok blong fasin blong sevem man blong i hapen long ol las dei ia i kam bigwan tumas, mo wan nid, mo i ejen. Yumi wanwan mas talem tangkyu tumas from ol blesing mo responsabiliti blong laef long spesel sisen ia blong las dispensesen ia. Olsem wanem yumi mas putum tingting i stap daon wetem save ia se long huia Hem i givim plante, Hem i askem plante tu long hem (luk long D&C 82:3).
Stap prijim gospel mo stap lukaotem olgeta we oli ded, oli tu pat we i mekem wan bigfala wok—wan wok blong lav we i blong jenisim, tanem mo mekem ol hat i kam klin gud blong olgeta we oli ones mo stap lukaotem trutok. Ol giaman samting we oltaem i stap bitwin misinari wok mo tempol famle histri, oli karemaot finis; hemia i wan bigfala wok blong fasin blong sevem man.6
?Yumi save stat blong andastanem rol blong tempol mo famle histri wok taem yumi helpem wan investigeta o wan lesaktiv memba blong kasem wan andastanding we i dip moa abaot plan blong fasin blong sevem man? ?Yumi luksave se wan long ol bigfala paoa blong holemtaet wan konvet hem i paoa blong profet Ilaeja? ?Yumi save talem tangkyu moa from ol taem we ol hat i jenis we i impoten taem oli serem ol famle stori olsem ol wei blong faenem ol pipol blong tijim tugeta tru ol memba mo ol misinari? ?Yumi save helpem olgeta we yumi givim seves long olgeta blong oltaem gat moa paoa we i olsem hemia blong God taem oli stap tekpat tru fasin we i klin inaf long ol odinens olsem sakramen mo ol baptaes mo ol konfemesen blong ded?
Bae yu luk moa klia, nogat mistek nating blong lisin, mo oltaem tingbaot olsem wanem seves blong yu i impoten long wok blong Lod blong stap jenis, stap tanem, o stap mekem ol hat i klin gud.