Olsem Wanem blong Askem Ol Kwestin We I Impoten
Askem ol stret kwestin i save help blong openem ol hat blong pipol long wan testemoni blong trutok.
Yu gat ol janis blong tij raon long yu, nomata hem i wan minit storian long wan bas, long wan lesen long jos, taem mekem ol komen long intanet, o long wan dip storian wetem wan wan fren.
So hemia wan wei blong wan gud tijing long eni situesen: askem ol kwestin.
Ol gud kwestin i lid i go long gudfala fasin blong lan, mo laki se taem askem ol gudfala kwestin, i wan samting we yu save stadi, praktisim, mo lanem blong mekem gud. Hemia olsem wanem bae i hapen.
Askem Ol Kwestin we I Impoten
Ol kwestin we oli impoten, hem i olgeta we oli mekem yu tingting mo gat filing we i dip, oli olgeta we oli lidim yu i go long trutok, testemoni, mo jenis. Oli save kavremap plante sabjek, be oli oltaem gat sam samting we i semmak: (1) oli no giaman o oli no jes tru nomo (be oli save stap ol kwestin we i lid i go long ol nara kwestin), (2) oli pat blong evri dei laef blong yumi mo, (3) oli jalenjem yumi blong tingting moa bitim we blong jes givim ol simpol ansa nomo olsem.
Tingbaot From Wanem Yumi Askem Ol Kwestin
Ol kwestin i mekem yumi bisi taem i givim wan spes we ol maen blong yumi i wantem blong fulumap. Speseli, blong askem ol kwestin we i givim kwik tingting blong wan man, i save mekem se samting ia i hapen:
-
Pipol i kam blong gat intres long wanem yu stap talem.
-
Oli yusum ejensi blong olgeta blong tingbaot mo givimaot wan ansa.
-
Fasin ia blong yusum ejensi, i letem Tabu Spirit blong testifae long olgeta abaot trutok.1
Wetem tingting ia long maen, bae yu gat wan filing long wanem kaen kwestin blong askem mo wijwan blong no askem.
Tingbaot Yu stap Tijim Pipol, I No Lesen nomo
Sapos yu save ol pipol we yu stap tijim mo tingbaot ol nid blong olgeta, bae yu jusum ol kwestin we stamba tingting i blong helpem olgeta, i no blong givim sam tingting nomo long olgeta.
Stadi mo Tingting I Go Moa Dip
Blong rere blong tijim gospel, stadi ol skripja mo ol tijing blong ol profet mo aposol blong tedei, mo prea blong Tabu Spirit i save stap wetem yu mo olgeta we yu tijim (luk long D&C 42:14; 50:21–22).
Mo tu, sapos yu wantem blong askem pipol ol kwestin we i rili mekem olgeta i tingting, yu nidim blong gat sem kaen tingting ia yuwan. Tingting hevi long wanem yu stadi. Bae yu faenem se wanem we i mekem yu tingting moa dip, oli ol kwestin we yu askem yuwan taem yu stap tij. Tingting strong long ol kaen kwestin we i mekem yu tingting plante. Hemia ol kwestin we i lidim yu i go long ol bigfala andastanding mo testemoni, ol sem kaen kwestin yu save askem taem yu stap helpem ol narafala man blong lanem abaot gospel.
Folem ol isi step blong kasem ol had kwestin
Samtaem i moa gud blong go isi wetem ol kwestin we i nidim moa taem blong tingting mo jekembak, so ating yu wantem askem wan fas kwestin we i isi blong ansarem mo afta folem wetem wan o moa kwestin we i lid i go long ol ansa we i nidim blong tingting moa from. Hemia sam long ol eksampol we i simpol:
|
Fas Kwestin |
Kwestin we i kam afta |
|
?Josef Smit i bin gat hamas yia taem hem i bin go long Tabu Bus? |
Wetaem yu bin prea long Papa long Heven wetem wan tru hat olsem we Josef i bin gat? |
|
?Yu biliv long God? |
?Wanem rol blong God long laef blong yu? |
|
?Yu bin mekem wanem blong givim seves long ol narafala man i no long taem? |
?Olsem wanem taem yu save se yumi evriwan i ol pikinini blong God i jenisim wei we yu tingting blong givim seves? |
Sapos yu lukaotem blong Tabu Spirit i givhan long yu taem yu askem ol kwestin, bae yu luk se bae yu askem moa ol stret kwestin long stret taem. Yu neva save. Bae i save jenisim laef blong wan man.
Ol Sandei Lesen
Topik blong Manis Ia: Blong Kam Moa Olsem Kraes
Pikja blong ol tul we i kam long Serj Markov/Hemera/Thinkstock; pikja blong hed we i kam long johavel/iStock/Thinkstock
Pikja blong ol han we i kam long ilyast/iStock/Thinkstock