Nahea e roaa ai te puai e te manuïa
Na Elder Jeffrey R. Holland
No te Pŭpŭ no te Tino Ahuru ma Piti Aposetolo
Mai roto mai i te hoê aʻoraa ta’na i horo‘a i te hoê pureraa pae auahi a te fare haapiiraa Brigham Young University i te 2 no mati 1997.
Te vai ra vetahi o outou tei ite e aha ta outou e hinaaro e riro mai e i hea outou e haere atu ai i roto i to outou oraraa, te vai nei râ, aita. Te vai ra vetahi o outou, ua rahi roa te mau haamaitairaa e te mau ma‘itiraa faahiahia i mua ia outou. Vetahi râ o outou te mana‘o nei e, i te hoê taime e no te tahi noa’tu tumu e, e ere outou i te feia fana‘o roa e aita hoʻi e eʻa anaanatae i mua noa mai ia outou.
Noa’tu râ e, o vai outou e noa’tu te vahi tei reira outou, te imi ra outou i to outou eʻa no te ora, te pûpû atu nei au ia outou i « te eʻa, te parau mau e te ora » (Ioane 14:6). Noa’tu te vahi ta outou e mana‘o ra e haere, te ani nei au ia outou ia « haere mai outou Ia’na ra » (hi‘o Mataio 11:28-30) te reira te taahiraa matamua roa no te tapae i ô, no te ite mai i to outou iho oaoa, to outou puai e to outou manuïaraa.
I te taime matamua a faaroo ai Anederea raua Philipi i te Mesia, ua putapu roa raua, ua maere roa e inaha ua pee raua Ia’na a faaruʻe ai Oia i te nahoa rahi. No To’na iteraa e, te peehia ra Oia, fariu mai nei te Mesia ma te ani i teie na taata e piti, « E aha ta orua e imi ra ? » (Ioane 14:19). Te vai ra te tahi iritiraa ohie, « E aha ta outou e hinaaro ? »
Pahono a‘era raua, « E ti‘a oe i hea ? » e aore râ « Tei hea to oe vahi nohoraa ? »
E ua parau maira te Mesia, « A haere mai, a hiʻo ». Aita i maoro roa, te pii mana ra Oia ia Petero e te vai atura i roto i te mau aposetolo na roto i taua varua nei no te ani-manihini-raa, « A pee mai ia’u » (hi‘o Mataio 4:19).
No’u nei, e au e, te tumu mau no to tatou oraraa, ua topatahia ïa i roto i teie na mea rii tumu e piti o te ohipa matamua i roto i te taviniraa tahuti a te Faaora. Te hoê o na mea rii tumu, o te uiraa ïa, ia tatou paatoa nei, « E aha ta [outou] e imi ra ? « Eaha ta outou e hinaaro ? » Te piti, o Ta’na ïa pahonoraa no te noaa mai te reira. Noa’tu â o vai tatou, e noa’tu â to tatou mau fifi, teie noa â Ta’na pahonoraa, e a muri noa’tu : « E haere mai outou Ia’u nei ». E haere mai outou ia ite outou i te mea ta’u e rave ra i te roaraa o te mahana. E haapii mai roto mai ia’u, e pee mai ia’u e na roto i te reira, e horo‘a’tu vau ia outou i te pahonoraa i ta outou mau pure e te hau i to outou varua.
E au mau hoa here apî e, aita vau i ite i te tahi atu rave‘a ia manuïa outou e aore râ ia oaoa outou e aore râ ia paruruhia outou. Aita vau i ite i te tahi atu rave‘a ia amo outou i ta outou mau hopoi‘a e aore râ ia ite outou i ta Iakoba i parau « te oaoa i haapa‘ohia no te feia mo‘a ra » (2 Nephi 9:43). Teie te tumu tatou e tapu ai i te mau fafauraa tei niuhia i ni‘a i te tusia taraehara a te Mesia, e te reira atoa te tumu tatou e rave ai i To’na i‘oa i ni‘a ia tatou.
O Iesu te Mesia, te Tamaiti a te Atua ora. O teie Ta’na Ekalesia mau e te ora. Ta’na e tia‘i nei, o te haereraa tatou Ia’na ra, ia pee tatou Ia’na, ia tamahanahanahia tatou e Ana. I muri iho, Ta’na e tia‘i ra, o te tamahanahanaraa tatou ia vetahi ê. Ia navaʻi to tatou faaroo no te farii i te maitai o te Atua e te aroha o Ta’na Tamaiti Fanau Tahi. Ia haere anaʻe mai tatou Ia’na ra e i Ta’na evanelia e ia faaorahia to tatou mauiui.