Ol Kwestin mo Ansa
Stap kontrolem ol tingting blong yu i had, be hem i posibol mo i givim ol blesing: “Taem yu lanem blong kontrolem ol tingting blong yu, yu save winim ol fasin, iven ol rabis fasin blong wan man. Yu save winim strong paoa long tingting, karemaot fraet, mo gat wan hapi laef.”1
Mo tu tingting long ol blesing ia:
-
Ol klin tingting bae i helpem bildim strong tras blong gobak long ples blong God, mo Tabu Spirit bae i fren blong yu we i folem yu oltaem (luk long D&C 121:45–46).
-
Ol klin tingting bae i helpem yu luksave insperesen, from Tabu Spirit i toktok long hat mo maen blong yu (luk long D&C 8:2–3).
-
Klin tingting bae i helpem yu blong obei long fas mo hae komanmen ia: blong lavem Hae God ya we i God blong yu long olgeta hat blong yu, mo long olgeta laef blong yu, mo long olgeta tingting blong yu (luk long Matiu 22:37).
I gat plante samting we yu save mekem blong gat ol klin tingting, taem yu luk long ol aedia long ol pej ia. Be wan long ol mein samting we yu save mekem—mo i tekem taem—hem i blong winim “man we i folem fasin blong wol.” Man o woman we i folem fasin blong wol, i laekem ol tingting we i no klin. Hemia olsem wanem blong winim: “Man we i folem fasin blong wol i wan enemi blong God … mo bae i stap olsem, blong oltaem mo oltaem, hemia nomo sapos hem i lisin long ol gudfala toktok blong Tabu Spirit, mo i tekem aot man we i folem fasin blong wol, mo kam wan sent tru long atonmen blong Kraes, Lod, mo i kam olsem wan pikinini, i stap lisin, no stap flas, putum tingting blong hem i stap daon, i save wet long taem, i gat plante lav” (Mosaea 3:19).
?Wanem wan samting we yu save mekem tedei blong invaetem Atonmen blong Sevya blong mekem jenis ia long laef blong yu?
Media mo ol Fren
Wan gud poen blong stat, hem i blong jusum ol muvi, miusik, mo buk we i leftemap tingting. Jusum ol fren we yu save gat ol gudfala storian mo ol stret mo gud aktiviti wetem. Taem yu gat moa ol gudfala samting blong tingbaot, sloslo bae yu faenem i isi blong karemaot ol rabis tingting, mo bae oli stap go lus.
Amber S., 18 yia, Britis Kolombia, Kanada
Prea
Prea i karem mi kam kolosap long Papa blong yumi long Heven mo helpem mi blong gat moa ol gudfala tingting. Stadi skripja evri dei i mekem tras blong mi i kam strong moa blong winim ol temtesen; long ol skripja, mi save luk ol eksampol blong ol fetful disaepol blong Kraes. Stap serem testemoni blong mi i helpem mi tu blong kipim ol tingting blong mi i stap klin.
Dasa M., 17 yia, Kaiv, Yukrein
Ol Skripja
Ridim skripja evri moning bifo go long skul i help. Taem mi gat wan tingting we i nogud, kwiktaem mi riplesem wetem wan samting we i moa gud. Blong talem nomo se, “No, no tingting olsem” (we i wan gud samting ia nao blong mekem), riplesem wetem wan gud tingting. Tingbaot, yu yu kontrolem maen blong yu, i no Setan. Yumi ol strong boe mo gel blong Papa long Heven mo yumi stap long wan misin we i gohed oltaem blong impruvum yumiwan.
Nik C., Yia 16, Arkansas, YSA
?Gud o Raet?
Yu no save kontrolem oltaem sapos wan tingting i kam, be yu save kontrolem sapos hem i blong stap. Yu save askem: ?Bae tingting ia i mekem wan gud samting long mi? ?Bae i helpem mi blong tekem stret rod? Taem wan tingting blong traem mi i go long maen, singsing wan singsing, tingbaot wan gudfala memori, o prea. Hem i abaot riplesem ol rabis tingting wetem samting we i gud.
Lisa P., 17 yia, Denmak
Eksampol blong Lihae
Long 1 Nifae 15:27, Nifae i talem long ol brata blong hem se papa blong olgeta, long visen blong hem long tri blong laef, i bin luk doti from “maen blong hem i [bin] stap long ol nara samting.” Hemia i tru semmak long yumi tedei. Sapos yumi wantem tumas blong fulap wetem stret mo gud fasin, prea from, mo tingting long ol samting we i stret mo gud, afta ol maen blong yumi bae i fulap wetem stret mo gud fasin mo klin fasin, mekem se ol tingting we i no klin i nomo save gat paoa blong stap.
Hati W., 16 yia, Arisona, YSA
Famle skripja stadi
Taem ol tingting we i no klin i kam long maen blong mi, mi traem blong tingbaot ol skripja we mi mo famle i ridim long moning. Evri moning long 6 klok, famle blong mi i ridim ol skripja tugeta. Hem i eli, be i wan blesing mo i mekem mi filim strong truaot long dei.
Elena W., 16 yia, Switsilan
Ol Hym
Ol hym oli save helpem yumi gat ol klin tingting. Gudfala miusik i leftemap spirit. Taem mi save mekem blong lisin long ol hym, oltaem i leftemap mi i go antap moa long wan level we i kwaet mo selestiel. Oli helpem mi tingbaot lav blong Papa long Heven we i gat long wanwan long yumi, mo i moa isi blong ronwe long temtesen.
Amanda A., 18 yia, Amasona, Brasil
Sakramen
Sakramen prea i talem se sapos yumi tekem long yumi nem blong Kraes, kipim ol komanmen blong Hem, mo oltaem tingbaot Hem, bae yumi oltaem gat Spirit blong Hem i stap wetem yumi. Taem yumi tingbaot Hem, yumi traehad blong pusumaot ol tingting blong wol mo lukluk moa long ol tingting we i no save finis. Taem yumi tingbaot Hem oltaem, ol tingting blong yumi, wanem we yumi wantem, mo ol aksen blong yumi bae i jenis long wan moa gud wei.
Makei M., 18 yia, Yuta, YSA