Lanem Moa abaot Wanem i Stap blong Yu
Man we i raet i stap long Oslo, Nowei.
Yut long Oslo, Nowei, oli bin spendem wan dei blong rere long laef olsem wan fultaem misinari.
Pikja blong ol frem we i kam long lukas_zb/iStock/Thinkstock
Stat long taem we Presiden Tomas S. Monson i anaonsem jenis long yia blong misinari wok, ol yut blong Jos long evri ples long wol oli bin glad tumas blong go i no long invitesen ia nomo blong go wok be tu long invitesen ia blong rere blong givim seves. Mo wan wei blong rere i blong lanem moa abaot wanem i stap blong yu taem yu kam wan fultaem misinari.
Sam yut long Nowei oli bin mekem samting ia nao long wan longfala dei blong “Misinari Eksperiens” we Fredrikstad Wod blong Oslo Nowei Stek nao i bin hostem.
Go Insaed long “MTS”
Ol yut i kam tugeta long mitinghaos long wan rum we i representem wan misinari trening senta. “Mifala i kasem wan wok blong mekem blong lanem abaot wan kantri,” Jekob R. blong Mos Wod i talem. “I bin givim mifala wan filing se bae i olsem wanem taem oli singaotem yu blong go long misin mo gat save ia se bae oli singaotem yu long wan ples we i defren long ples we yu lan long hem.”
Mitim “Misin Presiden”
Afta mifala i bin go long nekis doa blong mitim wan riten misinari we i stap tekem rol ia blong wan misin presiden,” Saimon W. blong Oslo Wod i talem. Riten misinari ia mo ol nara riten misinari ia, oli tokbaot wanem bae yu ekspektem taem yu stap mekem misinari wok. “Mi ting se i gud tumas blong lanem aot long riten misinari wanem blong ekspektem long taem blong wan fultaem misin,” Saimon i talem. Ol patisipen i bin kasem tu wan nem tag, mo bin gat wan kompanion blong wok wetem, mo oli bin tijim olgeta blong stap oltaem wetem ol kompanion blong olgeta evri taem.
Developem ol Skil
Ol woksop i bin tijim ol yut abaot developem olgeta long saed blong spirit be tu abaot manejem ol nid blong olgeta long laef olsem wasem klos, folem wan badjet, mo stap helti oltaem.
“Mi laekem speseli woksop ia abaot olsem wanem blong statem tokbaot gospel,” Inga Sofi J. blong Oslo Wod i talem. “Hemia wan samting we mi save statem blong mekem naoia.”
“Mi laekem taem mifala i toktok raon long olsem wanem blong yusumPrijim Gospel blong Mi,” Kal Frederik O. blong Redrikstad Wod i talem. “Mi bin stap tingting se ol misinari oli gat lis blong ol skripja blong lanem, be mi faenem se wanem we mi stap mekem finis long seminari, bae i helpem mi olsem wan misinari mo tu wetem wanem we mi stap stadi finis long hem long Prijim Gospel blong Mi.”
Plante yang man i bin talem se wan long ol woksop ia we bae oli no save fogetem hem i taem oli yusum ol han blong olgeta olsem eksperiens wetem aeanem wan waet set. “I rimaenem mi se i gat plante skil blong praktis we mi save wok long hem blong rere blong wan fultaem misin,” Jekob i talem.
“Mi bin lanem se i gat plante we mi save stap mekem naoia blong joenem ol fultaem misinari we oli stap givim seves long ples ia, so mifala evriwan i pat blong sem tim ia,” Sara R. blong Sandvika Wod i talem. “Ol memba oli ol misinari tu.”
Blong rimaenem olgeta nomo se ol misinari oli givim seves long evri ples long wol, oli gat ol rifresmen we i tekem ol defren kakae blong defren nesen. “Hemia i rimaenem mi se mi mas traem ol niufala kakae naoia blong mekem se mi lan finis blong kakae ol samting we mi no kakae oltaem. Hemia bae i helpem mi blong kam blong miks kwik sapos oli singaotem mi long wan ples we oli kakae ol samting we mi no lan long hem,” Saimon i talem.
Stap Rere
“Long en blong dei, afta we mifala I harem ol testemoni blong tu long ol yut mo tu riten misinari we oli jes kambak, mifala i bin singsing hym ia “God I Singaot blong Givim Seves,” Lis Andrea O. blong Fredrikstad Wok i talem. “Mi filim se sapos mi gohed blong singsing long hym ia evritaem, bae i rimaenem mi oltaem se taem yumi kam ol misinari, yumi stap givim seves long Papa long Heven mo bae Hem i blesem yumi.”
Long en blong dei ia, ol yut long stek oli bin andastanem se oli no blong rere nomo from wan fultaem misinari eksperiens, be we oli save gat misinari eksperiens naoia mo truaot laef blong olgeta.