Oposisen long Misin blong Mi
Man we i raet ia, i stap long Manaus, Brasil.
Afta intaviu blong mi blong go mekem misinari wok, stek presiden blong mi i talem, “Plante defren samting bae i hapen long laef blong yu blong traem blong mekem se bae yu jenisim maen blong yu.”
Pikja i kam long Kreg Niubold
Mi joenem Jos taem mi gat 15 yia, mo fo (4) yia afta, mi sabmitim misin aplikesen blong mi. Long intaviu wetem stek presiden blong mi, hem i glad long mi blong mekem desisen ia blong givim seves long Lod olsem wan fultaem misinari. Afta, lida ia wetem insperesen ia i talem wan samting we i bin tajem mi bigwan: “Brata, stat naoia i go, plante defren samting bae i hapen long laef blong yu blong traem blong mekem yu jenisim maen blong yu long desisen blong yu blong givim seves long Lod.”
Taem mi stap wet long misin kol blong mi, mi bin stap wok olsem wan we i stap tren long ples blong mekem kopi. Wok ia i bin mekem se mi save kasem sam long ol samting we bae mi nidim long misin fil mo blong helpem mama blong mi blong pem ol samting long hom. Ol ting i bin stap go gud.
Sori tumas, “ol defren samting” i stat blong hapen. Faswan, oli bin kilim mama blong mi mo kolosap hem i ded from soa blong hem, be wan kaen Papa long Heven i bin mekem merikel mo sevem laef blong hem.
Long taem ia, mama blong mi, tufala yang sista blong mi, mo mi, mifala i stap long wan haos we mifala i rentem. Mifala i stap laef long mane we mi winim mo wna smol mane we mama blong mi i stap kasem from ded blong papa blong mi sam yia finis.
Sam pipol, wetem ol Jos memba, bae oli askem, “?Bae yu gat strong paoa long tingting blong lego mama blong yu olsem mo go long wan misin?” Harem kwestin ia bakegen mo bakegen i stat blong givim tu tingting long hat blong mi.
Wan dei stek presiden blong mi i singaotem mi mo talem long mi se misin kol blong mi i kam finis mo askem mi blong kam long ofis blong hem long naet ia, blong hem i save givim mi envlop ia we mi stap wet from we i kam long Jos hedkwota. Mi bin wari mo glad tu semtaem long nius ia.
Long sem dei ia, maneja blong mi long wok i bin askem blong toktok wetem mi bifo lanj. Taem mi go insaed long ofis blong hem, hem i welkamem mi gud, mo mitufala i bin toktok blong sam minit abaot trening blong mi mo wanem we mi bin lanem long kampani ia. Afta, bigfala bos ia blong oganaesesen ia i talem wan samting we i bin wan drim blong plante pipol long siti: “Yu bin mekem wan gudfala wok long ples ia olsem wan we i stap tren, mo mifala i wantem yu wok ia mo kipim yu long tim. ?Wanem tingting blong yu?”
Hemia i bin wan long ol had desisen long laef blong mi. Ol seken (taem) i bin olsem we i no save finis. I luk olsem se mi save harem ol pipol oli askem mi sapos bae mi lego mama blong mi mo nomo sapotem hem long saed blong mane mo go long misin fil.
Be afta, mi tingbaot ol samting we mi bin lanem long ol skripja mo long ol Jos lida blong mi, mo long wan tabu wei, mi bin save mo sua gud se God i wantem mi blong go wok olsem wan fultaem misinari blong Jos blong Hem. Mi bin save se bae Hem i lukaotem famle blong mi, we mi save trastem Hem, mo we evri samting bae i oraet.
Mi eksplenem situesen ia long maneja blong mi, mo ansa blong hem i stap yet long maen blong mi: “Mi ting se yu wan yang man wetem gud tingting, mo luk olsem wanem yu sakemaot janis ia blong laef blong yu.”
Mi talem tangkyu long hem we i kam long hat blong mi from wok ia, mo 28 dei afta mi bin go long misinari trening senta long Sao Paulo, Brasil.
Long taem blong misin blong mi, Lod i bin provaedem ol nid blong famle blong mi tru ol Jos fren mo long ol wei blong merikel. Mama blong mi i bin kam oraet bakegen mo ol janis blong kasem ol niufala wok i bin kam long tufala sista blong mi mo hem.
“Ol defren samting” i rili stap hapen taem yumi disaed blong givim seves long Lod. Bae mi ademap testemoni blong mi wetem tingting i stap daon wetem ol testemoni blong ol nara taosen we oli bin go long seves blong God se misinari seves i bin tajem bigwan laef blong mi.