E 100 matahiti pureraa pô utuafare

I teie ava‘e, a 100 atura ïa matahiti to te Peresideniraa Matamua faaitoitoraa i te mau melo ia faatupu i te pureraa pô utuafare. Teie i muri nei te tahi mau parau no roto mai i te rata a te Peresideniraa Matamua a faa‘ite ai ratou no te pureraa pô utuafare i te taime matamua. Ua haapuharahia te reira i te ava‘e no eperera 1915 e ua nene‘ihia i roto i te ve‘a ra Improvement Era i te ava‘e no tiunu 1915 (te mau api 733–34). Ua faaapîhia te huru papa‘iraa o te mau reta rahi e te mau faatomaraa.

Hoho‘a tei ho-mai-hia e te Fare Vairaa Buka Aamu a te Ekalesia

E au mau taea‘e e au mau tuahine here e :

Te a‘o atu nei matou i te Feia Mo‘a i te Mau Mahana Hopea Nei ia haapa‘o maite atu â i te faaueraa a te Fatu tei horo‘ahia i roto i te tuhaa 68 o Te Parau Haapiiraa e Te Mau Parau Fafau :

« E teie faahou â, mai te mea e tamarii ta te mau metua i Ziona, e aore râ i roto i te hoe o to’na ra mau tîtî i haamauhia ra, o te ore ho‘i e haapii atu ia ratou ra ia ite papû roa i te parau no te tatarahapa, te faaroo i te Mesia te Tamaiti no te Atua Ora, e no te bapetizoraa no te horo‘a no te Varua Maitai na roto i te tuuraa rima, ia tae i te vau o te matahiti ra, tei ni‘a iho ïa te hara i te upoo o te mau metua…

« E e haapii atoa ratou i to ratou ra mau tamarii ia pure, e ia afaro noa to ratou haereraa i mua i te Fatu » [hi‘o PH&PF 68:25–28].

E ti‘a atoa i te mau tamarii no Ziona ia haapa‘o hope atu â i te faaueraa a te Fatu tei horo‘ahia ia Iseraela ra i tahito ra e o tei parau-faahou-hia mai i te Feia Mo‘a i te Mau Mahana Hopea Nei :

« E faatura’tu i to metua tane, e to metua vahine ; ia haamaorohia to oe pue mahana i te fenua nei » [Exodo 20:12].

E tano rahi roa ino teie nau heheuraa i te Feia Mo‘a i te Mau Mahana Hopea Nei, e e ti‘a i te mau metua tane e te mau metua vahine i roto i teie Ekalesia ia haapii e ia haapa‘o i teie mau faaueraa i to ratou fare.

E no reira, te a‘o e te faaitoito puai atu nei matou ia haamauhia te hoê « pô utuafare » i roto i te Ekalesia taatoa, i reira ho‘i te mau metua tane e te mau metua vahine e haaputuputu ai i ta ratou mau tamaiti e ta ratou mau tamahine i piha‘i iho ia ratou i te fare no te haapii ia ratou i te parau a te Fatu. I reira ratou e haapii hope atu â ai i te mau hinaaro e te mau titauraa e vai ra i roto i to ratou utuafare, e i tera atoa taime, e haamâtau papû atu â ia ratou e i ta ratou mau tamarii i te mau parau tumu o te evanelia a Iesu Mesia. E ti‘a i te reira pô utuafare ia faataahia no te pure, no te mau himene pureraa, te mau himene, te pehe upaupa, te tai‘oraa papa‘iraa mo‘a, te mau tumu parau no ni‘a i te utuafare, e te hoê haapiiraa taa ê no ni‘a i te mau parau tumu o te evanelia, e no ni‘a i te mau fifi morare o te oraraa, e tae noa’tu i te mau hopoi‘a e te mau titauraa a te tamarii i mua i te mau metua, i roto i te utuafare, te Ekalesia, te oraraa sotiare e te fenua. No te mau tamarii rii, e nehenehe ia faaohipahia te mau parau faahiti aau, te mau himene, te mau aamu e te mau ha‘uti. E rave-atoa-hia te tahi amuamuraa rii o te nehenehe e faaineinehia i te fare iho.

Ia imi-maite-hia te haapaeraa i te huru etaeta, e ia amui mai te taatoaraa o te utuafare i roto i teie ohipa.

E horo‘a teie mau putuputuraa i te rave‘a no te faarahi i te ti‘aturiraa i rotopu i te mau metua e te mau tamarii, i rotopu i te mau taea‘e e te mau tuahine, e no te horo‘a atoa i te tahi parau arai fifi, te parau a‘o e te arata‘iraa a na metua i ta raua mau tamaroa e tamahine. E horo’a te reira i te rave‘a i te mau tamaroa e te mau tamahine ia faatura i te metua tane e te metua vahine ma te faa‘ite i to ratou mauruuru no to ratou utuafare e ia faatupu-hope-hia e ia faatupu-ti‘a-hia te parau fafau a te Fatu ia ratou ra, ia haamaorohia e ia oaoa to ratou pu‘e mahana. …

Te faaitoito nei… matou i te feia apî ia faaea i te fare i taua pô ra e ia faaohipa i to ratou itoito rahi no te faariroraa i te reira ei taime haapiiraa, ei taime hoona e ei taime anaanatae.

Mai te peu e, e haapa‘o te Feia Mo‘a i teie a‘o, te parau fafau atu nei matou e, e tae mai te mau haamaitairaa rarahi. E tupu te here i te rahi i roto i te utuafare, e te haapa‘o i te parau a te mau metua. E hotu te faaroo i roto i te aau o te feia apî no Iseraela, e e roaa ia ratou te puai no te aro i te mau hutihutiraa e te mau faahemaraa ino e tae mai i ni‘a ia ratou.

To outou nau taea‘e,

Joseph F. Smith

Anthon H. Lund

Charles W. Penrose

Peresideniraa Matamua