Parau poroʻi na te mau tuahine hahaere
Te huru o Iesu Mesia : Aita e haavareraa e aore râ e aau haavare
A tuatapapa na roto i te pure i teie materia ma te imi ia ite e aha te faa‘ite atu. Nahea te maramaramaraa i te oraraa e te ohipa a te Faaora e faarahi ai i to outou faaroo Ia’na e e haamaitai ai i te feia ta outou e haapa‘o nei na roto i te tere hahaereraa ? No te mau haamaramaramaraa hau atu, a haere i ni‘a i te reliefsociety.lds.org.
Te Faaroo, Te Utuafare, Te Totauturu
Te ite-papû-raa e aita o Iesu Mesia e haavare e e aau haavare e tauturu ia tatou ia pee ma te haapa‘o i to’na hi‘oraa. Ua parau o Elder Joseph B. Wirthlin (1917–2008) no te Pŭpŭ no te Tino Ahuru Ma Piti Aposetolo e : « Te faahemaraa o te haavareraa ïa e te faahararaa. … Hoê taata haavare ore o te hoê ïa tataa hara ore, te parau mau e te ohipa mâ, e faaite mai to’na oraraa i te raveraa ohie e ti‘a i te mau ohipa ta’na e rave nei i te mau mahana atoa no te parau tumu o te parau ti‘a. … Te ti‘aturi nei au te mea maitai no te mau melo o te Ekalesia o te riroraa ïa ei taata faahema ore hau atu i teie i te tahi ê taime, no te mea e rave rahi i roto i te ao nei aita i maramarama i te faufaa mau o teie viretu ».1
Te taata haavare, ua parau te peresideni Dieter F. Uchtdorf, Tauturu Piti i roto i te Peresideniraa Matamua : « Aore hoê o matou i riro ei keresetiano hope roa mai te au i tei titauhia ia matou. Tera râ, te vai nei te hinaaro papû i roto ia matou ia upooti‘a i ni‘a i to matou hapa e te hinaaro ia rave te hape. Ma to matou aau e te varua ia titau ia riro ei taata maitai a‘e na roto i te tautururaa a te Taraehara a Iesu Mesia ».2
Ua ite tatou « e faautu‘ahia tatou no ta tatou mau ohipa, te hinaaro o to tatou aau, e te huru o te taata ta tatou i riro mai ».3 No reira, a titau ai tatou ia tatarahapa, e riro mai tatou e mea mâ—e « e ao to tei mâ te aau, e ite hoi ratou i te Atua ». (Mataio 5:8).
Te tahi atu mau irava papa‘iraa mo‘a
No roto mai i te mau papaʻiraa moʻa
E mea hara ore te mau tamarii rii Ua parau Iesu Mesia : « A tuu mai i te tamarii rii ia haere noa mai ia’u nei, e eiaha e tapeahia’tu ; mai ia ratou hoi to te Basileia o te Atua. … Ua rave atura [te mau tamarii], ua hii ihora, ua tuu atura i tana rima i nia iho ia ratou, e ua faaora’tura oia ia ratou ». (Mareko 10:14, 16).
Ua na reira atoa te Mesia no te mau tamaraii i Amerika i muri mai i To’na faasatauroraahia. Ua faaue Oia i te mau taata ia afa‘i mai i te ratou mau tamaraii Ia’na ra e « haaparahi ihora ia ratou i te pae avae no’na, tia noa’i Iesu i ropu…
« … [E] ua oto ihora oia, e ua riro a‘e ra te feia ra ei ite i te reira, e ua rave atu ra oia i ta ratou mau tamarii rii, haamaitai tata‘i hoê ihora ia ratou, e ua pure atura i te Metua no ratou » …
« E te hi‘o a‘e ra ratou ra, nânâ a‘e ra ratou i to ratou mata i ni‘a i te ra‘i, e ua veteahia a‘e ra te ra‘i ia ratou, e hi‘o a‘e ra ratou i te mau melahi mai te mea ra e, te pou maira ratou no te ra‘i mai i na roto i te auahi ; e pou maira ratou i raro, e haaati a‘e ra i te mau tamarii ra… e ua tauturu maira te mau melahi ia ratou » (3 Nephi 17:12, 21, 24).