E aha te faito faahemaraa a Satane i ni‘a i to’u mau mana‘o ?

Ua haapa‘o to tatou Metua i te Ao ra e, e ti‘amâraa morare to tatou, te mana ia ma‘iti i roto i te maitai e te ino. Eita Oia e faahepo ia tatou ia rave i te maitai, e eita ta te diabolo e nehenehe e faahepo ia tatou ia rave i te ino (hi‘o Te Mau Haapiiraa a te Mau Peresideni o te Ekalesia : Iosepha Semita [2007], 243-44).

E no reira, ia ferurihia te parau no to outou mau mana‘o, e ‘aifaito noa te faito faahemaraa a te diabolo i to outou iho hinaaro ia vai matara ia’na. Ua parau te peropheta Iosepha Semita, « Eita ta Satane e nehenehe e faahema ia tatou na roto i ta’na mau faati‘anianiraa maori râ e faati‘a e e hema’tu to tatou mau aau » (Te Mau Haapiiraa : Iosepha Semita, 243). Ua parau atoa oia e, « Aita to te diabolo e mana i ni‘a iho ia tatou maori râ ia faati‘a ana‘e tatou ia’na » (214).

E hau roa’tu, te parau mai nei te papa‘iraa mo‘a e, « o te Atua ana‘e e aita’tu ai tei ite i to oe mau mana‘o e te mau opuaraa o to oe aau na » (PH&PF 6:16), no reira, aita Satane i ite i te mea i roto i to outou mana‘o. O te mau faahemaraa noa e te mau umeraa ta’na e nehenehe e tuu mai. Ia faaoti râ outou ia pee i te reira, e mana rahi a‘e ïa ta’na i ni‘a ia outou e e puai atu â te mau faahemaraa. E teie atoa te tahi hi‘oraa, ia pato‘i outou i te ino ma te ma‘iti i te maitai, e haapuaihia e e haamaitaihia outou.