Ta’na parau fafau ia vai noa

Robyn Casper, Utah, Marite

Te parahi ra vau i roto i te pureraa oro‘a ma te feruri no ni‘a i te pure no te pane, ua ohu noa te mau parau i roto i to’u upoo : « ia vai noa to’na varua i roto ia ratou e a muri noa’tu » (Moroni 4:3 ; PH&PF 20:77).

« Vai noa », tei parauhia—eiaha te hoê noa taime. No te aha ïa, te tahi noa ava‘e na mua’tu, aita maua ta’u tane i faaûruhia nahea i te paruru i ta maua tamaiti 11 matahiti a faaûhia ai to’na pereoo tataahi e te pereoo e ua faaru‘e roa mai oia ? No te aha eita ta te Metua i te Ao ra e nehenehe e hi‘o « noa » e e faaara « noa » ia tatou ?

Ua haapii au i roto i te Paraimere e ua ti‘aturi ho‘i au e, e paruru mai te Varua Maitai ia tatou. E faa‘ohipa Oia i te reo iti marû no yr hi‘o ia tatou, no te arata‘i e no te faaara ia tatou i te mau ohipa atâta. Ua vai noa teie mana‘o i roto i to’u feruriraa mai te taime ua faaru‘e mai Ben. Ua mihi roa vau ia’na, e ua hiaai roa to’u aau i te tahi haamaramaramaraa e te hau.

Tei hea pai taua reo faaara ra ia’u ? Tei hea pai te Varua Maitai ? Ua mana‘o ho‘i au e, te rave ra maua i te maitai a‘e e roaa ia maua no te vai parau ti‘a noa. Ua aufau maua i te tufaa ahuru, ua haere i ta maua mau pureraa e ua tavini i te taime atoa e anihia mai. Mea atea maua i te maitai-roa-raa, ua faatupu râ maua i te pureraa pô utuafare e te tai‘oraa papa‘iraa mo‘a. Ua faaitoito noa maua.

E i taua taime ra te parahi ra vau i roto i te piha Sotaiete Tauturu e te faati‘a ra te orometua i te aamu o te tahi fetii piri no’na. Te tia‘i ra teie fetii i piha‘i iho i te pou mori puromu, e ua tae mai te tahi mana‘o ia faaea noa i reira noa’tu e taui te mori i te matie. Ua haapa‘o oia i teie muhumuhu e aita ihoa i maoro, te faaura mai nei te tahi pereoo punu rahi na tera maaraa puromu, aita i tape‘a i mua i te mori uteute. Ahani aita oia i faaroo e i haapa‘o i tera reo, ua pêpê e aore râ ua pohe paha ïa ona e ta’na mau tamarii.

Ua puta roa teie aamu i roto ia’u, te parahi noa ra vau ma te roimata e i te taime a faaineine ai au no te ti‘a e no te haere i rapae i te piha, ua tae mai te tahi tamahanahanaraa rahi i ni‘a ia’u. Ua ite au i te hau no te mea tei piha‘i iho te Varua Maitai ia’u, o ta’u ïa i ite mai. No’u nei, aita Oia i haere mai ei reo faaara, ei tamahanahanaraa râ.

Mai te taime â ua faaûhia Ben, ua tae noa mai i roto ia’u te tahi puai rahi atu i to’u iho nei, e ua tamahanahanahia vau na roto i te here o to’u Metua i te Ao ra. Ua ere au i te haro‘aro‘araa i tera taime a ui haere ai au no te aha e tupu nei tera e tera mea, aita roa’tu râ vau i feaa rii a‘e i To’na here.

Te vai nei to’u faaroo e, ua maramarama te Atua i te mau mea atoa e eita roa Oia e vaiiho ia’u ma te ore e tamahanahana mai. E rave rahi ti‘araa to te Varua Maitai i roto i to tatou oraraa. E nehenehe Ta’na e paruru ia tatou, e nehenehe atoa râ e arata‘i, e tamahanahana, e haapii e e horo‘a mai i te maramarama e te tahi atoa mau haamaitairaa.

Ua haapii mai au e, e tape‘a ihoa te Metua i te Ao ra i te parau Ta’na i fafau. I « vai noa » ho‘i Oia i piha‘i iho ia’u.