E ti‘a ia tatou ia haere i te hiero i teie nei !
Mary Holmes Ewen, California, Marite
Faahohoʻaraa na Bradley H. Clark
I te hoê po‘ipo‘i sabati ua faa‘itehia mai i mua i te paroisa te tahi melo tei bapetizo-apî-hia. O Lydia to’na i‘oa. Ua au roa matou ia’na i tera iho taime.
Ua paari roa Lydia e te mataru‘i no na matahiti aroraa i te ma‘i tihota. Oioi roa oia i te mâtauraa i te mau melo o te paroisa ia au i to ratou reo e te taahiraa avae. E faahiti oia i to matou i‘oa e e aroha rima mai, e aita matou i faahiti noa a‘e i te parau no to’na mataru‘i.
I te otiraa tera matahiti tia‘iraa tei titauhia, ua farerei Lydia i te episekopo e te peresideni tĭtĭ no ta’na parau faati‘a no te hiero. I te Sotaiete Tauturu i te hoê sabati, ua huti rii mai oia ia’u i piha‘i iho ia’na e ua na ô mai, « Ua parau mai te peresideni tĭtĭ e, e ti‘a ia’u ia haere i te hiero i te ineineraa ihoa. E haere mai anei oe na muri ia’u ? »
O te hepetoma matamua te reira no titema—e taime ohipa rahi roa no matou. Ua tamata vau i te faahiti i te tahi rii mau parau no te ape i te reira, « Eita anei e nehenehe e tia‘i i te ava‘e tenuare ? »
« Aita, e mea ti‘a ia haere i teie nei ! »
E pupu tuahine i roto i te paroisa e haere noa i te hiero i te mau ava‘e atoa, e no reira ua ani atu vau ia ratou ia haere na muri ia Lydia. Ua rahi atoa ta ratou ohipa. Ma te roimata, ua parau faahou mai Lydia ia matou e, ua parau mai te peresideni tĭtĭ ia haere i te ineineraa ihoa.
I ô, ua faaoti pauroa matou e tere i tera na 241 km i te hepetoma no muri iho. I ni‘a i to matou tere, ua haere noa te paraparauraa e te faahoaraa o na tuahine e va‘u i roto i te pereoo. Ua oaoa hope roa Lydia i te haereraa i te hiero e te haamaitairaa ia farii i to’na oro‘a hiero.
I te hepetoma matamua no tenuare, ua ino roa Lydia e ua mau oia i te fare ma‘i, i te rapaauraa rû. Hoê hepetoma i muri iho, ua faaru‘e mai oia. Ua haere râ Lydia e ta’na mau haamaitairaa mure ore ta’na i farii i roto i te hiero maa hepetoma noa na mua’tu.
I te tahi taime i muri iho, ua faati‘a atu vau i te aamu o to matou tere i te peresideni tĭtĭ ma te parau atu i to’u faahiahia ia’na i te fariiraa i te muhumuhu ia parau ia Lydia ia haere oioi i te hiero.
« Aita roa’tu vau i mana‘o e haere oia i tera iho taime », ta’na i parau mai. « E parau tamau ihoa vau i te taata e parau faati‘a apî ta ratou ia haere i te hiero i te ineineraa ihoa. O te Varua tei paraparau ia Lydia, eiaha vau ! »
Ua haapii mai Lydia ia matou paatoa ia faaroo i te Varua e ia haere oioi e ohipa ia au i te reira. Ua mauruuru roa vau no teie faahaamana‘oraa ta’na ia faaroo i tera reo iti marû.