Te tusia pipiri ore e te mo‘a a te Faaora
Na te Peresideni Boyd K. Packer
Peresideni no te Pŭpŭ no te Tino Ahuru Ma Piti Aposetolo
No roto mai i te hoê a‘oraa i horo‘ahia i te hoê pureraa i Brigham Young University i te 6 no novema 2011. No te taatoaraa o te papa‘iraa na roto i te reo peretane, a haere i ni‘a i te itenati, speeches.byu.edu.
Tei onei noa te Fatu. Ua mamae Oia e ua aufau i te tarahu, mai te mea ua ineine outou no te farii Ia’na ei Ora no outou.
Te ora nei tatou paatoa i te tarahu pae varua. Na roto i te hoê raveraa e aore râ te tahi atu, e maraa noa te utua. Mai te peu e aufau outou i te reira, e mea iti roa to outou haape‘ape‘araa. Auanei outou e haamata ai i te haapii mai i te haavi e ia ite e te vaira te hoê mahana no te haavaraa i mua. Haapii mai ia haapa‘o e ua aufau-tamau-hia ta outou tarahu pae varua, maori i te haaputuraa i te faananearaa e te tarahuraa.
No te mea e tamatahia outou, ua faataahia e e rave outou i te hape. Te mana‘o nei au e ua rave outou i te mau ohipa o ta outou e tatarahapa nei, te mau ohipa o ta outou iho e ore e faaore no te reira, mea iti roa te faaoreraa, no reira, te amo nei outou i te utua. E taime teie no te faaohipa i te parau hara, o te nehenehe e tafetafeta mai te hoê inita mâ ore e eita i te mea ohie ia tatara. Te tamarii a te hoa faaipoipo tei rave te hara, ua riro ei otoraa, pe‘ape‘a no te mau haamaitairaa e te mau rave‘a i mo‘e.
Mai te peu tei roto outou i te hara, ua riro rii outou mai te mau taata o te Buka a Moromona o ta te peropheta i parau e : « E no to ratou parau-ino, te tupu ra te ekalesia i te paruparu ; e aore ratou i faaroo i te Varua tohu e te Varua o te parau heheu, e tei mua tia te mau utua a te Atua i to ratou aro » (Helamana 4:23).
Pinepine tatou i te tamata ia faatitiaifaro i te fifi o te hara ma te parau ia vetahi ê e ia tatou iho e ere te reira i te mea ino. Teie râ e au ra, i roto roa, aita tatou e ti‘aturi ra i te reira. Aita tatou iho e ti‘aturi, mai te peu e parau tatou mai te reira. Ua ite maitai tatou. Eaha ra te huru !
Ua haapii tamau noa te mau peropheta i te tatarahapa. Ua parau o Alama, « e inaha, e haere mai oia e faaora i te taata e bapetizohia i te tatarahapa, na roto i te faaroo i to’na ra i‘oa » (Alama 9:27).
Ua parau roa o Alama i ta’na tamaiti tei hahi ê, « e teie nei, aore te tatarahapa e tae i te taata ra, maori râ te vai ra te hoê utua i te hoê pae, e te ravea oaoa i te tahi pae, e ia riro ïa ei mea mure ore, mai te ora o te varua ra e mea mure ore » (Alama 42:16).
Te vai nei e piti opuaraa faatumuhia no te oraraa tahuti nei. A tahi o te fariiraa i te hoê tino o te nehenehe, mai te peu e, e tamâhia tatou e ia ora e amuri noa’tu. Te piti o te opuaraa oia ho‘i ia tamatahia. I roto i te tamataraa, mea papû e rave tatou i te mau hara. Tera râ ia na reira tatou, e haapii mai tatou na roto mai i te tatou mau hara. « Ia parau tatou e, aore a tatou e hara i rave, ua faariro tatou ia’na ei haavare, e aore ta’na parau i roto ia tatou nei » (1 Ioane 1:10).
Penei a‘e, te ite ra paha outou e mea ha‘iha‘i roa outou i te varua e te tino e te fifi ra e aore râ te pe‘ape‘a ra i te teimaha o te tahi mau utua pae varua tei tapa‘ohia « e mauiui ». Ia haere ana‘e mai outou i mua ia outou iho i roto i taua mau taime ra o te hi‘o-maite-raa hau (ta te rahiraa o tatou e tamata nei i te ape), te vai ra anei te tahi mau mea o tei ore i faatitiaifarohia o te haape‘ape‘a nei ia tatou ? Te vai ra anei te tahi mea i roto i to outou feruriraa ? Te vai noa ra anei outou, i te hoê faito e aore râ te tahi atu, hara no te hoê ohipa na‘ina‘i e aore râ rarahi ?
Pinepine roa matou i te farii i te mau rata a te feia o tei rave i te mau hara ino e te teimaha. Te taparu nei ratou : « E nehenehe anei e faaore i ta’u hara ? E nehenehe anei au e taui ? » Teie te pahonoraa, e !
Ua haapii o Paulo i te Korinetia, « Aita outou i roohia e te ati maori râ mai te taata nei â ; e parau mau ta te Atua, e ore oia e vaiiho noa ia outou ia ati, maori râ o te ti‘a ia outou ia faaoromai ra ; e faatupu atoa oia i te haapapûraa i taua ati ra, ia ti‘a ia outou ia faaoromai » (1 Korinetia 10:13).
Te haapii nei te evanelia ia tatou e te haamamaraa o te haape‘ape‘araa e te hara e nehenehe e upooti‘a na roto i te tatarahapa. Eiaha no vetahi—no vetahi—o tei faarue no te huru hara i muri mai i te iteraa i te hoê îraa, aita e rave‘a, aita e ti‘amaraa, aita e orureraa hau, aita e faautuaraa, aita e hara na‘ina‘i e aore râ e hara rarahi, o te faatiama i te fafauraa no te faaoreraa hara mau. Noa’tu te ohipa tei tupu i roto i to outou oraraa, ua faaineine te Fatu i te hoê rave‘a no outou no te ho‘i, mai te peu e tau‘a outou i te muhumuhu a te Varua Maitai.
Ua î vetahi i te hoê hinaaro puai, te hoê tamataraa o te taamino noa i roto i te feruriraa, e penei a‘e e riro mai ei ohipa tamau e i muri iho ei ohipa faatitiraa. E riro tatou i te pio i te tahi mau faautuaraa e te mau hara e oia’toa te hoê faati‘araahia e aita tatou i hara no te mea ua fanauhia tatou mai teie te huru. Ua mareihia tatou, e no reira e tae mai te oto e te mamae e o te Faaora ana‘e te nehenehe e faaora. E mana to tatou no te tape‘a e ia ora.
Te aro nei Satane i te utuafare
Ua parau te peresideni Marion G. Romney (1897–1988) ia’u i te hoê taime, « Eiaha noa e parau ia taa maitai ratou, ia parau ra ia ratou e eiaha ratou ia hape »
Ua parau Nephi e : « Ua oaoa ta’u nei aau i te parau papu : e te na reira ra hoi te Fatu te Atua ra i te faatupu i te parau au i rotopu i te mau tamarii a te taata nei. Te horo‘a maira hoi te Fatu te Atua ra i te maramarama i te aau o te taata nei… mai te au hoi i to ratou ite » (2 Nephi 31:3).
No reira a faaroo maitai mai ! E parau maramarama atu vau mai te hoê tei piihia e tei raro a‘e i te titauraa ia na reira.
Ua ite maitai outou e te vaira te enemi. Te faaite ra te mau papa‘iraa mo‘a ia’na mai teie mau parau : « Oia hoi taua ophi tahito ra, o te diabolo, oia te metua o te mau parau haavare atoa ra » (2 Nephi 2:18). Ua ti‘avaruhia oia i te haamataraa (hi‘o PH&PF 29:36–38) e ua ere i te hoê tino tahuti. I teie nei, ua tapu oia e faaarepurepu i te « rave‘a rahi oaoa » (Alama 42:8) e ia riro ei hoê enemi o te feia parau-ti‘a atoa. Ua faatutonu oia i ta’na aroraa i ni‘a i te utuafare.
Te ora nei outou i roto i te hoê tau te parare nei te ati rahi o te hoho‘a faufau na te ao nei. E mea fifi te reira ia ape. Ua faatumuhia te hoho‘a faufau i ni‘a i teie tuhaa o to outou natura e na te reira e horo‘a ia outou te mana ia horo‘a te ora.
E arata‘i te ôraa’tu i roto i te hoho‘a faufau i te mau fifi rarahi ; te faataaêraa ; te ma‘i ; e no te tatini huru ati. Aita roa e tuhaa e mea hara ore. No te haaputu, no te hi‘o e aore râ no te afa‘i te reira na roto rau huru raveraa, e au ra ïa mai te hoê ophi (serpent a sonnette) i vai noa i roto i ta outou pute tua. E faaite te reira ia outou i te tuea aore e rave‘a pae varua o te aroraa a te ophi ia tutuha oia i te pape taero pohe. E nehenehe te reira e taa-ohie-hia, mai te ao i teie nei, e e nehenehe roa outou e ô atu ma te hara ore, e tai‘o e aore râ e hi‘o ma te ore i ite i te mau hopearaa ri‘ari‘a. Mai te peu e faaiteraa te reira ia outou, te faaara nei au ia outou ia faaea. A faaea i teie nei !
Te haapii nei te Buka a Moromona e « ua navai to te taata [atoa] nei haapiiraahia, ia ite ratou i te maitai e te ino » (2 Nephi 2:5). E ia taa outou. Ua ite outou eaha te mea maitai e eaha te mea ino. Ia ara maitai eiaha e tahiti i taua reni ra.
Atira noa’tu e nehenehe te rahiraa o te mau hara e faaorehia ma te omo‘e i te Fatu, te vaira te tahi mau hara e titau-rahi-hia i te reira no te horo‘a mai i te faaoreraa hara. Mai te peu e mea ino roa ta outou hara, a farerei i to outou episekopo Aita ana‘e, ia rave te tatarahaparaa matauhia, ma te hau e na te taata iho. Ia haamana‘o râ, e taua po‘ipo‘i rahi ra no te faaoreraa hara eita e tae paatoa mai i te hoê â taime. Mai te peu e turori outou i te taime matamua, eiaha e haapae. Te faaoroma‘iraa i te tarapape e tuhaa ïa o te tamataraa. Eiaha e haapae. E mai ta‘u i a‘o na mua’tu, i te taime outou a tatarahapa ai i ta outou mau hara, e ua haapae, eiaha e hi‘o i muri.
Ua mamae te Faaora no ta tatou mau hara
Tei onei noa te Fatu Ua mamae Oia e ua aufau te tarahu mai te mea ua ineine outou i te farii Ia’na ei Ora no outou.
Ei feia tahuti nei, eita ta tatou e nehenehe, oia mau eita roa, ia taa maitai nahea te Faaore i te faaotiraa i Ta’na tusia taraehara. No teie nei râ te nahea e ere te reira i te mea faufaa, te no te aha o To’na mamae. No te aha i rave ai Oia i te reira no outou, no’u, no te mau taata atoa i te fenua nei ? Ua na reira oia no te here o te Atua e te mau taata atoa. « Ia horo‘a te taata i to’na iho ora no to’na ra mau taua, aita roa e taata aroha ê atu i tei reira » (Ioane 15:13).
I Getesemane, ua faaatea mai te Mesia i Ta’na mau pĭpĭ no te pure. Atira noa’tu te taheraa tei ni‘a a‘e i to tatou mana no te ite ! Ua ite râ tatou e ua rave faaoti Oia i te taraehara. Ua ineine Oia ia rave i ta tatou hara i ni‘a Ia’na, te mau hape e te mau hapa, te mau feaaraa e te mau mata‘u o te mau taata atoa. Ua mamae Oia no tatou, ia ore tatou ia mamae E rave rahi taata tei mauiui i te ati e tei pohe i te mamae, te pohe ri‘ari‘a Ua hau atu râ To’na ati pohe i te reira.
I to’u matahiti, ua haapii mai au eaha te mauiui pae tino, e ere i te ohipa hauti ! Aita e taata i teie oraraa e nehenehe e ape ma te ore e haapii mai hoê e aore râ e piti tumu no ni‘a i te mamae. Teie râ te ati o te taata iho o ta’u eita e ti‘a ia faaoroma‘i oia ïa i te taime a ite ai au e ua haamauiui au i te tahi. I reira i ite ai au i te ati rahi o ta te Faaora i farii i roto i te ŏ no Getesemane.
E mea taaê To’na mamae i to te tahi atu mau mamae na mua‘e e aore râ mai reira mai â, no te mea ua rave Oia i ni‘a Ia’na i te mau ati o tei ore i tuuhia i ni‘a i te utuafare o te taata nei. A feruri na i te reira ! Aita Ta’na e tarahu no te aufau. Aita Oia i rave i te ino. Teie ra, te hoê haaputuraa o te mau hara atoa, te mauiui e te oto, te mamae e te faahaehaaraa, te mau ati i te pae feruriraa, i te pae aau e i te pae tino i fariihia e te taata—Ua ite Oia i te reira. O Oia ana‘e i roto i te mau păpăa parau o te aamu o te taata nei, o tei ore roa i hara, tei faataahia ia pahono no te mau hara e te mau utua a te mau taata atoa e ia ora i te mamae o te apee i te aufauraa no te reira.
Ua faaite Oia i To’na ora e i roto i te hoê tuhaa ua parau, « o vau hoi te rave i nia ia’u iho i te mau hara a to te ao nei » (Mosia 26:23). Ua faasataurohia Oia ; ua pohe Oia. Eita ta ratou e nehenehe e rave i To’na ora na roto mai Ia’na. Ua farii Oia ia pohe.
Ia tupu te faaoreraa hara hope.
Mai te peu ua hema outou e aore râ ua mo‘e i te hoê taime, mai te peu te ite ra outou e ua riro outou ei tîtî na te enemi, e nehenehe ta outou e haere i mua ma te faaroo e eiaha e ihu maoro i tera e tera vahi i roto i te ao nei. Te vai nei te feia tei ineine no te arata‘i ia outou ia ho‘i mai i te hau e te parururaa. Oia’toa te aroha o te Atua, mai tei fafauhia i roto i te mau papa‘iraa mo‘a, e tae roa e « hope noa’tu to tatou itoito atoa » (2 Nephi 25:23). Te roaaraa te reira, no’u iho, o te parau mau ïa hau atu i te iteraa.
Te fafau atu nei au e nehenehe te po‘ipo‘i anaana o te faaoreraa hara e tae mai. I muri iho « te hau a te Atua, o tei hau ê atu i te ite » (Philipi 4:7) e tae faahou mai i roto i to outou oraraa, te hoê mea mai te hoê hitiraa mahana, e outou e Ona « e ore e mana‘o faahou i ta [outou] hara » (Ieremia 31:34). Nahea ïa Outou e Ite ai ? Aita outou i ite. A hi‘o Mosia 4:1–3).
O teie te mea i haere mai ai au no te haapii ia outou tei fifi. E faaô mai Oia e e faatitiaifaro i te fifi o ta outou e ore e ti‘a ia faatitiaifaro, e mea ti‘a râ ia outou ia aufau i te hoo. Eita te reira e tae mai ia ore ia ravehia mai te reira. Ua riro Oia ei hoê faatere maitai roa i roto i te mea e ua aufau Oia i te hoo ti‘a, e te hinaaro nei râ Oia ia outou ia rave i te mea e ti‘a ia outou ia rave, noa’tu e mea mauiui te reira.
Ua here au i te Fatu, e ua here au i te Metua o tei tono mai Ia’na. Ta tatou utua no te vareraa, te hara, e te otoraa e nehenehe e tuuhia i mua Ia’na, e i ni‘a i Ta’na mau faaueraa horo‘a maitai, e i ni‘a i te mau ohipa tata‘itahi e nehenehe e tapa‘ohia « aufauhia te taatoaraa ».
« E tena na, e faatiatia na tatou i te parau, te na reira maira Iehova: ia uteute roa ta outou mau hara ra, e riro ïa mai te hiona ; e ia uraura noa’tu mai te faaio ra, e riro ïa mai te vavai ra i te teatea ». Teie ïa, te na-ô-faahou ra o Isaia, « ia tia ia outou e ia faaroo ra » (Isaia 1:18–19).
Haere mai Ia’na ra
Te papa‘iraa « e haapii oe i te paari i to oe apîraa ; oia ïa, e haapii oe i te haapa‘oraa i te mau faaue a te Atua ra i to oe apîraa » (Alama 37:35) ua riro ei hoê aniraa manihini tauturuhia e te fafauraa o te hau e te parururaa i mua i te enemi. « Eiaha roa ei taata e vahavaha mai i to apîraa na, ei haapaoraa râ oe na tei faaroo ra, i te parau, i te haere‘a, i te aroha, te huru o te aau, i te faaroo, i te viivii ore » (1 Timoteo 4:12).
Eiaha outou e mana‘o e tere maitai noa i te roaraa o to outou oraraa. Oia’toa no te feia e ora nei mai ta ratou e ti‘a, e riro i te tahi taime e ere roa mai te reira. Te fariiraa i te mau tamataraa tata‘itahi o te oraraa ma te mana‘o maitai e te papû, e roaa ia outou te hau e te faaroo no te turu ia outou i teie nei e amuri iho.
No te feia aita â i farii i te mau haamaitairaa atoa o ta outou i mana‘o ta outou i hinaaro e e hiaai nei, te ti‘aturi papû nei au e aita e iteraa e aore râ e rave‘a faufaa roa no te faaoreraa e te faaoraraa e faaerehia ia outou o te ora nei mai te haapa‘o. Faaea parau-ti‘a noa ; te tia‘iraa ; te faaoroma‘i ; e ma te pure. E huru ohiparaa i te mau mea i rapae. E arata‘i e e faatere te horo‘araa a te Varua Maitai i ta outou mau haaraa.
Mai te peu o outou te hoê o te aro nei ma te oto, te vareraa e aore râ te faatitiraa no te hoê hape ta outou i rave e aore râ no te mau haamaitairaa tei ore e tae mai, a tai‘o i te mau haapiiraa haapapûraa e itehia i roto i te himene « Haere mai ia Iesu » :
Haere mai ia Iesu Mesia,
Teiaha noa te hopoia.
Na’na e arata’i ia oe,
I te vahi e ora’i.
Haere mai ia Iesu Mesia,
E faaroo mai ia oe.
Poiri noa’tu i te hara,
No’na oe e ora’i.
Te parau nei au, e to’u mau taea‘e te mau aposetolo, ei ite taaê no te Fatu ra o Iesu Mesia. E faaite faahou teie iteraa i te mau taime atoa, e ite au iho e aore râ vetahi ê i te huru tamâraa o Ta’na tusia mo‘a. To’u iteraa e to to’u mau taea‘e, e parau mau te reira Ua ite matou i te Fatu. Aita Oia i ê atu i Ta’na mau peropheta, te mau hi‘o e te mau heheu parau.
Ua ite au e ere outou i te mea parau-ti‘a, te haere nei râ outou na ni‘a i teie e‘a roa. Ia roaa te itoito. Ia ite e te mau taata atoa e tino to ratou e mana ïa to ratou i ni‘a i te mau taata aita to ratou e tino.2 Ua ere Satane i te hoê tino ; no reira mai te peu te faaruru nei outou i te mau tamataraa, ia ite outou e tei ni‘a a‘e outou i teie mau tamataraa atoa, mai te peu e faaohipa outou i te ti‘amaraa tei horo‘ahia ia Adamu e ia Eva i roto i te ô e tei horo‘ahia i teie ana‘e u‘i.
Mai te peu e hi‘o outou i mua ma te tia‘i e te hinaaro ia rave i te mea ta te Fatu e hinaaro ia rave outou—o teie te mea e tia‘ihia ra.