O vai to oe aito ?
Te ora nei te taata papaʻi i California, i Marite.
Ua ite Ellie o vai to’na aito, ua ri‘ari‘a râ oia i te parau atu.
« A vai mau noa i ni‘a i to oe manava haavâ, to oe faaroo ; e vai mau noa mai te hoê aito » (Children’s Songbook, 158).
Te honihoni ra Ellie i to’na manimani rima. Te haere maira te orometua Fitz na te mau iri papa‘iraa ma te ani i te mau piahi tata‘itahi teie uiraa.
« O vai to oe aito ? » Teie te orometua Fitz te ani ra ia Jeremy.
Aita o Jeremy i haamaoro i ta’na pahonoraa. « To’u papa ! », teitei maitai te reo.
Ua hi‘o te orometua Fitz ia’na ma te mata ataata. « E to oe, e Sarah ? »
Paaina atoa mai nei ta’na pahonoraa. « Abraham Lincoln ».
Te otu‘itu‘i noa ra te mafatu o Ellie a haere noa mai te orometua Fitz. Ua paraparau ratou no te mau aito i tera mahana taatoa, e i teie nei e parau mai ratou o vai to ratou aito—i mua i te piha taatoa !
Ua pahono Amber raua Justin, o to raua mama to raua aito. Ua parau Walter o to’na papa ruau. E te vai ra ua pahono mai i te i‘oa o te hoê arii e aore râ te hoê peresideni.
Maa piahi noa tera e toe ra e ua tae te orometua Fitz i ni‘a ia Ellie. E feruri i te hoê aito—e feruri haaviti mai.
Pi‘o to’na upoo i raro i ni‘a i to’na tiaa, e te haamâ taatoa. E ere te feruriraa i te hoê aito te fifi mau. Ua ite a‘ena oia o vai to’na aito. O Iesu Mesia. Ua faaora Oia i te taata ma‘i, ua faati‘a i tei pohe e ua aufau i te hoo no te hara o te mau taata atoa. O Oia te aito rahi roa a‘e tei ora i ni‘a i te fenua nei. Ua ri‘ari‘a râ oia i te parau atu.
Honihoni faahou â Ellie i to’na manimani rima i te mea e, e parau atu oia i mua i te piha taatoa o Iesu Mesia to’na aito. E ata mai paha Jeremy ia’na ? E muhumuhu paha ïa Sarah raua Amber no’na i te hora faafaearaa ?
Ua ite ihoa oia e, o Iesu Mesia to’na aito. E aha ïa, e parau roa’tu ïa i mua i te tahi mau pu‘eraa ia ite atoa mai ratou.
Tei mua te orometua Fitz ia Ellie ma te mata ataata. « O vai to oe aito, e Ellie ? »
Ua hi‘o Ellie i te tahi mau tamarii e ni‘a roa i te orometua Fitz. « Abraham Lincoln », ta’na i muhumuhu.
Ua hi‘o te orometua Fitz ma te mata ataata. « Na reira ! » ua parau oia e haere atura i te piahi no muri iho.
E a haere ai oia, topa a‘enei te teimaha i ni‘a i to’na tapono. Auê, ua oti ïa. Tera te mea hopea ta’na i hinaaro i te piha atoa ia ite e, to’na aito o—
« Iesu Mesia », ua parau te tahi atu reo.
Araara te mata o Ellie e fariu marû a‘era i muri ia’na. I reira—te tahi rii noa parahiraa i muri ia’na—te parahi ra te hoê tamaiti iti e to’na rouru pukarara. E tamaroa pararei e te haamâ haere noa, e parahi noa oia i muri i roto i te piha. Aita Ellie i ite rii a‘e to’na i‘oa. Aita roa oia e haamana‘o ra ia’na i te paraparauraa i te hoê parau—e tae roa mai i teie nei.
Ua fariu te tahi mau piahi no te hi‘o ia’na, aita râ oia i tau‘a’tu. Ua amo to’na mata i ni‘a i te orometua Fitz e ua parau faahou. « O Iesu Mesia to’u aito ».
Ua hi‘o te orometua Fitz ma te mata ataata maitai. O Ellie râ, ua hi‘o ïa i teie tamaroa ma te maere. Ua ri‘ari‘a roa ho‘i oia iho i te parau atu i mua i te taatoaraa no ni‘a i to’na aito, e aita teie tamaroa. E aita ho‘i oia e haere mai nei i ta’na pureraa ! Ua ite râ ho‘i teie tamaroa i te faufaa rahi ia ti‘a ei hi‘oraa no Iesu Mesia, i roto atoa i te fifi.
Ua hi‘o Ellie ia’na ma te mata ataata. Mai teie taime atu, eita oia e ri‘ari‘a faahou ia parau o vai to’na aito. E i teie nei, e piti ïa.