Himene i ta outou himene au roa a‘e

Angela Olsen Center, Ohio, HAM

Faahohoʻaraa na Bradley H. Clark

No fanau noa mai nei au i ta maua tamahine, o Rebekah. Ua roa rii te ohipa fanauraa e ua rohirohi roa vau.

I te tuuraahia Rebekah i roto i to’u na rima, ua tae mai te mana‘o puai e himene i ta’u himene au roa a‘e, « E tamarii au na te Atua ra » (Te mau himene, n° 185). Ta’u pahonoraa matamua, oia ho‘i, « Aita, ua rohirohi roa vau. E himene vau no’na i te tahi atu taime ». Ua tae faahou mai râ teie mana‘o. E no reira, noa’tu to’u rohirohi iti rahi, ua haamata vau i te himene i te irava matamua. Ua himene atoa mai ta’u tane e to’u metua vahine.

I te otiraa te himene, ua putapu roa vau i te tahi mana‘o taa ê tei roto i te piha. E e roimata atoa tei ni‘a i te hoho‘a mata o te taote, tei haapa‘o noa na i ta’na ohipa e to’na ti‘araa. Ua haamauruuru mai oia ia matou i te himeneraa i teie himene iti nehenehe. Parau mai nei oia e, i roto i te mau matahiti ta’na i faafanau i te aiû, aita oia i putapu a‘enei mai te reira te huru i tera iho taime.

Ua feruri au i teie ohipa i tupu ma te mana‘o eita anei e nehenehe e imi mai i te hoê haruharuraa no teie himene e horo‘a’tu ia’na. Tera râ, ua rahi roa ta’u ohipa e ua mo‘e roa ia’u.

E ua tae maira te mahana no tera hi‘opo‘araa i muri iho i te fanauraa. A tomo ai te taote i roto i te piha, ua anaana a‘era to’na hoho‘a mata e ua tauahi roa mai ia’u. Parau mai nei aita i roaa ia’na i te haamatara i teie himene mai roto mai i to’na feruriraa e ua tamata atoa ho‘i i te imi i te himene i ni‘a i te Itenati no te himene atu i to’na utuafare. Te reira te taime ua faahaamana‘o mai te Varua Maitai ia’u e, e ti‘a ia’u ia horo‘a ia’na i te hoê haruharuraa no teie himene. Ua parau fafau atu vau ia’na e, i teie hepetoma i muri nei e ho‘i mai au e te hoê haruharuraa.

I tera ra pô ua pure au ia itehia mai ia’u te haruharuraa maitai roa a‘e no’na. I te mahana no muri iho, i te avatea, ua poro‘i atu vau i te hoê CD tei roto tera himene. I te taeraa mai te reira te tahi rii noa mahana i muri iho, ua anaanatae roa vau ia horo‘a i te reira ia’na ra.

Ua oaoa roa oia i te fariiraa i te reira e ua haamauruuru mai ia’u no teie tao‘a horo‘a. Ua faati‘a mai oia e, aita oia i taa maitai, mai te huru râ e, e mea faufaa no’na ia faa‘itehia te reira himene i to’na utuafare. A paraparau noa ai maua, ua faa‘ite atu vau ia’na i to’u here no teie himene e to’u atoa iteraa papû no te mau parau mau ohie e haapii mai nei.

I te ho‘iraa’tu vau i te fare i tera mahana, ua putapu vau i te here o to tatou Metua i te Ao ra no te hoê o Ta’na mau tamahine—ta’u taote. Ua ite e ua here Oia ia’na, e ua hinaaro ho‘i ia maramarama mai oia e, e nehenehe atoa ta’na e ho‘i faahou Ia’na ra e ora ai.