Uiraa e pahonoraa
« Eaha te rave‘a ia ore to’u mana‘o e faataiâ no te paraparau i to’u episekopo no ni‘a i te tahi fifi e aore râ te tahi mana‘ona‘oraa ? »
E taiâ paha outou i te paraparau i to outou episekopo no ni‘a i te mau mea outou e tafifi nei, e mai te reira ihoa. Pinepine ihoa te mana‘o taiâ ia tae mai na mua a‘e i te tahi ohipa apî e aore râ na mua i te hoê farereiraa e te tahi taata paari.
Teie râ, ua piihia to outou episekopo e te Atua. Ua piihia oia no te mea e pĭpĭ oia na Iesu Mesia tei fafau ia’na iho. E tautoo oia no te riro ei taata maitai e te haro‘aro‘a. Ta’na fâ, o te tautururaa ïa ia outou ia haere mai i te Faaora ia itehia ia outou te hau. I te omuaraa, e tae mai paha te mana‘o rii haamâ no te paraparau ia’na i ta outou mau uiraa e aore râ hara, eita râ to’na mana‘o maitai no ni‘a ia outou e ore. Oia mau, e oaoa oia no te mea te vai ra tera hinaaro to outou ia haamaitai atu â. E e tape‘a omo‘e oia i te mea ta orua e paraparau.
Eita e ti‘a ia outou ia amo otahi noa i ta outou hopoi‘a. E nehenehe i to outou episekopo ia tauturu ia outou ia ite mai i te pahonoraa i ta outou mau uiraa, e mai te peu e titauhia, ia tauturu ia outou ia tatarahapa e ia upooti‘a, na roto i te Taraehara a te Mesia, i te mana‘o faahapa, te mana‘a hepohepo e te ti‘amâ ore.
A paraparau ai outou i to outou episekopo, e ite outou to’na here ia outou. Noa’tu â na’na te hopoi‘a ia aupuru i te paroisa e aore râ te amaa taatoa, ta’na tutonuraa matamua roa, o te maitai ïa o te feia apî tamaroa e tamahine. Aita outou e faataupupu ra i ta’na ohipa ia ani outou i te tauturu.
E nehenehe ta outou e pure i te Metua i te Ao ra no te ani i te puai e te itoito no te paraparau i to outou episekopo. Na’na i faati‘a i to outou episekopo ia tauturu ia outou e ua hinaaro roa te episekopo ia na reira. Mai te peu e haere outou ma te aau tae e te hiaai ia haamaitai ia outou, e ite outou e, ia faaru‘e outou i ta’na piha toro‘a, e mana‘o maitai a‘e te tae mai.
« Eita to’na mana‘o maitai no ni‘a ia outou e ore »
Ua horo‘ahia i ni‘a i te episekopo o to outou paroisa te haamanaraa no te arata‘i outou i roto i te mau taahiraa no te tatarahapa. I te tahi taime, o te fariuraa i to outou na episekopo te rave‘a hoê noa no te tatarahapa hope na roto i te Faaora. I to’u paraparauraa i to’u episekopo, ua tauturu oia ia’u ia ite i te Faaora e ia upooti‘a i te pêpê rahi i roto ia’u. Ua hinaaro to outou episekopo i te tauturu ia outou. O to’na piiraa te aupururaa ia outou, e eita to’na mana‘o maitai no ni‘a ia outou e ore no teie ohipa ta outou i hinaaro e paraparau ia’na.
Madison D., 18 matahiti, Utah, Marite
Ua hinaaro to outou episekopo ia tauturu ia outou
Na mua a‘e e mea au ore no’u te mau uiuiuraa, i te hopearaa râ, ua roaa mai to’u ite e, ua hinaaro noa to’u episekopo ia tauturu ia’u ia tatara i ta’u mau fifi. A ti‘aturi i to outou episekopo ; e tia‘i mamoe oia e o te paroisa ta’na nana.
Jaime R., 19 matahiti, Cochabamba, Bolivia
Eita oia e faa‘ite hua’tu i ta outou i ti‘aturi ia’na
I roto i te mau pata huna ia outoumatahiti ua tae mai te haro‘aro‘a e, o te episekopo mau paha te taata paari e tano roa no te hoê taure‘are‘a ia ti‘aturi a imi ai i te tauturu. Eita oia e faa‘ite hua’tu i ta outou i ti‘aturi ia’na—e vai noa te mau mea ta outou i faa‘ite ia’na i roto i tera piha toro‘a. I te tahi taime, e mea paari ia faa‘ite i ta outou mau fifi, are‘a râ, ia paraparau mata e mata tatou i te tahi taata here e te aupuru e te hinaaro i te maitai roa no tatou, e mea ohie a‘e ïa.
Nicole S., 18 matahiti, Idaho, Marite
E nehenehe e ti‘aturi ia’na
E tavini mau to outou episekopo e aore râ to outou peresideni amaa na te Fatu. E nehenehe e ti‘aturi ia’na no te arata‘iraa a imi atoa ai i te faaûruraa no ô mai i te Varua Maitai e te mau papa‘iraa mo‘a. E ti‘a ia maramarama e, tei reira te episekopo no te tauturu ma te arata‘ihia e te Atua.
Stanislav R., 19 matahiti, Donetsk, Ukraine
A haamana‘o e, ua here oia ia outou
Mai te peu e ohipa ta outou e hinaaro roa e parau i te episekopo, e mea ohie a‘e paha ia paraparau rii na mua ia’na no ni‘a i te haapiiraa e te tahi rii mau mea eê. Mai te peu te taiâ ra outou i te mea e, titauhia ia paraparau ia’na i te tahi mau mea e tatarahapa, a haamana‘o e, ua here oia ia outou. Eiaha e taiâ i te mea e mana‘o mai oia ia outou, inaha, e aha pai oia e hi‘o ê ai ia outou, ua hinaaro ho‘i outou ia haafatata i te Mesia ?
Ashley D., 17 matahiti, Arizona, Marite
Noa’tu â ua hape outou
E mea paari ihoa paha e te haamâ ia fa‘i i te mau mea i to outou episekopo, tera râ, ia matara mai outou mai te piha toro‘a, e ite outou te mâmâ, e e ite mai outou e, ua here te Metua i te Ao ra ia outou. Ua hinaaro Oia ia oaoa outou, noa’tu â ua hape outou.
Amanda W., 16 matahiti, Utah, Marite
Tei reira oia no te tauturu mai
O te episekopo te tia‘i mamoe o te paroisa. A haamana‘o e, e faaitoito oia no te tauturu ia outou, e tei to’na pae te mana o te Atua. Mai te peu ua ri‘ari‘a outou, e nehenehe ta outou e pure ia roaa mai te puai no te paraparau i to outou episekopo. E i te hopea, e oaoa outou i te haereraa e farerei ia’na—e e riro te reira ei ohipa hoona.
Samuel H., 14 matahiti, Idaho, Marite
A pure ia ite outou
A ui ia outou iho, no te aha e mea au ore rii no outou ia paraparau i te episekopo. E aha, te mana‘o ra outou eita e roaa ia’na ia faaafaro i to outou fifi ? A pure ia ite outou e, ua here te episekopo ia outou e ua piihia oia no te tauturu ia outou.
Adam H., 13 matahiti, California, Marite