Taime no te papa‘iraa mo‘a

Ua faaora Iesu i te hoê lepera

Na Erin Sanderson

Te ora nei te taata papaʻi i Utaha, i Marite.

Haapii amui no ni‘a i te Faufaa Apî i teie matahiti !

A feruri i te hoê taime ua ma‘ihia oe. Ua rave anei te tahi taata i te hoê mea au no te tamarû ia oe ?

I roto i te Faufaa Apî te tai‘o nei tatou e nahea Iesu i te faa‘iteraa i te maitai i te taata ma‘i. I te hoê mahana ua haere mai te tahi lepera, oia ho‘i e ma‘i iri o te haamauiui i te taata, ia Iesu ra. Ua ite oia e mana to Iesu no te faaora i te feia ma‘i atoa. Ua ti‘aturi oia e nehenehe ta Iesu e faaora i to’na ma‘i. Ua tape‘a Iesu i te lepera ma te parau e, « Ia mâ oe » (Mareko 1:41). I te otiraa ihoa Ta’na mau parau, ua ora te ma‘i o teie taata.

E nehenehe ta tatou ia pee i te mau taahiraa o Iesu na roto i te hamani-maitai-raa e te hereraa i te taata tei ma‘ihia e tei oto.

Haapii rahi atu â : Te mau evanelia

E maha buka taa ê i roto i te Faufaa Apî tei piihia Te mau evanelia, tei papa‘ihia e te tahi mau pĭpĭ no Iesu. Te faati‘a nei te mau evanelia i te tau a ora ai Iesu Mesia i ni‘a i te fenua nei. Teie aamu no te faaoraraa o te lepera, tei roto ïa i e toru o te mau evanelia. Tei roto i te Mareko 1:40–42 e te Mataio 8:2–4 e te Luka 5:12–14.

Te mau mana‘o no te aparauraa utuafare

E nehenehe ta outou ia faa‘ohipa i te mau hoho‘a i te api 74 no te faati‘a i te aamu i roto i te Mareko 1:40–42. Ei reira e tai‘o ai i roto i te Iuda 1:22 ma te faanaho e aha te mea e rave ei utuafare no te faatupu i te tahi ohipa taa ê i roto i te oraraa o te te tahi taata. Peneia‘e e nehenehe ta outou e tavini huna i te tahi taata !

Himene : « Raconte-moi les histoires de Jésus » (Chants pour les enfants, 36).

Papa‘iraa mo‘a : Mareko 1:40–42

Video : A haere i ni‘a ia Biblevideos.org no te mata‘ita‘i i te hoho‘a « Jesus Heals a Lame Man on the Sabbath [Te faaoraraahia te pirioi i te mahana sabati] » e te hoho‘a « Jesus Heals a Man Born Blind [Te faaoraraahia tei mataru‘i mai to’na fanauraahia mai] ».

Pee i te mau taahiraa o Iesu

Ei utuafare, a ha‘uti taata ora i te mau hi‘oraa i muri nei ma te feruri e aha ta outou e nehenehe e rave no te faa‘ite atu i to outou here. A feruri atoa’tu i te tahi atu â mau hi‘oraa !

• Ua tae apî mai te tahi utuafare i to outou vahi.

• Te rave ino ra te tahi mau tamarii i te hoê tamarii i te fare haapiiraa.

• Ua tae mai te tahi ratere i roto i te Paraimere, e aita oia i mâtau i te taata.

• Aita e taata no te ha‘uti na muri i to oe teina.

• Te ta‘i ra te pêpe e te tunu ra to oe metua vahine i te maa no teie ahiahi.

• Ua ma‘ihia te tahi taata i roto i te paroisa e aita ta’na e nehenehe e haere i rapae i te fare.

Mana‘o no te mau papa‘iraa mo‘a : Imi i te hoê ta‘o

I roto i te Mareko 1:41 te faa‘ohipahia ra te ta‘o aroha. I te tahi taime e mau ta‘o rahi i roto i te Bibilia eita paha oe e maramarama. Mai te peu e ite mai oe i te hoê ta‘o mai te reira te huru, e nehenehe ta oe e faa‘ohipa i te « Guide des écritures [Parau tauturu no te mau papa‘iraa mo‘a] » no te tauturu ia oe ! Ei hi‘oraa, e nehenehe e hi‘o i te ta‘o « aroha » no te ite mai i te auraa e te tahi atoa mau irava e faa‘ohipa ia’na. E aha te tahi mau ta‘o ta oe e nehenehe e imi i roto i te aamu no Iesu tei faaora i te lepera ?