Feia apî
Sarah no te tahi atu taata
Te ora nei te taata papaʻi i Utaha, Marite.
I te matamua ra e mea fifi na’u ia faa‘ohipa i te mea ta’u e ti‘atiru nei ei pahonoraa i te hoê uiraa mai teie te huru, « No te aha aita oe e inu nei i te taofe ? » I te matamua ra e imi au i te tahi hororaa mai teie te huru, « E mea avaava roa » e aore râ « Aita vau e au nei i te reira ».
No te aha teie haamâ to’u ? No te aha teie ri‘ari‘a to’u ia ti‘a’tu no te mea ta’u e ti‘aturi nei ? Ia hi‘o vau i muri, aita vau i taa maitai no te aha teie ri‘ari‘a to’u. Te haamana‘o ra râ vau i te taime ua faaea vau i te tapuni i muri i te tahi parau hororaa.
I te hoê mahana, tei roto vau i te piha haapiiraa reo peretane, e ua faaara mai te orometua e, e mata‘ita‘i matou i te hoê tuhaa no te hoê hoho‘a teata, e hoho‘a ta’u i ite eiaha e mata‘ita‘i atu. E ua oaoa roa te tahi mau piahi e te anaanatae taatoa, ua maraa mai nei te rima o te tahi piahi, o Sarah, no te ani atu e nehenehe anei ta’na ia haere i rapae.
I te aniraa te orometua no te aha, ua pahono ohie noa mai Sarah, « No te mea e momoni au e aita vau e hi‘o nei te mau hoho‘a ma te parau faufau »
Ua faahiahia mau vau i to’na itoito ia ti‘a i mua i te piha taatoa. Aua‘e Sarah, ua ti‘a atoa vau no te tia‘i i rapae ma te manava hau, ia oti te hoho‘a i te patahia.
Ua taui-roa-hia vau mai tera mahana atu. Ua haamata vau i te faataa’tu i te mea ta’u e ti‘aturi nei e aita faahou e aperaa. E i te hopea, ua itehia mai ia’u te ti‘aturiraa ia’u iho nei e ua faaô rahi atu vau ia’u i roto i te mau ohiparaa a te Ekalesia e a te fare haapiiraa.
Aita vau i parau a‘enei ia Sarah i te faufaa o to’na hi‘oraa no’u, te tamata râ vau i te pee i to’na hi‘oraa taata ti‘aturi ia’na iho. Ua ite au i teie nei e, e ere roa te riroraa ei melo no te Ekalesia mo‘a e te faahiahia a te Atua i te hoê mea e haamâ’tu. Maitai e, na roto i to’u hi‘oraa e riro atu vai mai te hoê Sarah no te tahi atu taata.