Ngaahi Fakakaukau Maʻá e Efiafi Fakafāmili ʻi ʻApí

ʻOku ʻi he makasini ko ʻení ha ngaahi fakamatala mo e ngaahi ʻekitivitī ʻe lava ke fakaʻaongaʻi ʻi he efiafi fakafāmili ʻi ʻapí. Ko ha sīpinga ʻeni ʻe ua.

“Ko e Meʻa ʻOku Tau Tui Ki Aí,” peesi 8: ʻOku akoʻi ʻe he fakamatala ko ʻení, “ʻI heʻetau hikinimaʻi ʻa e palōfitá mo e kau ʻaposetoló, ʻoku tau maʻu ai ha fakamoʻoni ko e kau tamaioʻeiki kinautolu ʻa e ʻOtuá.” Te ke lava ʻo fakatupulaki hoʻo fakamoʻoni ki he kau palōfitá ʻaki haʻo lau pe fanongo ki he ngaahi lea ʻo e konifelenisi lahí. Fakakaukau ki hono lau fakafāmili e taha ʻo e ngaahi lea fakamuimui ʻa Palesiteni Monisoní pea fili ha konga pau ʻo ʻene akonakí ke mou moʻui ʻaki. Feinga ke ke fakatokangaʻi e founga ʻoku tāpuekina ai koé ʻi hoʻo moʻui ʻaki ʻa ia ʻoku kole mai ʻe he palōfitá.

“Haʻu, Muimui ʻIate Au: Ko Hono Akoʻi ʻo e Ngaahi Meʻa Tefitó ʻi ʻApí,” peesi 28: Fakakaukau ki hano ako fakafāmili ha kaveinga ʻi he Haʻu, Muimui ʻIate Au ʻi ha māhina ʻe taha. Te ke lava ʻo ako fakakongokonga hoʻo kaveinga kuo filí ʻi he uike takitaha ʻo ngāue ʻaki ʻa e folofolá pe ngaahi tokoni fakaako kehé hangē ko e Malangaʻaki ʻEku Ongoongoleleí, LDS.org, ko e Fakahinohino ki he Ngaahi Folofolá, mo e The Life of Christ Bible Videos [Ngaahi Vitiō mei he Tohi Tapú Ki He Moʻui ʻa Kalaisí]. Te ke lava ʻo vahevahe ʻi he efiafi fakafāmili ʻo e uike takitaha ʻa e meʻa kuó ke akó mo hoʻo ongo ki aí.