Pōpoaki ʻa e Faiako ʻAʻahí
Ngaahi Ouau mo e Ngaahi Fuakava ʻo e Temipalé
Ako ʻi he faʻa lotu ʻa e fakamatala ko ʻení pea feinga ke ʻiloʻi ʻa e meʻa ke vahevahé. ʻE fakatupulaki fēfē ʻe he mahino “Ko e Fāmilí: Ko ha Fanongonongo ki Māmaní” ʻa hoʻo tui ki he ʻOtuá mo faitāpuekina ʻa kinautolu ʻokú ke tokangaʻi ʻi he faiako ʻaʻahí? Ke maʻu ha fakamatala lahi ange, ʻalu ki he reliefsociety.lds.org.
Tuí, Fāmilí, Fakafiemālié
Ko e ngaahi ouau kotoa pē ʻoku fie maʻu ki he fakamoʻuí mo e hakeakiʻí ʻoku ʻalu fakataha ia mo e ngaahi fuakava mo e ʻOtuá. Naʻe pehē ʻe Linitā K. Pētoni, ko e palesiteni lahi ʻo e Fineʻofá, “ʻOku ʻuhinga e fakahoko mo tauhi ʻo e ngaahi fuakavá ki heʻetau fili ke haʻi kitautolu ki heʻetau Tamai Hēvaní mo Sīsū Kalaisi.”1
Naʻe pehē ʻe ʻEletā Nila L. ʻEnitasoni ʻo e Kōlomu ʻo e Kau ʻAposetolo ʻe Toko Hongofulu Mā Uá, “Naʻe folofola e ʻEikí, ‘ʻOku fakahā ʻi hono ngaahi ouaú ʻa e mālohi ʻo e anga faka-ʻOtuá.’
“ʻOku ʻi ai ha ngaahi tāpuaki makehe mei he ʻOtuá maʻá e taha moʻui taau kotoa pē ʻoku papitaiso, maʻu e Laumālie Māʻoniʻoní, mo maʻu maʻu pē e sākalamēnití.”2
Naʻe pehē ʻe ʻEletā M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá, “ʻI he taimi ʻoku ʻalu ai ʻa e kakai tangata mo fafiné ki he temipalé, ʻoku fakatou fakakoloaʻi kinaua ʻaki ʻa e mālohi tatau pē, ʻa ia ko e mālohi ʻo e lakanga fakataulaʻeikí …
“… ʻOku lava ke maʻu ʻe he kakai tangatá mo e houʻeiki fafiné kotoa e mālohi ko ʻení ke tokoni ʻi heʻenau moʻuí. ʻE lava ke maʻu ʻe kinautolu kotoa kuo nau fai e fuakava toputapu mo e ʻEikí pea fakaʻapaʻapaʻi e ngaahi fuakava ko iá ha fakahā fakatāutaha, ke faitāpuekina ʻi he tauhi mai ʻa e kau ʻāngeló, ke fefolofolai mo e ʻOtuá, ke maʻu ʻa e kakato ʻo e ongoongoleleí, pea ko hono tumutumú, ke hoko ʻa e kau ʻea-hoko fakataha mo Sīsū Kalaisi, ki he meʻa kotoa ʻoku ʻa ʻetau Tamaí.”3
Ngaahi Potufolofola Kehé
1 Nīfai 14:14; Tokāteline mo e Ngaahi Fuakava 25:13; 97:8; 109:22
Ngaahi Talanoa ʻa e Kakai Moʻuí
ʻI he 2007, hili ha ʻaho ʻe fā mei ha mofuike lahi ʻi Pelū, naʻe fakataha ʻa ʻEletā Mākosi B. Nesi ʻo e Kau Fitungofulú mo e palesiteni fakakolo ko Uenisesilō Konitī mo hono uaifi ko Pāmelá. “Naʻe fehuʻi ange ʻe ʻEletā Nesi kia Sisitā Konitī pe ʻoku fēfē hake ʻa e fānaú. Naʻá ne malimali pē mo tali ange mālō mo e angaʻofa ʻa e ʻOtuá ʻoku nau kei malu mo lelei pē. Naʻá ne fehuʻi ange pe ʻoku fēfē ʻa e ʻapi ʻo e fāmili Konitií.
Naʻe tali ange ʻe he fefiné ni, “‘ʻAuha ia.’
Naʻe toe pehē ange ʻe ʻEletā Nesi, “… ‘Ka ʻokú ke kei fofonga malimali pē.’
Naʻá ne tali ange, “’ʻIo, ne u ʻosi lotu pea ʻoku ou nonga. ʻOku maʻu pē meʻa kotoa ʻoku mau fie maʻú. ʻOku ʻikai mole ha taha, ʻokú ma maʻu ʻema fānaú, ʻokú ma sila he temipalé, ʻokú ma maʻu e Siasi fakaofó ni pea ʻokú ma maʻu ʻa e ʻEikí. Te ma lava pē ʻo toe langa foʻou ʻi he tokoni ʻa e ʻEikí.’ …
“ʻOku ʻuhinga ki he hā ke fakahoko mo tauhi ʻa e ngaahi fuakava mo e ʻOtuá ʻokú ne ʻomi kiate kitautolu ʻa e mālohi ke malimali lolotonga ʻa e faingataʻá, mo liliu ʻa e ʻahiʻahí ke hoko ko ha ikuna … ?”
“Ko e ʻOtuá ʻa e tupuʻangá. ʻOku tau maʻu e mālohi ko iá ʻo fakafou ʻi heʻetau ngaahi fuakava mo Iá.”4