ʻE Lava ʻo Ako ʻa e Tokotaha Kotoa Pē mei ha Palōfita
Henry Serion Sr., Hauaiʻi, USA
Tā fakatātā ʻa Allen Garns
ʻI hoku taʻu 17, naʻá ku ngāue ʻi ha hōtele ʻi Kailua-Kona ʻi Hauaiʻi, USA. ʻI heʻeku ngāue ko ha tokotaha toʻo kató, naʻá ku sio ki ha kakai ʻiloa tokolahi naʻa nau nofo ʻi he hōtelé, kau ai ʻa Sione Uaine, Tolofī Lamoa, mo ʻĒseta Viliami.
ʻI ha efiafi ʻe taha, naʻe ʻosi aʻu mai e meimei kotoa e kau ʻaʻahí, naʻá ku kiʻi mālōlō ʻi he konga ki muʻa ʻo e hōtelé mo e tau mai ha limo lanu ʻuliʻuli ʻi he veʻehalá pea hū mai ha kau tangata ʻe toko fitu naʻa nau talausese ʻuliʻuli, sote hinehina, mo e hēkesi. Naʻe kau ʻiate kinautolu ha tangata ʻe taha naʻe suti ʻuliʻuli. Hili pē hono tau ʻe he fakaʻulí ʻenau kaá ki he tauʻangá, ne nau ʻalu kotoa ki he falekaí ke maʻu meʻatokoni efiafi. ʻI heʻeku foki ki loto ke hoko atu ʻeku ngāue ko e tali telefoni ki hono ngaahi ha lokí, naʻá ku fakakaukau ne nau hangē ha kau polisi fakatotoló (FBI).
Hili ha houa ʻe taha mei ai, lolotonga ʻeku ifi tapaka ʻi he tuʻa hōtelé naʻe foki hake e kulupu ne u sio ki ai kimuʻa angé ʻo heka ki heʻenau limó ʻa ia naʻe ʻosi talitali atu ʻi he veʻehalá. Naʻa nau lue ki he kaá ʻo fakaava e matapā ʻi muí ke ʻatā ke heka ai ʻa e tangata naʻe suti ʻuliʻulí. Naʻe ʻikai ke ne heka ki he kaá, ka naʻe tuʻu ʻa e tangata suti ʻuliʻulí, ʻo tafoki peá ne sio mai ki heʻeku falala ki he falé, peá ne lue mai kiate au.
Naʻe lōloa mo pakau, pea mata sioʻata mo e kiʻi kava hinehina ʻi hono kumukumú. Naʻe mafao mai hono nimá ke ma lulululu pea hili hono nima ʻe tahá ʻi hoku umá. Naʻá ku ʻohovale ʻi he fie haʻu ha tangata makehe pehē ʻo lea mai kiate au, ko ha talavou naʻe taʻeʻiloa kiate ia.
ʻOku ʻikai ke u manatuʻi ʻene ngaahi lea kotoa mai kiate aú ka naʻá ne pehē mai “ʻoku kovi ʻa e ngaahi meʻa ko ʻená kiate koe,” ko e ʻuhingá ki heʻeku foʻi tapaká. Ne ongo kiate au ʻene angaʻofá mo hono ʻulungāngá.
Hili ha taʻu ʻe taha mei ai, naʻe akoʻi au ʻe he ongo faifekaú pea ne u papitaiso.
Lolotonga ʻeku sio he ngaahi ʻata ʻo e kau taki ʻo e Siasí, naʻá ku fakatokangaʻi ha laʻitā ʻo Palesiteni Siaosi ʻAlipate Sāmita (1870–1951) pea ne u fakatokangaʻi ʻi he taimi pē ko iá ko e tangata angaʻofa mo makehe ia ne u fetaulaki mo ia ʻi he konga ki muʻa ʻo e hōtelé. Ne u ongoʻi makehe ange he fie fakahoko ʻe he Palesiteni ʻo e Siasí ha meʻa pehē ki ha tokotaha hangē ko aú, ko ha tamasiʻi naʻe ʻikai ko ha mēmipa ʻo e Siasí pea naʻe ʻikai ke fuʻu mahuʻinga.
Ko ha tangata lelei ia ke ne fakahā ha ʻofa mo e tokanga ki ha tamasiʻi kei siʻi naʻe ngāue ʻi ha tuʻunga taʻeʻiloa pea ʻikai haʻane mahino kau ki he ongoongoleleí pe ko e ʻofa ʻa e Tamai Hēvaní kiate kitautolú.
Hili ha taʻu e onongofulu mā nima, ʻoku ou maʻu ha mahino lahi ki he tokanga mo e ʻofa ko iá, pea ʻoku ou feinga ke u sio ki he niʻihi kehé ʻo tatau mo e sio ʻa Palesiteni Sāmita kiate aú.