Ko e Founga ke Hoko ai ko ha Kaungāmeʻa Leleí

Fai ʻe David Morales

ʻOku nofo e taha naʻá ne faʻú ʻi Sanitā Kulusi, Polivia.

‘Oku tau fie maʻu kotoa pē ke tau ongoʻi ʻoku tau kau. Ko e meʻa ʻeni te ke lava ʻo fai ʻo kapau ʻokú ke ongoʻi liʻekina, pe ko ha taha kehe.

Naʻe kamata ʻeku fakafeohi ki he Siasí ʻi hoku taʻu hongofulu tupú, ka naʻe ʻikai ke u toe ʻalu ki he ngaahi fakatahaʻanga ʻo e Sāpaté he ne u ongoʻi kuo liʻaki au ʻe he toʻu tupú. Hili ha ngaahi taimi mei ai, naʻe fakaafeʻi au ʻe ha taha ʻo e kau talavou ko iá ki ha ʻekitivitī. Naʻá ku tali mo saiʻia ʻi he ngaahi ʻekitivitií koeʻuhí ko e ngaahi meʻa ia ne u fiefia hono fakahokó, hangē ko e: fakatātaaʻi ʻo ha meʻa, vaʻinga pasiketipoló, mo e lelé.

ʻI he hokohoko atu ʻeku ʻalu ki he ngaahi ʻekitivitií, ne u maheni mo e toʻu tupú peá u ʻiloʻi ko e tokolahi ʻiate kinautolu naʻa mau ako fakataha. Naʻe faifai pea kamata ke u fakakaungāmeʻa mo e kau talavou mo e kau finemui ne nau maʻu e ngaahi tuʻunga moʻui tatau mo aú. ʻOku ou fakamālō naʻe fakaafeʻi au ʻe ha taha ki ha ʻekitivitī ʻa e Siasí, pea ʻoku ou fakamālō naʻá ku tali ia.

Kuó ke ongoʻi tatau nai mo e ongo ne u maʻú: liʻekina pe hangē ʻoku ʻikai ke fakakau koé? Pe kuó ke ʻilo ha taha naʻe ʻikai ke ne ongoʻi ʻoku tali lelei ia mo ʻikai ke lahi hono ngaahi kaungāmeʻá? Pe ʻi he akó, ʻi he lotú, pe ʻi ha feituʻu kehe pē, kuo tokolahi e kakai naʻe ʻi ai ha taimi ʻi heʻenau moʻuí ne nau ongoʻi pehē ai.

Ko e Founga ki he Fakakaungāmeʻa Leleí

ʻOku fakalotomamahi ʻa e liʻekiná, ka ʻe ʻikai te ke ongoʻi lelei ange ʻi hoʻo nofo mo e loto mamahí pe ʻita fuoloá. Ka ke feinga ke fai e ngaahi meʻa ko ʻení:

Kau ʻi he ngaahi ʻekitivitī ʻa e Siasí. Ko e faingamālie lelei ia ke ke ʻi ha kakai ʻoku nau fakaʻapaʻapaʻi hoʻo tuʻunga moʻuí.
Ako pea fakatupulaki e ngaahi taukei ngāué. Ko e kau atu ki he ngaahi kulupu fakaakó, timi sipotí, pe ngaahi kalapú ko ha founga lelei ia ke ke maheni ai mo ha kakai ʻoku nau manako ʻi he ngaahi meʻa tatau mo koé.
ʻOua ʻe faʻa tatali maʻu pē ke kole atu ʻe he kakaí ke mou kaungāmeʻá. Fakafeʻiloaki koe ki he niʻihi kehé.
Hoko ko e tokotaha lelei taha te ke ala lavá pea tauhi hoʻo ngaahi tuʻunga moʻuí. Te ke maʻu ai ha ngaahi kaungāmeʻa ʻoku nau houngaʻia ʻi hoʻo tōʻongá mo e maama ʻokú ke ʻoatú.
Tuku ha taimi mo hoʻo fāmilí. ʻE lava ke ke ʻiloʻi ai, ko e niʻihi ho ngaahi kaungāmeʻa lelei tahá ʻoku maʻu pē ʻi ʻapi.

Founga ki hono Fakakau e Niʻihi Kehé

Ko e taimi ʻe niʻihi ʻe hā ngali faingataʻa ke fai e ngaahi meʻa ʻoku ʻikai ke ke anga hono faí ʻo fakakaungāmeʻa ki he niʻihi kehé, ka ʻi heʻetau manatuʻi ko e fānau kotoa pē kitautolu ʻa e ʻOtuá, te tau ʻilo leva ʻa e mahuʻinga ʻo e tokoni ki he niʻihi kehé. Ko ha ngaahi fakakaukau ʻeni:

Fakalea ki he kakai foʻou ʻi he akó mo e lotú. Fakafeʻiloaki kinautolu ki ho ngaahi kaungāmeʻá.
Fakaafeʻi ha taha ʻokú ne fie maʻu hano kaungameʻa ki ha ʻekitivitī ʻa e akó pe Siasí.
Fehuʻi hangatonu—ʻaki e angaʻofa mo e faʻa kātaki—kiate kinautolu ʻoku nau ʻuhingaʻi pē ʻenau ngaahi tōʻonga ke ongoʻi liʻekina ai e niʻihi kehé.
Tangutu ofi ki ha taha ʻoku liʻekina pe fakaafeʻi ia ke tangutu fakataha mo koe mo ho ngaahi kaungāmeʻá.
Lotu ki he Tamai Hēvaní ʻi he taimi ʻoku ʻikai ke ke ʻiloʻi ai ha founga ke tokoniʻi ha tahá. ʻOkú Ne ʻafio haohaoa ki he meʻa ʻoku fie maʻu ʻe he tokotaha ko iá ke fiefia aí pea ʻe lava ke tokoni kiate koe ke ke fai ha tokoni.