ʻOku Akoʻi ʻe ʻAlamā ʻa e Founga ʻo e Lotú

Naʻe ʻalu ʻa ʻAlamā ko e Siʻí mo e niʻihi kehe ke akoʻi e kau Sōlamí. Naʻe tui e kau Sōlamí ki he Tamai Hēvaní kimuʻa, ka naʻe ʻikai ke nau toe tauhi ʻEne ngaahi fekaú. Naʻe ʻikai ke nau tui kia Sīsū.

Pea naʻe ʻikai ke nau manatuʻi ʻa e founga totonu ʻo e lotú.

Naʻe tuʻo taha he uike ʻa e taufetongi ʻa e kau Sōlamí ʻi hono fai e lotú. Naʻa nau kaka ki ha tuʻunga māʻolunga. Naʻa nau hiki hake honau nimá ki ʻolunga. Pea naʻa nau fakamālō ki he Tamai Hēvaní ʻi heʻenau lelei ange ʻi he kakai kehé. Naʻe fai ʻe he tokotaha kotoa pē ʻa e lotu tatau.

Naʻe toki lotu pē ʻa e kau Sōlamí ʻi heʻenau kaka ki he tuʻungá. Naʻe ʻikai ke nau fakakaukau ki he Tamai Hēvaní pe lotu kiate Ia ʻi ʻapi pe ʻi ha toe feituʻu kehe.

Naʻe akoʻi ʻe ʻAlamā ki he kakaí te nau lava ʻo lotu ʻi ha faʻahinga taimi pē. Te nau lava ʻo lotu ʻi ʻapi, ʻi he ngoué, pe ʻi he toafá. Naʻá ne akoʻi te nau lava ʻo lotu kau ki ha faʻahinga meʻa pē pea ʻe tokoniʻi kinautolu ʻe he Tamai Hēvaní.

Te tau lava ʻo lotu ʻi he founga naʻe akoʻi ʻe ʻAlamaá. Te tau lava ʻo lotu ʻi ha faʻahinga taimi pē mo ha faʻahinga feituʻu pē. Te tau lava pē ʻo lotu fakalongolongo ʻi hotau lotó. ʻE fanongo mai maʻu pē ʻa e Tamai Hēvaní!