ʻOku Mau Tui ki he Muimui he Palōfitá

Ko e Siasí he ʻahó ni ʻoku “fokotuʻu ki he tuʻungá ʻa e kau ʻaposetolo mo e kau palōfita, ko hono fuʻu maka tulikí ʻa Sīsū Kalaisi pē” (ʻEfesō 2:20). ʻO hangē ko hono fuofua fokotuʻu e Siasí ʻe Sīsū Kalaisi lolotonga ʻEne ngāue ʻi he matelié, ʻOku tau maʻu ʻa e Kau ʻAposetolo ʻe toko hongofulu mā ua, kae pehē foki ki he Palesiteni ʻo e Siasí mo hono ongo tokoní, ʻa ia ko e kau palōfita, kau tangata kikite, mo e kau tangata maʻu fakahā. ʻOku uiuiʻi kinautolu ke nau fakamoʻoni kia Sīsū Kalaisi mo malanga ʻaki ʻEne ongoongoleleí ki he māmaní kotoa.

ʻOku fili ʻe he Fakamoʻuí ʻa ʻEne kau palōfitá pea ʻi he ngaahi aʻusia lahi ʻoku teuteuʻi ai kinautolu ke tataki ʻa e Siasí. ʻI he taimi ʻoku lea ai e kāingalotu ʻo e Siasí kau ki he palōfitá, ʻoku nau ʻuhinga ki he Palesiteni ʻo e Siasí, ʻa e tokotaha pē taha ʻi he māmaní ʻoku lava ke ne maʻu e fakahā maʻá e Siasí hono kotoa.

Koeʻuhí ʻoku akonaki ʻa e Palesiteni ʻo e Siasí maʻá e ʻEikí (vakai, T&F 1:38), ʻoku ʻikai fakapotopoto ke tau filifili pē ʻa e niʻihi ʻo ʻene akonaki ʻoku tau fie muimui ki aí. Ka ke tau fakakaukau ki Heʻene akonakí mo e ngaahi fakaafé ʻo hangē pē naʻa tau maʻu fakahangatonu ia meia Sīsū Kalaisí, “ʻi he kātaki mo e tui kotoa pē” (T&F 21:5).

ʻI heʻetau fili ke fakafanongo mo muimui ki he palōfitá mo e kau ʻaposetoló, ʻoku tāpuekina kitautolu ʻi heʻetau feinga ke hoko ʻo hangē ko Sīsū Kalaisí, pea ʻoku maluʻi kitautolu mei he taʻe malu mo e kākā ʻo e māmaní (vakai, ʻEfesō 4:11–14).

Hangē ko ʻení, ʻoku tau maʻu ʻa e malu fakalaumālié ʻi ha māmani ʻoku feliuliuaki ai ʻa e ngaahi ʻulungāangá mo e tuʻunga mahuʻingá ʻi heʻetau moʻui ʻaki ʻa e ngaahi tuʻunga ʻulungaanga ʻoku akoʻi mai ʻe he palōfitá mo e kau ʻaposetoló. ʻOku tau toe maʻu foki ʻa e malu fakatuʻasinó ʻi he muimui ki he akonaki fakapalōfitá ke fakaʻehiʻehi mei he fakamoʻuá, fakahaofi ha paʻanga, mo tānaki ha meʻakai feʻunga.

ʻI he foaki ʻe he Palesiteni ʻo e Siasí mo e Kau ʻAposetoló ʻenau moʻuí ki hono fakahoko e ngāue ʻa e ʻEikí—ʻo fefolauʻaki ʻi he māmaní ke fakamoʻoni kia Kalaisí, akoʻi ʻa e Kau Māʻoniʻoní, pea mo tokangaʻi hono founga puleʻi ʻo e Siasí fakamāmani lahí—ʻokú Ne poupouʻi mo tāpuekina kinautolu mo honau ngaahi fāmilí. ʻOku tau toe poupouʻi kinautolu ʻi heʻetau lotua kinautolú, talangofua ki heʻenau akonakí, mo fekumi ke fakapapauʻi mai ʻe he Laumālie Māʻoniʻoní kiate kitautolu ʻa e ngaahi moʻoni ʻoku nau akoʻí.

ʻI heʻetau poupouʻi ʻa e palōfitá mo e kau ʻaposetoló, ʻoku tau maʻu ha fakamoʻoni ko e kau tamaioʻeiki kinautolu ʻa e ʻOtuá. Neongo ʻoku ʻikai ke nau haohaoa, ʻe ʻikai fakangofua ʻe he Tamai Hēvaní ke nau taki halaʻi kitautolu (vakai, Teutalōnome 18:18–20).