Bwanaaia Aika Itiaki ni Boong aika Kaitira
Taiaoka Tai Katanga te Kuna Anne
Kamatata n te korotamnei iroun Bradley H. Clark
Tabeua te tai ae nako, ngai ma au utu ti maeka i Veracruz, Mexico, ike a nanako n reirei iai natiu n te reirei ae te buraimwari. Ni katoa ingabong ngke I buokiia natiu aika teniman ni katauraoia nakon te reirei, ti kakauongo n te reerio—te kabanea ni kinaaki n titeition n te kaawa—ma te burokuraem ae kakukurei are e kairaki iroun te tia kanakobwana n te reerio ae te roronga.
Ti a moana ongoraara n te kuna ae rang aki karaunano. Ngkai I moanna ni kakauongo raoi nakon mwanewen te kuna, I nooria bwa baike a taekinaki, e ngae ngke aki buakaka, a kakauiango ao ni bebete.
I taku n au baire nakoia natiu, “Ti aki kona n ongra n te aekaki n taetae aei.” Tao a bon aki kakauongo raoi nakon mwanewen te kuna, ma a bon kakauongo n ae tau ni kamararaan tangina.
A noorai n kauarerekea tangin te reerio ao n titirakinai bwa terana ae I karaoia. “N na tuanga te tia katanoata n te reerio bwa e na kanakoa te kuna arei man te burokuraem.” Kubanakoia e moantaai ni kaungaai n tuangai te bwai ae N na karaoia.
A bon aki kakoaua ao Ngai naba, ma I tabeka te tareboon ao ni wetea te tabo ni kanakobwana n te reerio. I aki kantaningaia bwa e na iai te kaeka, ma ni miimiu, te tia kanakobwana n te reerio naba anne are ti a bon tibwa ongora naba ni bwanaana n te kaongora e kaeka au tareboon n te tai ae waekoa.
I tuangnga bwa I aki booraoi ma are I ongoraekainna n te kuna arei, ngkai angiina utu a kakauongo n te reerio n te tai anne n te moaningabong. E titirakinai tera au iango bwa e na bitia nako iai, ma e rang ataa te katei ngaia are I a tii bubutia bwa e na aki katanga te kuna anne ngkana a mena ataei inanon te mweenga.
I aki kunea bwa au tareboon e nako iaon te eea, ma I bon tii kakaitau ngkai e ongo te tia kanakobwana n te reerio. Ao ibukin tabeua te bong imwiina, I kona n ataia bwa e kaekaaki au bubuti.
Te taneiai anne e kamatoa nakoiu bwa ti riai n ninikoria ngkana e mena inanon baira karaoan taian babaire ao ni karaoa ae riai ni kataniia natira man kairoro aika buakaka. Ngkana ti karaoia, e kona n reitinako n raoniira te Tamnei ae Raoiroi.